Come on James! 阿迷仲講緊尼奴同馬天尼斯?借利記左閘煩惱反思球迷討論風氣

筆者見到友欄 YNWA 一篇文章《迪森美卡斯or羅拔臣  高普樂見幸福的煩惱》,睇到呢個topic,即刻諗起如果有一日尼奴同馬天尼斯嘅情況發生喺羅拔臣同迪森美卡斯身上,人哋球會會點揀,人哋球迷會點睇……


大家都知道,阿仙奴之前放走門將馬天尼斯,留用尼奴,結果上季馬天尼斯表現備受讚賞,相反尼奴同阿仙奴一同沉淪,最近仲要用高價買藍斯度,真係令人啼笑皆非。本來上季已經不斷有阿仙奴球迷喺討論任何話題時,都扯上馬天尼斯,去批評球會同阿迪達,基本上各大阿仙奴球迷討論區都係俾呢個話題洗版,最近藍斯度更加係延續呢個話題,咁點解當初要放馬天尼斯先?


不過小弟想同大家講,即使到今日,我仍然唔覺得當初選擇尼奴先於馬天尼斯本身係錯嘅決定,問題係當時無論留邊一個,都應該要續長約,但冇做到,所以先會出現而家冇咗馬天尼斯,尼奴又準備想走嘅困境。至於英人問題,球會本身有大把時間處理呢個問題,同埋其他位一樣可以擺英人,而家為咗英人而高價買藍斯度,當然係失敗操作。

睇到呢度,不如平心靜氣聽我講經,長文冇人睇,而且好多人睇啲唔睇啲,以下將會盡量簡短同point form,主要係解釋我想法,同我對球迷討論風氣嘅睇法:

用返上面我話聯想到嘅例子,假設而家去到今季季尾,迪森美卡斯踢咗大半季好波,真係好好波,佢同高層講,如果下季要做返後備就寧願走,你係利記高層你會揀邊個?一個擺明係proven咗幾季,一個啱啱打起但又真係好波。

說服到迪森美卡斯打住後備先,固然係齊人之福,但如果佢企硬冇正選就走,我估大部分球會高層都會做最穩陣選擇,即係留羅拔臣。

當然,做生意嘅人有唔同性格,有人會take risk,或者趁羅拔臣有價賣咗佢,一樣唔出奇。
但重點係我冇可能話揀留羅拔臣棄迪森美卡斯係on9智障啩?

返返嚟馬天尼斯個case,記住當時係馬天尼斯打起咗,正值佢球員生涯最關鍵嘅時候,必然係趁機會搵正選機會,佢同球會講,如果冇正選就要走,正路,支持。

球會角度睇,尼奴年紀當打,喺利華古遜都係打開正選(為利華古遜上陣304場),馬天尼斯都係當打,但真正喺頂級聯賽球隊嘅比賽經驗唔多 (阿仙奴38場 + 基達菲6場 = 44場),外借都係去低組別,最後嗰季係好勁,對球會最好嘅情況係keep尼奴,馬天尼斯打盃賽輪換,但如果馬天尼斯一定要正選,咁球會唔會應承到佢,櫂衡輕重之下,最理性嘅選擇係用返尼奴。放走馬天尼斯係可惜,但都冇辦法。

如果尼奴老多幾年就唔同講法,例如26歲馬天尼斯同30歲尼奴只可以留一個,可能會揀馬天尼斯啦,正如古圖斯當年用同樣招數,走嘅係施治,好多人固然覺得車仔或古圖斯仆街啦,你可以話冇人情味,但喺球會做生意角度睇,理性係揀後生嗰個,因為古圖斯同樣早已證明自己實力,講緊唔係一季半季。尼奴同馬天尼斯年紀相若,表現勁起上嚟各有千秋,亦各有缺點,但尼奴優勢係喺頂級聯賽踢正選嘅時間長好多,而且係球會高價買返嚟,賣返出去唔到成本價,都係考慮因素。所以,我真係唔覺得有幾離譜,除非球會有預知能力。

利申返(以下含粗口):

阿仙奴啲高層真係唔死都冇用,近年啲轉會買賣9成9都係錯撚曬,我認同。

馬天尼斯,我都想佢留低。

留唔到馬天尼斯,仲要尼奴今年都想走,而家要俾高價買藍斯度,係on9,我認同。

上季馬天尼斯打得好過尼奴,我都dum曬春。

個問題係當時選擇用返尼奴做number 1,我覺得係合理,喺冇預知能力之下,返轉頭再揀,球會揀尼奴仍然係理性選擇,而揀馬天尼斯係屬於take risk。(當然,冇確保到尼奴係長期留效,就做呢個決定all in佢,係on9,呢樣我又認同喎)

