【驚世大預言】 UEFA早已預備‧抽籤不信運氣 精選 推薦

無論分組賽定淘汰賽，歐聯成日都俾人話抽簽要造馬黎確保收視。
尋晚踢完歐聯8強次回合 ， 4強名額分別由英超球隊曼城、德甲球隊拜仁慕尼黑、西甲馬德里雙雄：馬德里體育會同皇家馬德里取得。
但係到底會係邊隊對邊隊都仲未知。所以，今次「世界波」為各位黎次【驚世大預言】幫歐足協諗定點抽先係最爆，最有話題同最「吸睛」！

最爆，最有話題，最「吸睛」嘅4強：

馬德里體育會 vs 皇家馬德里
曼城 vs 拜仁慕尼黑

馬德里體育會 vs 皇家馬德里
西甲內訌嚟講，講收視、講talking point同講爭議，皇馬對巴塞之後就一定係馬德里打吡！近嚟馬體會格食格，戰績一路食住皇馬，連排名都騎住死敵，叫呢隊歐冠十冠大軍情何以堪？

以歐聯對碰嚟講，兩隊最經典莫非前年兩隊會師決賽，馬體會千辛萬苦頂到補時頂唔順畀拉莫斯追和繼而畀皇馬反勝，今次氣勢會先輸一截，定係誓要復仇？洛迪高夠膽講馬體會喺施蒙尼治下夠晒鐵血，佢上次決賽完場直頭同皇馬華拉尼嘈過，今次一定叫子弟兵同皇馬死過，今次對碰一定將士用兵逢波必爭，一定要搶贏皇馬呢班太子爺。何況馬體會連巴塞KO埋，仲點會怕皇馬？

至於皇馬驚險出線，C朗居功至偉，但偏偏今年對馬體會一球都無入過，畀人笑到而都黃，不過呢排佢相當爭氣，對巴塞入波之餘仲一手幫皇馬踢贏禾夫斯堡。鬥心極強嘅佢一定想入馬體會波證明自己，唔洗再畀人笑，淨係睇馬體會點樣對付C朗，同C朗點應付都已經好吸引（C朗fans固然想佢威威，反C朗嘅都想睇佢點衰嚟笑嘛）！
曼城 vs 拜仁慕尼黑

從來TVB最收得嘅劇集，除左爭家產爭寵爭權之外，都應該要數到大婆同二奶、正印同第三者、新人同舊人嘅正面對決。
曼城季中已經早早宣佈，來季會換上現任拜仁主帥哥迪奧拿執教。結果，比歷連尼領軍嘅曼城聯賽成績下滑，雖然未至於好似同市宿敵咁不濟，但已經無緣爭逐聯賽冠軍。
早早俾人飛，「正印」比歷連尼無講過咩唔好聽嘅說話。不過一班花生友就等住食花生。若然我係出名「公開公平公正」嘅Fifa高層，4強一定會係曼城火拼拜仁慕尼黑，咁列時就大把話題，例如：現任球員同來屆「老細」對決，阿古路會唔會盡全力收未來boss檔呢；當然，最重要有現任領隊同來屆領隊對決，哥迪奧智自然想好黎好去，留低歐聯冠軍先走夠哂瀟灑，不過比歷連尼無啦啦「帶綠帽」式被辭職，相信攞唔攞冠軍係其次，但打低哥帥就應該係頭等大事喇！

歐洲賽抽籤話題對決

2016年歐霸杯8強：
多蒙特vs利物浦：又係新舊主帥對決，淨係「高普倒戈西法倫球場」、「高普異地再唱YNWA」嘅標題都已經夠哂吸睛

2016年歐聯分組賽A、B、G組：
巴黎聖日耳門vs馬模：又係倒戈，今次係A組「呂布」伊巴謙莫域回歸對母會馬模、B組迪比返去成名地PSV燕豪芬、G組摩佬掉轉槍頭鬥波圖

2016年歐聯分組賽F組：
阿仙奴對上兩季都係16強被拜仁淘汰，領隊雲加自然唔想「連中三元」：「我們不想遇上拜仁慕尼黑，而我想他們也不希望碰上我們。己隊從沒有抽過好籤，而我不認為很多球隊想鬥皇家馬德里。」點知枝籤可能識讀心術，今次唔駛等16強，分組賽就對正拜仁。