星期六進行嘅阿仙奴對諾域治，兩軍同屬榜尾分子，水兵鬥海軍之下，阿仙奴以1:0小勝，終結聯賽開季三場不勝兼零入球尷尬戰績，但以對手實力嚟睇，今場勝仗絕對稱唔上帶嚟復甦嘅希望，只係稍稍緩解球會上下所承受嘅壓力，要見到球隊表現有起色，似乎仲要一段時間嘅等待。對於今場波嘅觀感，小弟逐個位講兩句：
星期六進行嘅阿仙奴對諾域治，兩軍同屬榜尾分子，水兵鬥海軍之下，阿仙奴以1:0小勝，終結聯賽開季三場不勝兼零入球尷尬戰績，但以對手實力嚟睇，今場勝仗絕對稱唔上帶嚟復甦嘅希望，只係稍稍緩解球會上下所承受嘅壓力，要見到球隊表現有起色，似乎仲要一段時間嘅等待。對於今場波嘅觀感，小弟逐個位講兩句：
門將
藍斯度首次於英超為阿仙奴把關，表現稱職，同時受到考驗不大，畢竟對手全場只有一次射門中目標……相信今場波藍斯度最令球迷印象深刻，係佢喺小禁區淡定扭過普基嘅一幕，似乎印證咗坊間報道話阿迪達同伊度睇中佢腳下用波能力嘅講法。不過，小弟向來唔係呢類動作嘅fans。個人認為，門將有呢個能力固然喺應對壓逼時多一條「出路」，但呢個只係「救生索」，如果球員們將呢個「出路」（門將扭波）列為恆常可以考慮嘅選擇之一時（即平時後場猜傳時慣常expect門將可以扭過對方），反過來就會置自己於險地，正所謂「上得山多終於虎」嘛。
簡單嚟講，當門將要喺自己小禁區入面扭過對手take risk時，其實已經過咗火位。係，嗰吓係精彩，但賽後必須檢討當時後衛回傳嘅位置、傳送選擇，點解會需要用到呢一招？有冇可能避免？
至於傳說中嘅傳控能力，需要進一步觀察，諾域治嘅前場逼搶壓力唔算大，但藍斯度今場作出25次傳送，準繩度係80%，可以對比一下艾利臣同艾達臣場均傳送成功率係超過86%，再考慮埋今場對手水平……睇多幾場先講。另外，今場對於藍斯度嘅高空波處理未有考驗，呢一點喺下一場對般尼將會成為關鍵。
後防
今場中堅由賓韋治及加比爾拍檔，呢個係坊間估計今季阿仙奴Full Team情況下嘅中堅之選，整體而言兩人今仗勉強算係互補不足，但不乏驚險場面，未來發展相當令人擔心。先講感覺正面嘅場面，今場有一次普基拎波轉身，賓韋治同加比爾齊齊「閂閘」，呢個係小弟expect正常雙中堅要做得到嘅嘢，但喺阿仙奴身上比較少見到。
加比爾其實整體防守能力唔錯，亦都有力採取主動防守，但同時繼承球隊傳統，係會突然間短路嘅，今場表現尚算唔錯，不過呢方面未來一定要加強，因為稍後會講到嘅原因，其實佢嘅壓力將會相當大。
賓韋治就係個原因，個人認為賓韋治防守真係好唔掂，其實加盟只係兩次上陣，已經多次睇到佢離奇「漏波」、讓人過，唔知佢嘅意識出現咗咩問題，今場同樣有呢啲場面，情況大約就好似諾域治官方精華第5分48秒咁，諾域治左路傳中，賓韋治喺前點係完全冇意識示圖出腳，而係「航吓航吓」，橫移讓個波過，當然呢球佢未必反應得切，唔係怪佢呢一球，但講緊嘅係佢嘅意識，一而再再而三，大家可以留意返開季第一場，同埋未來嘅比賽，佢係有慣性「航吓航吓」讓人讓波過，真係好恐怖。
（https://www.youtube.com/watch?v=-v_2wOSdcWo&t=337s）
