點評:隱型三劍俠持續低迷,槍手罕見血性後防終挫剋星


今仗阿仙奴作客般尼,以一球險勝,連續兩場保持不失,雖然進攻球員表現一般,但中後場球員絕對值得一讚!今場波重點喺防線度,會花少啲篇幅講前線球員。如Too long didn't read,可以飛去最底睇總結。


藍斯度
8分
藍斯度今仗表現相當出色,應對般尼高空轟炸冇太大問題,俾到人信心,呢一點相信整條防線都感覺得到,佢嘅提場及與隊友嘅交流亦都令士氣提升,不過對手攻門只有3腳中目標(阿仙奴亦一樣!),角度唔算刁鑽,唔需要藍斯度表現身手。

富安健洋
8分
富安健洋同樣第2次為阿仙奴上陣,表現簡直令人喜出望外。論防守意識,富安健洋係全隊最好,以踢過中堅嘅經驗去踢右閘,有少少令人諗起當年蒙維爾嘅穩健,最令人印象深刻當然係同加比爾夾擊對手嗰一下攔截,夾到班尼斯攤攤腰。由意甲轉到英超,想必節奏上適應需時,所以富安健洋其實呢兩場嘅體能上其實有少少吃緊,今場首次踢足,有抽筋情況亦屬可以理解,同時更令球迷、隊友、領隊睇到佢嘅拼搏精神,難怪完場後阿迪達同奧巴美揚都走去恭喜富安健洋完成一場出色嘅比賽。仲有一點,今場睇到富安健洋有一兩次大轉向直接轉邊俾左路,相當精彩!

賓韋治
5分
講賓韋治之前,唔知大家記唔記得上季有一段時間傳過阿仙奴想買史東斯?然後多數球迷嘅反應都係話「吓唔好搞啦」。雖然小弟經常好似唱反調咁,但嗰次我都係覺得唔好搞,當時嘅史東斯係差到連好想買中堅嘅阿仙奴球迷都唔想要,而我一直都唔識欣賞史東斯。史東斯被標榜為「用波型中堅」,但其實一直都睇到佢用波嘅失誤,後果係直接導致失波,講防守能力,又唔見得強,喺我眼中佢防守直頭係不堪入目,而佢嘅selling point用波,我亦覺得不外如是。再加上,史東斯加盟曼城時嘅轉會費係超過5000萬鎊,呢個情況會唔會令你諗起賓韋治?當然,史東斯上季有飛躍進步,中後段重新取得哥迪奧拿信任,喺歐聯決賽都係踢正選啦,但我諗起一個可能性:球員其實本身未必會將自己定型做某一類球員,但高價轉會,傳媒會大吹特吹點解佢值呢個價呢?就係因為佢係用波型中堅囉!然後球員踢波嗰陣就會下意識想去fulfill呢個期望,「我係用波型中堅」,「我要猜波、扭波」,專登踢高章波,結果咪出事囉……

坦白講,賓韋治今仗防守上,我覺得勉強算合格,高波冇想像中咁蝕底,但仍然未俾到信心人,嗰吓回傳差啲害全家,咁嘅表現,其實仲不如賀定,如果要用波,其實踢過中場嘅張伯斯一樣得啦,賓韋治真係要反省一下。

加比爾
9分
個人認為今場加比爾踢出身價,如果要選MVP,會揀加比爾。今場守得住對面一對中鋒,加比爾有好大功勞,艾殊利班尼斯呢位大舊前鋒都蝦咗阿仙奴好耐,今場加比爾同富安健洋將佢守到發曬脾氣,真係出一口氣。佢仲要隨時準備幫賓韋治執漏,出嚟殺波冇問題,𢭃後包波冇問題,幫手猜幾腳波又冇問題,加上佢防守時野獸般嘅表現同心態,絕對係令人振奮。最記得上季加比爾有一次喺禁區頂封波,俾人省中「男人最痛」,佢一手揸住重要部位,即時忍痛彈起身再次防守,咁嘅球員好難唔愛!不過加比爾當然唔係完美,今場有留意到佢有情緒過激嘅時候,好彩柏堤過嚟叫佢冷靜,否則可能因為投訴過激而拎牌。由加盟到而家睇嚟,加比爾主要嘅問題在於穩定性同集中力,但仍然係阿仙奴防守要倚重嘅一員。

