有得走好走!連尼加後巴塞首位英兵處子戰,球員墳墓兵工廠放生小將造福球壇

英超球會阿仙奴喺冬季轉會窗放出大批球員,包括山齊士、基奧特、禾確特、高基連等,但其實當中有一筆被忽視嘅交易甚具意義,就係英格蘭小將 Marcus McGuane 被賣到巴塞隆拿,而佢喺今日嘅加泰隆尼亞超級盃中,上演一隊處子戰,成為繼英格蘭名宿連尼加之後,第一位為巴塞上陣嘅英格蘭籍球員。


香港球迷成日話阿仙奴領隊雲加鍾意玩「幼齒」,即係培養年輕球員,有人就以為阿仙奴係青訓大戶,其實已經好耐冇由細到大踢阿仙奴嘅球員可以喺阿仙奴一隊立足,現時就只有韋舒亞一人。另外,能夠/曾經喺其他英超球隊立足嘅,有真係由細踢到大嘅般尼茅夫前鋒阿科比 (Benik Afobe,已被外借到狼隊) ,仲有13歲進入阿仙奴青訓系統嘅紐卡素防中希頓 (Isaac Hayden) 。


所謂「玩幼齒」不過係由其他球會買入16-21歲嘅「半製成品」,希望「加工」圖利,而其中一招就係由巴塞拉瑪西亞青訓營買入年輕球員,最令人熟悉嘅例子當然係前隊長法比加斯,仲有而家嘅右閘比爾連。其實仲有一啲未成功上位或者已被賣走嘅,例如Jon Toral同Julio Pleguezuelo。

今次呢位19歲防中 Marcus McGuane 由6歲就開始喺阿仙奴,同韋舒亞一樣真正留住阿仙奴嘅血。佢喺今季曾經為一隊出戰歐霸盃,估唔到一向習慣由巴塞買「幼齒」嘅阿仙奴會調返轉賣出呢一位年輕球員到巴塞B隊。巴塞為佢設下2,500萬歐元違約金。


喺西班牙時間周三,巴塞隆拿與愛斯賓奴上演加泰隆尼亞超級盃,巴塞大幅輪換,派出施利臣、阿歷斯維度、丹比利、安達高美斯、柏高艾卡沙等一隊球員,同時抽調一批B隊小將入大名單。下半場, Marcus McGuane 後備入替阿歷斯維度,成為繼英格蘭名宿連尼加之後,第一位為巴塞上陣嘅英格蘭籍球員。最終,雙方打成0-0平手,巴塞互射12碼贏4-2捧盃。


巴塞B隊主帥Gerard Lopez 早前曾經同《ESPN》講過對McGuane嘅睇法:「佢適應得好好,係一個好全面嘅球員。佢控球在腳時可能仲欠缺一點冷靜,不過佢已經擁有立足中場中路所需嘅其他一切條件。佢好勤力、空中對抗強、後上時機好。佢已經為球隊帶嚟好大幫助,我可以喺好多位置上用到佢,而且佢仲年輕,仲有好大進步空間。短期嚟講,佢已經贏得我嘅信心,希望佢之後會成為球隊重要一員。」


言歸正傳,阿仙奴近年可以話係球員墳墓,任何球員只要喺阿仙奴,輕則停滯不前,重則嚴重退步,更加唔使夫傷到踢唔到嗰啲。一個球員必然有佢優缺點,一個教練嘅功力體現於佢如何喺比賽中放大球員嘅優點,避開或改善球員嘅弱點,特別係一個擅長「玩幼齒」嘅教練。雲加出基奧特時唔斬波,用梅迪薩卡打高位防線,用沙加做單防中 (有機會另文再講) ,韋舒亞喺國家隊表現更上一層樓,比爾連不斷退步。可見雲加係會放大球員嘅缺點,避開球員嘅優點。

本來英格蘭人外流成功例子極少,但今次阿仙奴能夠「放生」英格蘭U19國腳 Marcus McGuane ,避免累人累物,實在係近年對英格蘭球壇最大貢獻。

loading


By 誠實阿迷

Source: SkySports

留言


請按此登錄後留言。未成為會員? 立即註冊
快捷鍵:←
快捷鍵:→