球壇隔世仇人─尼恩高蘭與祖雲達斯


細數當今球壇,講到最(反對祖雲達斯 Anti-Juve)嘅球員,最出位必然係尼恩高蘭(Radja Nainggolan)。佢對祖雲達斯嘅厭惡一直都不是秘密。正所謂「用怨恨才同仇敵愾」,呢一點絕對令眾國米球迷欣賞。國際米蘭早前以約2400萬歐元加兩名球員(辛頓及辛尼奧路)羅致尼恩高蘭,一嚟到就得到球迷熱烈歡迎。能夠一場都未踢就已經奪取咁多藍黑球迷嘅心,除咗實力之外,佢對祖雲達斯嘅態度都係關鍵。


尼恩高蘭討厭祖雲達斯嘅意識早於2010-14年效力卡利亞里時萌生。2017年2月,羅馬同祖雲達斯為冠軍寶座鬥得如火如荼,尼恩高蘭公開談論佢對祖雲達斯嘅感覺,「我一直都好討厭祖雲達斯。就喺卡利亞里果陣時,每當作客祖記我都會付出咗我嘅全部,而我哋只能夠打和,而當陣時佢哋喺卡利亞里主場捧走意甲冠軍。我好憎佢哋,因為佢哋經常靠十二碼同罰球取勝。」競技場上與祖雲達斯嘅敵對,慢慢成為咗佢嘅標誌。

圖:Goal.com

2016年,自己嘅舊隊友及好朋友比真歷(Miralem Pjanic)加盟祖雲達斯,尼恩高蘭受訪時表示不屑,「我同比真歷與及佢屋企人嘅關係都好好,佢話我知佢近況很好,依加喺一隊『長勝之師』到踢波。但對我嚟講,去一隊奪冠實屬平常嘅球隊踢波實在太無癮。我反而想做主角,帶領羅馬擊敗祖記奪冠會係雙重滿足。我就係一個有果句講果句嘅人。」
同時佢亦都講到加盟羅馬其中一個原因係為咗贏祖記,就喺上季季尾,佢坦言唔希望拿玻里取得意甲冠軍,事關佢想自己係終止祖雲達斯皇朝嘅人。可惜事與願違,羅馬未能夠打破祖雲達斯壟斷。

尼恩高蘭ig動態截圖

故事當然未完。講到佢對祖記嘅衝突,無可能唔提2017年歐軍決賽後,尼恩高蘭呢一吓直線抽擊。祖雲達斯決賽以 1-4 輸咗比皇家馬德里。尼恩高蘭隨即拍咗條片上Instagram諷刺祖記球迷,「真係一個美好的傍晚。現在我已經回到國家隊受訓,而有啲人正在度假,有啲人去咗卡迪夫(決賽場地)一日遊。」
尼恩高蘭又直言呢條片係回應一啲祖迷對佢嘅辱罵,「我真係想睇吓呢一班人會唔會對我講同一番說話。三日前你哋唔係好囂張咩,依加有咩好講?」

圖:IFTV

除咗言語衝突,行為上亦都可以睇到一啲眉目。2017年8月,羅馬喺波士頓一間大學訓練,有一班球迷喺到等候一眾羅馬球星。在場嘅尼恩高蘭為呢班球迷逐一簽名同合照。一路簽一路影,去到一個球迷著住祖雲達斯波衫,佢即時停手,並拒絕幫佢簽名。該名球迷表示佢只係鍾意足球,希望同樣取得簽名,而尼恩高蘭就回應,「你鍾意足球但係揀錯隊,祖雲達斯依加喺第二間大學。」
球迷續指「成隊都幫我簽咗名啦喎」,尼恩高蘭果斷回答「但我唔同,我唔會簽。」然之後繼續幫其他人簽名合照,唯獨呢一位著住祖記波衫嘅球迷就得個望字啦,對話全程被拍攝下來,引來一時熱話。

圖:Squawka

著名國際米蘭球迷、律師及前體育總監Peppino Prisco有一句名言,「If I shake the hand of a Milan supporter I wash my hands, if I shake the hand of a Juventus supporter I count my fingers」呢一句格言充分反映出國米球迷與祖記球迷之間嘅敵意,時至今日,意大利國家打吡嘅火藥味都未曾褪色。對祖雲達斯嘅態度,尼恩高蘭同國米可以話惺惺相惜,一拍即合。加盟國米,為下年度嘅國家打吡加添咗戲劇性。一向直腸直肚嘅尼恩高蘭,嚟到呢一間祖記死敵,唔知道佢會唔會延續呢一種「精神」,繼續製造新聞呢?真係花生價格直線上升,拭目以待。

資料來源:Squawka、Sky Sport、Inter、Goal.com、IFTV

會員投稿:古亞連生活頻道 Guarin Life Channel
《此文章僅代表作者本人意見,不代表本會立場》

讚好國際米蘭香港官方球迷會專頁:
https://www.facebook.com/InterclubHK/posts/
意大利球會國際米蘭認可的官方球迷會
另外本會亦會定期舉辦球迷活動、踢球

留言


請按此登錄後留言。未成為會員? 立即註冊
    快捷鍵:←
    快捷鍵:→