有冇人可以想像一個中堅，呢一球可以俾個波過，然後轉身睇波？呢下係靠加比爾封到。類似嘅畫面將會陸續有嚟，加比爾加油！
都未講高空波問題，由開季第一場，賓韋治嘅高空波已經係被強姦，今場亦都有一球係佢近門頂輸，好彩對手頂波僅僅高出，下一場面對般尼，對手一定睇住嚟食。
兩閘方面，泰亞尼表現如常，唔多講；富安健洋首次上陣，表現可人，由於富安健洋喺意甲都係打中堅比較多，本來對佢側擊能力都冇太大期望，反而佢有一下後上窩利補射十分近磅，有驚喜。防守方面，富安健洋嘅防守意識令我比較放心，位置感、頭槌都相當好，速度亦不見得輸蝕，相信佢會穩佔正選一席。
中場
今仗以盧干卡及美倫賴奧斯正選登場，前面加上奧迪加特，組合十分年輕。Sambi與AMN靠活力及覆蓋率助攻助守，係最近沙加停賽及Partey未fit之下嘅唯一選擇。
唯一想講嘅係AMN，終於恨到踢中場中嘅機會，佢確實係十分勤力嘅一位球員，靠身體質素可以幫到球隊，如果我係領隊一定會留一個位俾佢，但有留意佢出道以嚟喺場內嘅表現，同喺場外嘅言論，就會發現AMN係一位自信心相當強嘅球員，而且唔係一般強，佢嘅自信心係超出佢嘅能力，難聽啲講係自視過高，呢樣嘢其實係不利於佢。千祈唔好因為反阿迪達就將佢捧上天。球場外，佢曾經抱怨要踢閘位； 球場內，大家可以留意佢經常做出令人費解嘅決定，例如嘗試一個扭幾個，或嘗試俾好靚嘅直線，最終統統失敗，變成面對面交俾對手，今場同樣有呢啲畫面。 睇咗佢幾年，就知佢覺得自己好好波。其實佢做返啲簡單嘢，利用身體質素同勤力，做吓萬金油，我係相當支持佢嘅，希望佢性格變得成熟，認清自己擅長同唔擅長嘅嘢，未來會更好。
奧迪加特今場稱職但唔算出色，傳控keep住水準，亦有一腳精彩吊傳俾奧巴美揚，可惜隊長射門被告爾撲到。球員自身嚟講，去到禁區嘅反應唔夠快，最後一腳（傳送或射門）嘅處理及決定仍需提升。另一方面，未見到隊友點樣去因應奧迪加迪嘅踢法特點及能力去配合，即係點樣走位、傳接配合，去方便奧迪加特俾波等等。奧迪加特上季中途已外借加盟，直到如今已不能以磨合適應作藉口，呢方面顯然係阿迪達嘅責任。
前線
奧巴美揚之前喺盃賽起機，並未令佢擺脫低迷嘅表現。個人感覺佢喺好多方面狀態都有改善，例如步頭輕返，但衡量佢嘅標準始終係把握能力，今仗多次起腳都無功而還，最後都只係憑0碼執雞先入到波，究竟兩年前嘅奧巴美揚去咗邊？
另一點係，奧巴美揚作為正箭頭始終欠缺帶動其他攻擊球員嘅作用，呢點喺現今足球中尤其重要；反而拿卡錫迪就係陣中唯一有能力做支點策應嘅前鋒。唔係認叻，呢點小弟早喺奧巴美揚如日中天，拿卡錫迪俾人屌到飛起嘅時候已經講，如果兩個揀一個，一定係出拿卡，當時坊間球迷留言講甚麼「擺奧巴踢邊係錯」，完全係bullshit。當然，我亦明白一個正箭頭做再多嘅嘢都好，如果唔識入波，同樣要面對批評，呢點拿卡錫迪的確係輸蝕，正如費明奴一樣俾人屌到化，但問題係阿仙奴由基奧特離隊開始，陣中再冇一個人擁有背身停球策應能力，拿卡身高雖然不足以擔任柱躉式中鋒，但佢背身能力相當強，加上有壓低重心轉身嘅能力，令佢喺成隊波嘅進攻運轉上不可或缺（簡單嚟講就係用個屎忽得位嗰吓，之前耶耶托尼撰文提出屁股嘅重要性，好多人覺得好好笑，其實係認真！）。奧巴美揚除非能夠不斷將「非chance」變成入球，否則絕對不能取代拿卡錫迪持續幫助球隊整體運轉嘅功效。
