槍手名宿麥臣:「阿仙奴表現似踢慈善賽,以為雲加仲教緊」

阿仙奴今季換上「歐霸盃專家」艾馬利 (Unai Emery) 取代執教長達22年嘅雲加,唔少球迷自然期待球隊會有一番新氣象,但球隊開季就碰上兩場硬仗,連負曼城、車路士,及後對韋斯咸、卡迪夫城取勝但都險象橫生,表現令人失望。於《Sky Sports》任職嘅名宿麥臣 (Paul Merson) 就於節目上狠批母會表現差勁。


阿仙奴青訓出身嘅麥臣1985-1997年間為球隊上陣327次,現時仍以50歲之齡效力於威爾斯第三組別聯賽業餘球隊,正職係《Sky Sports》評論員。最近,麥臣於節目《The Debate》上直言,阿仙奴表現彷如踢慈善賽:

「我睇咗阿仙奴嘅比賽,如果唔知,仲以為雲加仍然教緊隊波。

睇佢哋踢波,就好似睇緊慈善賽咁,場波非常開放,冇人攔截對手,好似你攻完到我攻咁。

之前對韋斯咸佢哋其實踢得唔錯,1-1之後韋斯咸仍然來勢洶洶,但佢哋最終都贏波,不過仍然有好大改善空間。改變需要時間,主帥好難一嚟到就改晒所有嘢。」


麥臣認為,雲加嘅風格已經喺原有班底心目中根深柢固,艾馬利需要喺未來引入更多新面孔去完成變革,艾馬利同雲加都係好教練,但現時球隊人腳未係最適合艾馬利踢法,期望下一季會有所改善:「老實講,我諗阿仙奴今季會排第6位。」


的確,阿仙奴開季4場已失8球,防守方面比起雲加時期完全冇改善,中場缺乏硬度,對後防線保護近乎零。不過,個人認為阿仙奴喺心態上有明顯改變,首先係面對逆境時明顯有更大爭勝心,對車路士時兩次以同樣套路一度追成2-2平手,「套路」亦係雲加時期所欠奉,另外球隊會先喺中後場控球尋求機會,一旦進入中前場攻勢就會變得更直接,只係中後場用波能力不濟成為球隊軟肋,改變的確需要時間。

Source: GoalSkySports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→