BBC證實艾馬利將任阿仙奴新帥,阿迪達只差一點點

阿仙奴選帥進度一直令人擔心,由雲加宣布離隊至今已一個月,傳聞眾多,但未有清晰目標,似藥石亂投又毫無準備。直至最近一周,消息開始明確指出阿仙奴好大機會搵嚟前隊長阿迪達執教,但經過幾日後,《BBC》相信阿仙奴已經決定選擇啱啱離開巴黎聖日耳門嘅艾馬利 (Unai Emery) 為新領隊。


《BBC》記者David Ornstein公認為阿仙奴專家,佢今日撰文指出,阿仙奴管理層喺同所有候選人會面之後,一致同意由艾馬利出任領隊一職,預計會喺今個星期內稍後時間正式公布及舉行記者會。David Ornstein指其他候選人包括艾歷尼、安察洛堤、阿迪達、亨利及韋拉,阿迪達喺較早前一度成為最熱門人選。


艾馬利現年46歲,執教一隊生涯已達到12年,特別喺2013-16達領西維爾連奪三屆歐霸冠軍,其後執教PSG兩季,取得一個法甲冠軍及六個本土盃賽冠軍。

著名內幕消息人士 Agent Edward 指,本來阿仙奴與阿迪達幾乎達成共識,但後者要求得到更大轉會決策權,並且對於5,000萬鎊轉會資金感到不滿,令談判出現變數。



阿仙奴今季從多蒙特引入球探主管 Sven Mislintat 及從巴塞請來足球關係主管 Raul Sanllehi ,已埋下分權伏線,據悉阿仙奴選擇新帥條件之一,就係需要同意新嘅權力關係之下工作,對於轉會事務話事權較低。適逢離開PSG嘅艾馬利,表明願意接受分權及轉會費條件,令佢成為阿仙奴管理層心目中不二之選。


Source: BBCSky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Peelala
    Peelala 於 23/05/2018 評論 NO. 1

    戰術保守,駕馭大球星的能力一般,咁請阿迪達好過

快捷鍵:←
快捷鍵:→