薩卡仔自開季後一直俾人感覺迷失，但似乎唔係因為喺歐國盃決賽射失12碼而影響心理，而係的的確確喺競技層面上進入樽頸，令人擔心。如果對一個恣力有目共睹嘅年輕球員嘅發展停滯視而不見，唔去諗辦法幫佢突破，教練喺度做緊乜呢？個人認為，其中一條可行之路，係還原基本步，搵返球員最突出嘅優點特性，叫佢專注做好一件事，俾簡單指示佢，先踢簡單波，因為薩卡近來俾人感覺係諗多咗，或者戰術上要做嘅嘢多咗，決定做慢咗（可能同下面總結帶出嘅問題有關）。
比比一如以往，腳法就有，射門九成九腳軟，同隊友配合亦都格格不入。唔知大家有冇試過，踢波或者籃球，總有一種人好波就好波，但你同佢做隊友嗰陣，永遠佢一拎波，你就唔知做乜好，佢自己拎住個波左搞右搞，作為隊友唔知佢想點，扭波唔係問題，問題係你唔知佢想點，唔知點同佢配合，比比正係呢種球員，好在佢唔係懶散嘅球員，講態度佢實在唔差，但呢個配合問題真係死症，一啲都冇改變過，唯一正面嘅地方係佢呢種不確定性，其實可以成為一個變數，戰況陷入僵局時不妨搵佢嚟做奇兵，但唔係恆常可以依賴嘅攻擊重心。
後備
路維：下半場入替之後，明顯幫助球隊提速。阿迪達需要思考一下點樣活用路維同奧迪加特。
柏堤：後備上陣，中場馬上有upgrade感覺，入球正正起始於Partey喺中場吸引防守再傳俾薩卡，喺Twitter俾瘋狂吹奏，希望儘早重拾狀態。
蘇亞利斯：最後階段入替，有一個關鍵封阻。
總結：
阿仙奴今仗終於取勝，結果上係令人鬆一口氣，但實際場面中，開季以嚟嘅問題其實完全未得到解決，只係靠人腳質素取勝，而且係僥倖取勝，難言收貨。其中一個最嚴重嘅問題係進攻組織，今場阿仙奴射門足足有30次，當中只有7次中目標，只有1球成為入球，拋開運氣唔講，一個人把握力低就係個人問題，但全隊把握力低又係咩問題呢？簡單嚟講，就係球隊進攻欠缺套路，冇form，小弟唔夠達Sir識波，睇唔出到底而家阿仙奴嘅基本進攻套路係咩。進攻套路包括每個球員喺咩情況下走咩位，有咩傳球選擇，用咩方法將個波送去射門位置。球場上當然不斷有突發事情，冇可能完全複製戰術演練嘅情況，但有form嘅球隊，球員大多數時間都係有清晰目標知道自己喺某個位置要做乜，簡單粗糙如兩翼出波套路，都可以見到中場想辦法將個波送到邊線，翼鋒拎波低頸就爆落底出波之類。如果冇form，即係球員往往唔係喺熟悉嘅地方，進行傳接、射門，同時要花更多時間去做決定，最終創造到具威脅攻勢，同有質素嘅埋門，自然更為困難。阿迪達上任之初嘅一段蜜月期，球隊嘅套路其實相對明顯得多，三中堅穩守行先，後場搵機會直接踢上左路中路之間俾奧巴美揚反擊，好唔好睇一回事，但曾經有效。後來阿迪達希望調整成主控踢法，但一直未能確立新套路，球隊處於漫長陣痛期，球會傾向Trust the process，似乎起碼有半季時間繼續等待，各位球迷繼續西波中互勉。
請按此登錄後留言。未成為會員? 立即註冊