你最想邊個睇你踢波﹖

踢開波嘅咁多位，相信喺你哋心目中，總有一個人，你好想佢會嚟睇你踢波，你心目中係邊個﹖初戀情人﹖囡囡（講緊你個小朋友呀）﹖老婆﹖

洛迪高嘅，係爸爸。

記得細細個老豆成日提馬圖斯，肥馬，不過佢個仔最後唔係踢中場…最後做咗龍門…

不過我知道無論我踢咩位，忙於搵食嘅佢，都唔會有時間嚟睇我踢波…
我都從來無扭計，或者特登迫佢嚟睇，因為自己唔勁，一係做後備，一係正選出醜。
到大個咗，覺得自己有番咁上下實力，有一次代表球隊踢比賽，諗住自己做硬正選，加上佢開工地方好近球場，就叫佢開工前嚟睇下，結果…我又係坐足成場後備，佢有無坐足成場﹖無，因為我叫佢走先。

之後一直都係無時間或者夾唔到睇比賽，但我真係好想佢睇下我踢波，話佢知你個仔唔係馬圖斯或肥馬，都睇得過下嘛…

「如孩兒能伏於爸爸的肩膊 誰要下車」
Sorry，佢從來無用單車車過我，亦無同我踢波，所以，睇，已經好滿足。
呀老豆，我唔只想同你一齊睇英超意甲，仲想你睇我踢波呀…