其實，曼聯需要馬傑爾 精選

法國年輕前鋒馬傑爾日前以天價加盟曼聯，先勿論佢值唔值，洛迪高諗諗下，其實曼聯都真係需要佢嚟增強實力，從能力上亦搵啱人！起碼佢可以提供前線嘅修正空間畀領隊雲戈爾。

將朗尼移回輔鋒位置
雲戈爾重用朗尼，大家有眼見。除咗任命佢做隊長，亦如朗尼所願將佢移回鋒線，但可惜近來表現令人失望，僅喺對布魯日一戰連中三元，其餘時間顆粒無收。
雲戈爾最近講過，需要一個識得入波嘅輔鋒，咁樣喺朗尼同馬傑爾之間選擇下，朗尼踢番輔鋒可能性相當大！優點：
1. 馬傑爾速度快，亦可以拉開兩邊接應隊友傳送或拉扯防線，咁就可以發揮朗尼後上能力。
2. 朗尼背面護球能力差，出任10號位可長時間正對門將，方便朗尼活動及射門。
3. 朗尼踢法勤力，出任輔鋒可以喺前線壓迫之餘，更可以回防。
4. 雲戈爾強調控球，馬傑爾速度快，可以為曼聯加入新版斧：防守反擊。（其實呢個係以前曼聯最出名嘅戰術…）
缺點：
1. 朗尼作為輔鋒，創造力唔夠高，傳球滲透性唔夠，亦欠缺致命一傳能力，因此佢多數只會分邊或回後，令進攻變得迂迴。
2. 朗尼近年技術退化，往往連簡單控球或one touch都做唔好，容易失去控球權。3. 朗尼身體開始退化，早年傷患影響爆發力，年輕時的重炮已甚少重現，放在輔鋒難以突然殺入對方腹地，亦欠缺以遠射打破防守缺口。
4. 馬傑爾年紀尚輕，踢法幼嫩，加上初涉英超，隨時未能應付戰術需要。
5. 馬傑爾身形較單薄，喺身體碰撞嘅英超好輸蝕，要背向龍門拎位控球更係一大考驗。

馬傑爾必要時可以拉邊，為輔鋒朗尼騰出空間

馬傑爾同時可以喺中路搵食，反擊戰中更可以充分利用自己速度入波。

朗尼續任前鋒，馬傑爾任輔鋒
曼聯之所以棄小豆，而購入馬傑爾，相信其中一個原因在於速度。馬傑爾速度快，能夠成為朗尼在鋒線上的拍檔。優點：
1. 馬傑爾速度快，能夠輕易突入禁區，並利用本身射術取得入球。
2. 馬傑爾可以拉邊，為中場製造空間，畀好似靴里拉同費蘭尼等後上較強嘅中場殺入禁區。
3. 英超身體碰撞多，先任輔鋒可以等馬傑爾慢慢適應。
缺點：
1. 朗尼走位欠奉，難以配合馬傑爾走動，隨時塞喺中路。
2. 朗尼持球能力每況越下，或未能為馬傑爾製造到空間。
3. 作為輔鋒，馬傑爾有小範圍，但傳送未夠火候，畢竟佢喺法甲一直喺終結者。

馬傑爾回後拎波發動進攻嘅能力，似乎喺反擊中較為明顯。打陣地戰嘅時候仲可唔可以做到，有待檢驗。

輪換陣容
馬傑爾始終年輕，加上初到貴境，雲戈爾慢慢用佢都唔出奇。既然佢有速度，隨時可以作為右翼或左翼輪換，等佢可以發揮速度同慢慢適應。
優點：
1. 速度快喺邊線永遠係皇道
2. 小範圍技術好，可以擺脫貼身防守再出波或入楔射門。
缺點：
1. 喺邊路作用較單一，略嫌浪費馬傑爾其他優點。
2. 馬傑爾出波能力存疑

當然，曼聯球會上上下下球迷當然會畀時間佢，但佢亦要好好適應新聯賽同高身價嘅壓力。畢竟身價咁高，其他球會球迷見一場半場踢唔好，自然會恥笑佢同曼聯，英國傳媒抽水亦唔係人咁品…
============================================

歡迎大家上黎世界波一齊講下波，風花雪月一番
你嘅LIKE係我地嘅原動力
https://www.facebook.com/hereisworldball