點解咁遲先醒?阿仙奴缺的是領袖——梅斯達菲爆槍手開會後三連勝:「我哋為彼此而戰」

阿仙奴成績不濟唔係今季先發生嘅事,但球隊2018年嘅頹勢比起輸 8-2 更令人失望,原因唔係輸咗幾多場、輸幾多球,而係喺比賽中展現出嘅軟弱無力、缺乏鬥心,對下游球隊都被打到毫無脾氣。曼城今季近乎無敵,輸俾佢哋係意料中事,但早前連續兩對曼城被宰,比賽中嘅表現係猶如大人同細路踢波,啱啱好標誌住球隊最近嘅頹勢去到頂點,相信唔少阿仙奴球迷一樣感到前所未有嘅絕望。原來唔淨止小弟,或者其他球迷,就連隊內人士同樣感受到前所未有嘅危機感。


阿仙奴中堅梅斯達菲最近接受訪問,透露球隊喺連續兩場輸俾曼城之後,召開「危機會議」 (未知係輸俾白禮頓之前定之後),所有人坐埋一齊希望解決問題,雖然佢都坦言明白一次會議唔能夠改變一切,但球隊心態似乎有所轉變,之後仲取得三連勝。

「所有人都知道呢個係艱難時期。嗰次會議係關於嘗試去聆聽唔同嘅意見、唔同想法同埋唔同嘅感受。我認為我哋搵到嘗試改變嘅方法。

事情唔係咁容易,因為一次會面唔會改變到好多嘢,尤其係喺球季中途、每三日就有一場比賽嘅時候,不過俾我哋去大聲講出我哋嘅睇法係好重要。

結論,係需要我哋俾出110%努力去走出低谷,我諗我哋之後都做得唔錯。

坦白講,今季對我哋自己嚟講係更加失望,因為我哋有更大嘅目標。一樣真正正面嘅事,係我哋可以由諸事不順同唔好嘅狀態之中回復過嚟,變得更加緊密同埋以一個團隊走返出嚟,咁樣係最有意義。

我喺歐洲踢過唔少球隊,呢啲球隊試過踢得好好,亦都試過有球隊踢得差,當你喺一支大球會入面,係特別難走出低谷嘅。你會發現自己無論面對任何對手,都要苦苦掙扎。

我認為球隊值得讚賞,因為我哋可以走埋一齊,還完基本步。每一個人都喺度為彼此而戰,嘗試重回勝軌。」 (來源: Daily Mail)



行事欠決斷、陣中缺領袖

的確,阿仙奴喺輸俾白禮頓之後,出人意表咁樣以兩回合計5-1擊敗近況出色嘅AC米蘭,晉身歐霸八強,聯賽亦大勝屈福特3-0,取得三連勝。不過小弟認為,咁樣反映出球隊嘅嚴重問題,就係行事欠決斷同埋缺乏領袖。

喺輸俾白禮頓之後,阿仙奴喺2018踢咗15場比賽,只得四勝,要去到呢個地步,球隊先醒覺要坐低傾下問題,會唔會太遲?領隊同陣中資歷較深嘅球員都難辭其咎。

另一方面,球隊一直缺乏領袖,已經係老掉牙嘅問題,球會隊長梅迪薩卡本來係最有領袖氣質嘅人選,佢當初喝鬧奧斯爾嘅場面大家都記得,球員喺訪問中都有提及梅迪薩卡係負責管理球員紀律同罰款,但敢言嘅佢其後曾經公開質疑球隊訓練唔夠賣力,被雲加公開駁斥,之後就冇再公開發表過太多關於球隊嘅意見,加上佢準備退役,上陣機會寥寥,影響力可能大不如前,但亦有傳佢喺聯賽盃決賽輸俾曼城之後就召開球員會議。副隊長、兼長期場上隊長哥斯尼喺陣中資歷深,但似乎比較內儉,並非壓場之人。


青訓產品韋舒亞滿足到陣中資歷深、有火,呢兩大條件,被視為未來隊長人選,今季亦試過戴上臂章,但佢仍需要保持健康,喺場上展現穩定表現先可以令所有隊友心服口服。老將施治係眾人中較有領袖氣質一人,足可壓場,但佢喺球隊唔耐,加上性格斯文,可能令佢唔會勇於表達意見。如果阿仙奴喺場上有一個領袖,適當時候喝醒球隊,其實好多場失利可以避免。不過心水清嘅阿迷可能留意到,當年一啲具領袖氣質嘅名宿,如阿當斯、韋拉等,同雲加關係都唔算好,甚至已經鬧翻,阿仙奴缺乏領袖之謎,已經昭然若揭。


不過點都好,如果球員能夠喺危機之中反省不足之處,真正團結一致成為一個整體,為球會而戰,點都係好事,作為球迷,咁樣比起迴光反照式大勝一場,更加令人安慰……只係想指出,如果隊中有一位令全體心服口服、有火嘅領袖,呢個過程會嚟得更快。球隊即將喺英超面對護級分子史篤城,係咪真係做到團結一致,到時就知!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→