泰亞尼/迪恩尼
6.5分
泰亞尼今場其實比較靜局,一招爆底出波作用不大,喺三閘線同隊友配合亦都了無生氣,不過呢個唔單單係佢嘅問題,防守上做足本份,收貨。泰亞尼近兩場都踢唔足,似有少傷或抽筋而被換出,非常擔心佢近季被chur爆偈。慶幸泰華利斯後備上陣表現不俗,應考慮適時輪換。

柏堤
8分
Partey哥同樣係心目中MVP候選人之一,今場協助防守及組織都相當得當,每一場有呢個表現已經足夠,睇到有球迷留意到柏堤今仗展露領袖風範,會勸隊友冷靜,有衝突時涉入中間保護隊友,值得欣賞。不過有一點要挑剔,而且係幾重要,就係我方後場組織時,般尼前場壓逼戰術重點擺明就係雙前鋒遮線孤立柏堤,令後衛傳唔到波俾柏堤。不過柏堤面對呢個情況十分被動,冇任何嘗試去解決呢個問題,繼續被困,除咗柏堤,場邊嘅教練團亦應該要有反應去解決問題?

奧迪加特
7.5分
致勝罰球當然係精彩,奧迪加特整體嘅表現亦都好,喺同史密夫路維同時上陣嘅情況下,奧迪加特偏重於連接中場線與進攻球員嘅工作,恰如其分。

史密夫路維
6.5分
相比奧迪加特,ESR負責嘅係喺前場跑動同帶動其他進攻球員,呢點佢能夠完成一部分,比賽中個人獲得兩次射門機會,係源自佢出色嘅走位及配合,但把握力實在不濟,如果可以改善呢個問題,佢將會更上一層樓。整體而言,今仗頗靜。

尼高拉比比
6.5分
隊中突破力較強嘅一人,維持一貫評價:擅長單打獨鬥,同隊友配合唔好。唔係話佢性格問題,而係球風問題,隊友好難同佢夾,反而性格方面,比比係隊友寵兒,回防亦相當落力。其實有事比比換位到左路反而創造到機會,可以多試。

薩卡
6分
繼續低迷,薩卡今場同樣係唔知做緊乜,以往嘅個人突破睇唔到,經常塞死中間,要做劏直線嗰個,到底係唔係領隊指示?維持上一場評價:年輕球員迷失,領隊係唔係應該同球員坐低思考下佢最擅長嘅嘢係乜,然後專心做返一樣嘢?

奧巴美揚
6分
繼續死火,冇嘢好講,睇返上一篇即可。還我拿卡、還我馬天利尼!


後備
盧干卡、美倫賴奧斯及泰華利斯表現都對板,不過AMN嘅傳波同腳下功夫真係極其粗糙,同上一場都係嗰句,希望佢認清楚自己長短處,唔好嘗試踢高章波,如果中場齊腳的話,個人傾向AMN踢返閘位。

總結:
阿仙奴今仗表現一如分牌數字,魚生粥僅僅熟。般尼近年都係阿仙奴剋星,阿迪達更加係從未贏過般尼,今場波阿仙奴一如所料,不斷被般尼高空轟炸,睇到球迷膽戰心驚。筆者上一場批評球隊雖然贏波但進攻配合完全冇form,今仗睇落有少許改善,感覺前場球員有配合意識,但執行上仍難令人滿意,以致成功製造出攻勢,但又久缺具威脅埋門,因為最後一傳處理永遠都令人扼腕吐嘆息。得以全取三分,英雄其實係中後場球員,如果每場都有咁樣嘅表現(賓韋治除外),即使面對強隊都有力零封對手。

球員展現出應有鬥心,本來可喜,但以阿仙奴球會規模,要喺面對般尼時捱打靠後防球員將士用命捱得三分,卻又可悲……

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→