【英超巿場】倫敦球會動作多 富咸慘淪特價區

空門赦失 於 08/06/2019 發表 收藏文章
英超夏季轉會窗開始至今,巿場交易尚未算頻繁。不過一眾倫敦球會已經動作多多。

早前向森多利亞追求Dennis Praet及Joachim Anderson失敗嘅阿仙奴,據報已經放棄今次收購,並且將目標轉移到其他位置。西班牙報章報道,兵工廠已經接近完成簽入比利時前鋒卡拉斯高 (Yannick Carrasco),呢位中超球王早前曾公開放話希望大連一方可以放人,畀佢可以重回高水平比賽。

上季大撒金錢嘅富咸來季跌落英冠,隊中一眾球星亦樹倒猢猻散。當中最搶手嘅分別係前鋒米祖域(Aleksandar Mitrovic )同快翼施斯隆 (Ryan Sessegnon)。 富咸為米祖域標價3千萬鎊,據報愛華頓、修咸頓、韋斯咸都熱烈追求呢位24歲嘅塞爾維亞射手。另一邊廂,施斯隆去意已決, 拒絕球會嘅續約報價,並且表明希望可以轉投熱刺。富咸希望呢位19歲嘅英人能夠以4500萬鎊出售,不過出名孤寒嘅熱刺就無意付出超過2500萬鎊;值得一提嘅係曼聯同巴黎聖日耳門亦有意加入競投。

破紀錄一整季都忍手無買人嘅熱刺終於「破戒」購入15歲挪威門將Isak Solberg以及17歲英人前鋒Kion Etete。除咗前面提到嘅施斯隆外,熱刺亦爭奪緊尼當比利(Tanguy Ndombele)、費南迪斯(Bruno Fernandes)及達斯拿(Julian Draxler)。當中據報費南迪斯嘅經理人已經飛抵倫敦進行最後階段嘅洽談,而早前盛傳嘅盧施素(Giovani Lo Celso)以及泰利文斯(Youri Tielemans)據說已經被拒絕。而熱刺原先有興趣嘅愛華頓左閘迪尼(Lucas Digne)亦因拖肥開價要求丹尼路斯(Danny Rose)外加轉會費而被嚇退。


韋斯咸分別從愛斯賓奴及米禾爾簽入守門員Roberto 及 David Martin。面對喺搶奪高美斯(André Gomes)中嘅落後,據報鎚仔幫有意轉移目標至紐卡素中場舒維(Jonjo Shelvey)同希頓(Isaac Hayton)。除咗米祖域外,其他傳聞競投嘅目標仲有朗當(Soloman Rondon)、古亞達度(Juan Cuadrado)、伊巴中場Joan Jordan 以及費倫巴治左閘 Hasan Ali Kaldirim。

水晶宮基本上已經確定沙夏(Wilfred Zaha)及雲比沙加(Aaron Wan Bissaka) 將會離隊。據英媒報道,球會再次向韋斯咸翼鋒安東尼奧(Michael Antonio)伸手,作為沙夏嘅代替品。據消息指,水晶宮正分別向賓福特洽購前場孖寶Ollie Watkins、Neal Maupay ;亦有報道向荷甲球會精英隊問價Jerdy Schouten、以及追購阿爾克馬爾左衛Thomas Ouwejan。

失去夏薩特嘅車路士雖然今個轉會窗被禁止買人,但球會昨日發新聞稿表示已經再就禁令入紙作出上訴。沙利早前坦言,無論裁決結果如何都相信球會來季戰力大減,未能進入爭標之列。

如果喜歡我們的文章,請即分享到︰

標籤: 英超  PL  轉會新聞  阿仙奴  水晶宮  熱刺  車路士  富咸  韋斯咸  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→