蘇帥師承費格遜，擔正帥印不遠矣

上場對陣水晶宮勝出後，蘇帥再次打破紀錄，各項賽事作客取得八連勝嘅佳績。令佢扶正帥印嘅呼聲越來越高。最近亦有報導指出，蘇帥已經在酒店退房，讓外界猜測為擔正帥印嘅舉動之一。同時，佢亦都拍下廣告呼籲球迷趕快買下季嘅季票。
就咁睇，蘇帥的確係曼聯近年不斷尋找嘅最佳人選。而筆者亦都總括左一下蘇帥擔正嘅五大理由。

第一，成績彪炳。
自蘇帥上任以來，聯賽不敗，各項賽事與英超BIG6球隊較量中，取得三勝一和，即戰勝熱刺、阿仙奴及車仔，戰和利物浦。 只剩低未同同城死敵曼市交手。而對於中下遊球隊亦都取得勝利，只係同般尼嗰場打和。如此成績，應該為佢取得一紙合約。

第二，提高士氣。
球隊在近幾場比賽士氣提升到極點。除了取得勝利帶來嘅士氣之外，蘇帥一改球隊戰術，解放咗多名進攻球員，讓球員踢得更自由及奔放。而蘇帥亦都俾咗好多青訓球員上陣嘅機會。在多名主力受傷下，敢於用新人並且取得勝利，能讓整個更衣室嘅氣氛變得非常好。

第三，戰術部署。
戰術主要分成幾個部分。主要進攻套路就係防守反擊，亦係費SIR時代慣用嘅套路。馬斯亞同拉舒福特就如當年嘅C朗及朗尼嘅速度一樣，令很多後衛聞風喪膽。連加特作中場串連，伺機突襲。普巴可以專注進攻，減少防守工作。而球隊亦好好實行蘇帥嘅戰術安排，此陣亦為球隊取得多場勝利。
另一方面，如果細心留意，蘇帥在定位球方面亦都下咗唔少功夫。處理角球及自由球時，不時會見到兩名中堅同時出現係禁區爭頂。依個亦都係費SIR嘅進攻套路之一。當年嘅費迪南及維迪就曾為曼聯攻入多個關鍵入球。處理自由球及角球很多時候並非搵第一個落點或近柱位置嘅球員，近柱讓多個攻擊手爭頂，混亂對方視線，從而讓出空間俾從後插上嘅球員，作掙頂嘅目標。盧卡古對陣水晶宮時禁區內攻入嘅第二個入球就是最好例子。對陣利記嗰場史摩寧就差啲攻入咁嘅入球。在多名球員受傷下，蘇帥敢於嘗試變陣，而唔係單單對位換人。作為曼聯球員，蘇帥清楚知道無可能只靠一套戰術打天下，因此需要適時試陣，多幾個PLAN B或PLAN C以備不時之需。

第四，正能量輸出。
即使曼聯面對逆境，蘇帥都會俾很多鼓勵班球員。即使係目前嘅傷兵潮，佢都冇抱怨，而係鼓勵班青訓球員把握機會。
第五，曼聯精神及傳統。
只有曼聯人知道曼聯嘅精神及傳統。就曼聯對利記來講，蘇帥明白兩隊之間嘅恩怨情仇，賽後亦不忘諷刺對方，同費SIR一樣，絕對唔會俾仇敵有太多嘅落台階。

就依十幾場賽事，我們真係睇到太多太多費SIR嘅影子。佢在費SIR身上學滿師，實力冇十足都有八成，如果融會貫通，再加上自己的足球理念，相信在未來前途無可限量。蘇帥已經用行動征服一眾魔迷，曼聯人帶領曼聯，魔迷絕對心悅誠服。希望週末對陣修咸頓之後，有好消息宣布啦。