不過如果馬天尼斯講到明要打正選,球會又俾唔到承諾佢,放佢出去第二間球會打正選,佢有好發展,我為佢高興。

佢打得好,我好開心,但啲球迷好心唔好咁幼稚,日撚日喺度講住,又神救喇,又點點點喇,佢一樣有派膠,嗰班人就唔出聲,成個怨婦咁,怨過怨婦利,何必呢。

呢間痴撚線公司有大把嘢值得屌,但都要以事論事,唔好咁痴線啦,例如隊長續約咁,嗰陣連續兩季都20球以上,點可能唔留佢?係,佢續完就成pat屎咁,但當時續約係理性,至於咩條件就另一回事啦。係,達Sir好差,但托利拉單嘢點可能入佢數?傷完一輪,艾馬利後期已經冇乜點用佢啦,去馬體會一樣踢唔返起,喪父之痛,又話思鄉,夾硬留佢都冇幸福,見到啲人仲話達Sir用艾蘭尼都唔用托利拉,痴少陣啦大佬……

講真,馬天尼斯呢單真係睇到好厭,讚佢我覺得OK,但唔需要踩到尼奴一文不值,不如講下請邊個教練救到隊波,幾時炒伊度好過啦!BTW,如果伊度同阿迪達要換一個先,我會揀伊度走先,最好一齊,高安基個仔暫時算係咁,但如果有得揀,Spotify個老細真係愛隊波,點都會好啲。

當然,可能有ching覺得羅拔臣已經係英超第一左閘,同迪森美卡斯名氣上,甚至實力上嘅差距大過尼奴同馬天尼斯,冇乜可比性,呢個批評我完全接受,以上例子只不過係我見到嘅時候有所聯想,非嚴謹比較。

(講開又講,自從舊年寫奧斯爾之後,相信有部分球迷會覺得我係阿仙奴藍絲,今次唔小心又唱咗反調,相信都冇得救,但我嘅立場喺批評球會管理方面同大家差唔多,對球會有極多不滿,睇我page名就知。

不過,我嘅堅持係屌要屌得有道理,唔好入錯數、做盲反、人云亦云。

唔係想話眾人皆醉我獨醒,只係小弟諗諗吓覺得,其實出嚟發表意見,個個copy & paste講同一樣嘅觀點,然後圍爐取暖,一有人講另一個意見就去圍插,其實有乜意思?最好梗係個個都有唔同意見講出嚟,先係有營養嘅交流。亦都唔係專登要與眾不同,而係長時間喺網上留意各位球迷有咩見解,逐一汲收,逐一反思,睇完又問吓自己同唔同意,咁先能夠做到理性討論。

當時寫奧斯爾,仲未知道佢連註冊都冇得註,我當然係絕對唔會認同奧斯爾連註冊嘅資格都冇,但篇文主要係講唔理佢場外有咩事,有冇得罪人,單從表現睇,我都覺得遲早要清走佢。

即使我認同佢係世界級,但因為佢表現一直都係非常唔穩定,我都唔會覺得球隊應該all in佢,圍繞佢而建立,但你唔圍住佢踢,佢又唔會有表現,最慘你就算你圍住佢踢,佢都係隔幾場先有表現,一有表現就識飛,一冇表現就隱形,咁我寧願搵一個唔識飛,但場場表現都OK嘅人喇,其實就係咁,呢個係我對奧斯爾場上表現嘅睇法,我知好多球迷唔認同,話踢都冇機會踢,批評唔公道。Sorry,雲加時期場場出佢,我已經有呢個諗法。當年已經有好多球迷話好似打少個咁,唔好忽然失憶啦!

政治表態我支持喎,但冇理由政治表態完就當佢球王,唔可以批評佢表現?表達意見還表達意見,好波還好波,好多嘢足球與政治的確係分唔開,但我只想講單論球場表現,其實批評聲音已經存在好多年,例如某channel阿袁生,做藝人嗰個呀,其實由奧斯爾加盟第一日已經話覺得佢係花瓶/奢侈品,講緊冇記錯係2014年。

一單還一單,真係好多人分唔清楚。例如雲加,帶俾阿仙奴咁多嘢,而家阿仙奴冇咗佢又成pat屎咁,當初大家係咪唔應該叫佢走?我又唔覺得,不敗還不敗,尊敬還尊敬,學英國球迷講but enough is enough,如果佢重奪足總盃就走,咪重好,有人覺得尊重佢一定要支持佢千秋萬世,大佬,20年前有幾威,唔代表今日你仲係最適合人選呀,而家嗰班唔掂,唔代表要搵返佢呀,不如放手俾大家留返多啲尊重嘅空間啦。又例如施蒙尼,我覺得佢喺馬體會入咗樽頸,係時候離開換吓環境,可能先會有進步,咁佢上季拎咗西甲冠軍,我一樣覺得佢應該走,仲好,食住個光環急流勇退,對大家都好,我評價佢喺馬體會到頂,但我又希望佢今季再拎,塞住我把口。批評佢唔代表我反佢,呢啲咪一單還一單。

其實關於球迷對於奧斯爾事件嘅講法,小弟仲有好多嘢唔認同,不過講得太複雜,盲撐班人都唔會睇,講嚟曬自己時間,反正佢哋覺得所有批評奧斯爾就係藍絲/小粉紅,講球場上表現都一樣,anyways~)

如果喜歡我們的文章,請即分享到︰

留言


請按此登錄後留言。未成為會員? 立即註冊
  • kklottery 於 02/10/2021 評論 NO. 1

    Leno上年仲有3年約,續長約你想指要續幾長?

快捷鍵:←
快捷鍵:→