The Traitor – 球壇背叛者聯盟

紅色利刃 於 04/06/2017 發表 收藏文章
現今以商業掛帥為重既足球世界,莫講話One-Club Men買少見少,有啲球員連拒絕加盟敵對球會嘅堅持都不復已往。球員對球迷嚟講總係有一份理想人生嘅投射,我哋無法係現實生活中成為一位職業足球員,慢慢就會對自己鍾情嘅球員有咗份難以言喻嘅期盼。縱使佢做唔到一代霸主強如C朗、美斯,亦希望佢能夠好似托迪、拿姆一樣對球會忠誠如一。可惜嘅喺,有啲球員不單止同我地嘅期望漸行漸遠,甚至會做出一啲對球迷嚟講難以磨滅嘅傷害,一種一輩子都唔會被原諒嘅傷害。

背叛者溫床
能夠背負起呢嗰名銜嘅球會,相信大家都估得到。蜜蜂軍團多蒙特,於3年內三名陣中星級球員先後背叛球隊,加盟死敵拜仁。於2012/13賽季,多蒙特先後在聯賽、歐聯屈居於拜仁之下,在德國盃上亦慘遭對方淘汰。當時多蒙特球迷對拜仁嘅厭惡情緒已然高漲,但最令多蒙特球迷反感嘅卻係自家球星-葛斯。2013年4月23日,拜仁以3700萬歐元啟動了葛斯與多蒙特嘅解約金條款,並隨即宣佈於7月1日正式加盟德甲巨人。作為球迷,面對當家球星於接近季尾緊張關頭不單拋棄糟糠,更要向死敵投懷送抱,除咗心如刀割沒有其他。但多蒙特球迷要承受嘅傷害又點止咁少,葛斯出走嘅同時,利雲度夫斯基亦向球會表明心跡,重申自己加盟拜仁嘅意向。縱使多蒙特會方再三阻撓,但同樣於季中便被拜仁強搶民女一樣,宣佈利雲度夫斯基季尾會以自由身加盟。不過,最痛擊多蒙特球迷嘅係效力球會長達8年嘅隊長曉姆斯,以一不離二,二不離三之勢,成為3年內第三位加盟拜仁的球星。而且,拜仁更選擇在賽季完成前,兼雙方德國杯決賽對壘前公佈消息,恍惚喺再次向多蒙特球迷敲起喪鐘一樣。三人嘅出走完全摧毀球迷對球會嘅期會,對球員嘅信任,甚至憾動咗大家心目中對足球嘅一份執著。

背叛佼佼者
法比加斯相信對呢嗰稱號當之無愧,雖然法比加斯並無好似以上幾位多蒙特球星一樣直接加盟死敵球會,但法比加斯會令球迷如此激動,或者喺因為衰多口。於2011年,法比加斯以3400萬歐元回到母會巴塞隆拿,當時阿仙奴球迷對於隊長既離去相當惋惜。而法比加斯當年為咗安撫球迷,就在受西班牙雜誌Don Balon訪問時講咗 "If some day I leave Arsenal it will never be to sign for another English team. I'm very sure," 。結果,效力巴塞3年過後此子以3000萬鎊加盟阿仙奴同市死敵車路士,並引起球迷強烈不滿。還好當年未見暴龍哥登場咆哮,但最令人記得嘅都仲有火燒球衣一幕。

背叛者之王
要喺呢個聯盟中稱王並唔容易,畢竟對手多如繁星,但其實你同我心目中個答案未必一樣。因為大家支持嘅球隊各有不同,被自己追捧嘅球員背叛有幾痛只有自己先能夠體會,但如果你有幸體會過綠色帽子相信你都會明白。對筆者而言 - 奧雲,或者宜家會被利迷稱為「敏感詞」果位紅衣名宿,就喺果嗰能夠令你有間歇性傷感、憤怒嘅背叛者之王。奧雲的背叛之路有點轉折,離開成名地利物浦後,先後踏足過班拿貝球場、聖占士球場,但最終選擇加盟紅魔鬼-曼聯。作為第四位同時效力過利物浦和曼聯的球員,奧雲更穿上紅魔傳奇嘅7號球衣,仿惚要告知全世界奧雲是下一個曼聯傳奇一樣。雖然奧雲早已離開了綠茵球場,但奧雲對球迷嘅傷害並未因此而消散。作為曼聯名宿「敏感詞」曾經代表利物浦元老隊於慈善友誼賽對陣皇馬元老隊,此舉已經令管理層得罪曬廣大利迷。但陰魂不散嘅奧雲現今身為利物浦大使,最近就係歐霸決賽前嘅訪問用「we(我們)」去稱曼聯,最終引來利迷強烈反彈並發起聯署要將奧雲剔除出去官方球會大使名單。奉上以下連結供大家聯署: https://www.change.org/p/tony-barrett-remove-michael-owen-as-liverpool-football-clubs-international-ambassador?recruiter=725094539&utm_source=share_petition&utm_medium=twitter&utm_campaign=share_petition
同時,亦引來其他利物浦名宿聲討,如重砲手懷斯便揚言佢想取代奧雲成為新一任利物浦大使。
http://www.empireofthekop.com/2017/05/26/john-arne-riise-wants-owens-ambassador-job-hes-not-been-scared-to-tell-people/

除了對奧雲的憤慨,筆者亦想挑動一下大家既神經,或者你嘅愛隊又會遭到背叛,以下喺今年轉會窗相對有機會加盟背叛者聯盟嘅成員:

巴卡約高
今季摩納哥在法甲及歐聯賽事中大放異彩,除了教練渣甸領導有方外,球員的高效發揮,亦是其中的主因,現年22歲的巴卡約高作為球隊的中場核心,在進攻和防守方都有著相當出色嘅表現。法國媒體《RMC》指出,巴黎聖日耳門今季在伊巴謙莫域離去後,深切了解到球會急需補強,巴黎嘅代表已經同巴卡約高經理人團隊開始洽談,或者法國人來季有機會體驗一下巴黎生活了。


祖赫特
作為英格蘭第一門將,祖赫特今季的情況相當尷尬,除了被效力多了的曼城棄用外,在借往意甲拖連奴後表現亦相當神經刀,屢次令球會失分而回。但作為一名經驗豐富的門將,或者祖赫特可以喺今年轉會窗操作下再次加盟英超球隊。現時,曼聯門將迪基亞轉投皇馬的聲音不絕於耳,而曼聯二號門將阿根廷國腳羅美路又難以令人放心,因此簽下祖赫特與羅美路作競爭的呼聲亦很高。
https://www.google.com.hk/amp/www.independent.co.uk/sport/football/transfers/transfer-news-joe-hart-manchester-united-target-everton-a7708246.html%3Famp

請支持(紅色利刃) Facebook專頁!

參考資料:
http://player.7m.cn/91101/index.shtml

https://www.theguardian.com/football/2013/apr/29/robert-lewandowski-manchester-united-transfer

http://www.telegraph.co.uk/sport/football/competitions/bundesliga/10109192/Robert-Lewandowskis-move-to-Bayern-Munich-is-off-according-to-Borussia-Dortmund-chief.html

http://www.mirror.co.uk/sport/row-zed/liverpool-supporters-start-petition-michael-10498387

https://twitter.com/cesc4official

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→