傳杜曹將執教PSG!拜仁CEO路明尼加:「佢同我講已經同另一間球會簽咗約」

前多蒙特主帥杜曹 (Thomas Tuchel) 今季賦閒在家,佢嘅去向一直受到眾人關注。特別係德甲班霸拜仁慕尼黑今季臨陣易帥,請老帥希歷基斯 (Jupp Heynckes) 出山暫代主教練一職,來季主帥人選仍然未定。


杜曹一直被視為拜仁新帥熱門人選之一,直到早前德國傳媒報導,傳出佢已經拒絕拜仁邀請,有說佢即將取代雲加成為阿仙奴主帥,亦有說佢將會接手巴黎聖日耳門或車路士。


根據《Sky Sports》最新報導,拜仁慕尼黑CEO路明尼加 (Karl-Heinz Rummenigge) 親口透露,杜曹已經與另一間球會簽約:

「作為拜仁體育總監,沙歷咸美迪錫 (Hasan Salihamidzic) 已經接觸過唔少教練,而杜曹係其中個。

杜曹話佢已經簽咗另一間球會。

我哋希望,最遲可以喺4月底公布新任教練人選,不過我哋一啲都唔急。理想的話,我哋想請一位識講氏語嘅教練。」

根據法國傳媒《L'Equipe》報導,相信杜曹頗大機會加盟PSG。同時,亦有報導指PSG同時正接觸盛傳即將離隊嘅車路士領隊干地,一旦PSG簽下干地,杜曹就會加盟車路士。

Source: L'EquipeESPNSky SportsGoal

留言


請按此登錄後留言。未成為會員? 立即註冊
    快捷鍵:←
    快捷鍵:→