【遺憾的勵志故事】相隔701日,消失的「贊師父」終再為阿仙奴上陣

贊堅遜喺近一兩星期之前,無疑已經幾乎可以列入「失蹤人口」,忠實阿仙奴球迷當然知道佢過去幾年曾經兩度外借,但見到已經同球隊陣容漸行漸遠嘅佢,上一輪歐霸分組賽入選後備名單,仍然令不少槍迷驚訝兼感嘆時光飛逝,再次記起呢位「勵志故事」主角。啱啱完成一場英格蘭聯賽盃16強,阿仙奴主場對黑池,贊堅遜更獲得正選機會,踢足90分鐘。


贊堅遜嘅經歷,令佢可以成為難得一位表現未達標準但仍得到尊重嘅球員,至少喺好多阿仙奴球迷口中,對佢即使批評都會留一點餘地。原因要由佢嘅「勵志故事」說起。贊堅遜出道於查爾頓青年軍,但僅僅升上一隊為身處英甲嘅查爾頓上陣8場聯賽,就越級加盟阿仙奴 (2011-12),據報轉會費大約100萬鎊。該季亦係「8:2」發生嘅球季,贊堅遜喺兵工廠傷兵如潮之下經常得到上陣機會。


老實講,作為本身只係啱啱踢英甲嘅年輕球員,贊堅遜絕對並非天才,甚至比起現時隊中嘅賀定、張伯斯等英格蘭年輕球員受到嘅質疑更多。不過或者係贊堅遜嘅性格同背景,令佢得到雲加嘅欣賞。贊堅遜加盟阿仙奴之後,喺酋長球場外購買一塊紀念階磚,刻上 "Granddad, Hope you're proud —— Carl Jenkinson" ,原來佢一家由祖父開始,到父親同佢自己都係忠實阿仙奴球迷,但佢已經過世嘅爺爺大概無法想像,孫兒終有一日會披起愛隊阿仙奴嘅球衣,可惜爺爺已經睇唔到呢一日,希望爺爺會為佢而感到驕傲,呢個故事足以令人流淚。贊堅遜對球隊嘅愛係有目共睹,另一方面,佢亦俾人好努力將勤補拙嘅感覺,贏得不少尊重。

(贊堅遜獻俾爺爺嘅紀念階磚)

(贊堅遜與同為槍迷嘅爸爸慶祝)

當然,「贊師父」實力上始終未合乎阿仙奴正選右閘標準,佢喺2016-17歸隊再次為阿仙奴上陣 (2015-16外借到韋斯咸) 時,表現不進反退,雲加曾言,認為贊堅遜信心不足,心理狀態上不宜為球隊披甲。的確,「贊師父」內斂沉實嘅性格係優點,但同時佢抗壓能力不足,俾人心理脆弱嘅感覺,亦係事實,往往未能迅速從低潮中清醒過來,呢一點阿仙奴陣中做得最好嘅要數左閘蒙維爾,現時表現穩健嘅蒙維爾都曾經有表現不濟嘅時候,但佢每一次都可以迅速反彈,基本上每一位後衛都會犯錯,但心理質素通常都係級數嘅分野。

(今日球迷想必難以想像贊堅遜曾得到英格蘭大國腳徵召)

2017-18球季,「贊師父」被外借到英冠伯明翰,但因重傷缺陣長達24場,加上佢喺2015-16球季亦經歷重傷,大大阻礙佢發展,似乎佢已經無可能再留喺阿仙奴,勵志故事未能圓滿。有一種論調雖然殘酷,但言之有理:如果話「贊師父」因為對球隊嘅愛就值得留隊,咁係咪你同我身為阿仙奴球迷同樣夠班代表阿仙奴踢波?可惜還可惜,不捨還不捨,贊堅遜直至現在,無疑未有足夠實力於阿仙奴立足,離開對雙方都係好事。


不過,冇人會估到,已經好耐冇見嘅贊堅遜,喺新帥艾馬利麾下,會再次得到上陣機會。適逢左閘蒙維爾、高拿仙歷養傷,再加上聯賽盃輪換,近仗串演左閘嘅沙加輪休,一向司職右閘嘅贊堅遜得到左閘正選機會,相隔701日後再次為阿仙奴一隊上陣。


今仗阿仙奴攻入嘅第二球,正正係緣於贊堅遜疊瓦入楔,窄位抽射被擋出,再由小將史密夫路維補射得手。「贊師父」今仗表現不俗,當然,對手只係英甲球隊黑池,但以一位長時間未有上陣機會嘅球員為標準,表現勉強合格,個人認為英冠級數嘅「贊師父」,面對英甲對手,表現綽綽有餘係應該,但鑑於佢近幾季經歷,讚賞幾句亦未嘗不可。其實「贊師父」只係26歲,斷言佢已經無上升空間實屬武斷。小弟雖然情感上希望見到佢喺隊中努力進步爭一席位,相信佢有能力至少成為一名合格替補,但對球員嚟講,離隊發展其實更佳,除非艾馬利可以點石成金,否則「贊師父」喺其他球隊有良好表現,大家仍然會為你高興。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→