舒拉達連於曼聯掙扎之迷 精選

2015年7月13日，「小豬」舒韋恩史迪加加盟曼聯既消息震驚整個球壇，而當日稍後時間，曼聯亦公佈另一單已經完成既轉會，亦係本文既主人翁 - 舒拉達連。
好多球迷稱佢地為Schmidfield，即係舒氏中場既意思。整整18個月後，2017年1月12日，舒拉達連正式離開曼聯轉投愛華頓。上任領隊冇完全信任佢、現任領隊冇點用佢，到底呢單轉會既問題出現左係邊到呢？

作為修咸頓既Box-to-Box中場，當舒拉達連加盟曼聯既時候，大家都期待佢既傳球、精力同走動能夠將曼聯多年黎疲弱既中場線提升一個層次。而事實上舒拉達連頭二十場正選上陣既比賽，曼聯都能夠保持不敗。舒拉達連頭十主場賽事入面曼聯更加成功保持清白之身。
即便如此，雲高爾並無固定既出場機會比佢，係雲高爾既心目中，舒拉達連仲係費蘭尼之後。

縱使舒拉達連係葛迪遜球場取得處子入球，協助球隊三球淨勝愛華頓，佢勉強擠身足總盃決賽既後備名單，到最後亦無為球隊扳甲上陣。

好多睇波既人都唔明白舒拉達連係曼聯做過啲咩黎，即使佢本人對於成為曼聯既一份子感到驕傲，可惜佢從來都未試過主宰任何一場曼聯既比賽。
當雲高爾係2016年離開曼聯，紅魔迎黎摩帥既時候，大家都好樂觀咁認為舒拉達連即將重生，成為球隊之中不可或缺既一員。摩連奴承諾會為曼聯帶黎不一樣既踢法，更加話以舒拉達連既走動同拼勁，可以將佢變成球隊既核心。

但到最後，憑走動同拼勁得到摩連奴賞識既，係西班牙既中場 - 安達 · 靴里拉。舒拉達連半年黎未試過係英超正選上陣，佢只能夠係聯賽盃同歐霸盃正選分別披甲兩次同一次。所以當2016年12月摩帥話舒拉達連要求轉會既時候，大家都冇感到意外。

基於隊友同領隊既關係，舒拉達連只能出走，係拖肥同舊帥朗奴高文重聚。希望擁有佢說明書既朗奴高文可以令佢仲係當打之年係愛華頓再次發光發熱。佢係曼聯既生涯近乎從未開始，僅此祝福佢一路順風。



原文