曾為笑柄的降班黑腳藍斯度,為何能取代尼奴?


藍斯度3次為阿仙奴於英超正選上陣,表現持續出色,上仗對熱刺係佢第一次為阿仙奴於大戰把關,雖然未能保持清白之身,但演出相當具說服力,亦有神救。藍斯度暫時令到轉會時將佢踩到一文不值,甚至嘲笑佢嘅球迷統統收聲,以至於現時風向已一面倒稱讚藍斯度比尼奴出色;更有趣嘅係,部分球迷仍然念念不忘,將馬天尼斯出走一事怪罪尼奴身上,而家再將藍斯度取代尼奴拉埋一齊講,去證明尼奴嘅不濟或者幸災樂禍。

事先聲明,關於藍斯度是否優於尼奴,小弟認為係言之尚早,但好明顯,藍斯度現時上陣把關嘅效果同戰績都係較好。如果Too long didn’t read的話,筆者認為現階段暫時觀察到,藍斯度技術上未必高於尼奴,但佢能夠帶俾阿仙奴嘅嘢正正係現時阿仙奴需要嘅嘢: 1) 門將競爭、 2)溝通/指揮。

喺開始前,不妨先比較一下上一季兩位門將嘅一啲關鍵數據:


筆者利用Squawka數據比較兩位門將於2020/21球季嘅表現。首先可以見到,藍斯度嘅撲救成功率同尼奴相若,但藍斯度面對射門次數高達209次,遠超尼奴,亦即係藍斯度嘅成功撲救次數亦係遠超尼奴,呢一點當然同藍斯度效力於經常喺場面上處於被動嘅護級球隊有關。另一方面,藍斯度喺球權回復(Ball recoveries)、解圍(Clearances)、截球(Interceptions)方面較尼奴優勝,可能反映藍斯度比尼奴更接近一名清道夫門將嘅踢法,較常主動出擊。至於傳球,藍斯度嘅傳球成功只得43.38%,遠低於尼奴嘅76.83%,相信係因為藍斯度喺錫菲聯需要較多向前大腳長傳有關,呢一點由尼奴嘅短傳次數遠多於藍斯度可以證實(為保持簡潔,圖中未有顯示),同時兩者長傳準繩度相若。

睇落,撇除其他因素,除咗藍斯度踢法較為主動之外,上述數據未能提供太多資訊去為兩位門將分出高下。不過,所有球迷都睇得出,近三場比賽嘅阿仙奴換上藍斯度把關之後似乎表現脫胎換骨。

冇錯,近三仗對手級數係肯定不如曼城、車路士,比較可能唔係太公平,但的而且確球隊防線係一洗頹風,極體士氣、防守隊型都有進步,除咗同柏堤坐陣防中、富安健洋穩定演出有關之外,藍斯度亦應記一功。藍斯度把關技術是否比尼奴優勝,好難講,但藍斯度帶俾阿仙奴嘅作用肯定係有純技術層面以外嘅嘢值得講。

1) 競爭/新鮮感

好多人都講,門將呢個位置係最殘忍,因為只有一個可以上陣,如果你係後備,只可以等待正選門將犯錯、停賽或受傷,先有機會上陣,而且即使你係三號門將,平時訓練一樣要付出所有,要保持狀態,因為機會如此難得,更必須時刻做好準備。

阿仙奴門將位置上季嘅問題在於後備完全冇一個人有力挑戰尼奴嘅位置,賣走馬天尼斯後買入嘅朗拿臣試過上陣之後,表現完全唔合格,第三門將就只係預備組級數,結果連盃賽都要尼奴打足。

尼奴過去喺德甲及加盟阿仙奴以來表現有績可尋,肯定係一位好門將,但如果有留意其他球隊,其實好多隊波都會最少搵多一個有競爭力、隨時可以代替no. 1嘅後備門將,甚至有啲球隊會搵多一個有名氣嘅老將去做第三門將,一般講法係做陪練,而事實上亦都睇過有一號門將喺接受訪問時講過,因為門將練波主要時間係門將組自己練,所以同高水平嘅門將一齊練波係對自己有好大幫助,同埋有鞭策作用。

可以想像,當隊中只有尼奴夠班做正選,另外嘅門將都係領隊打死都唔想用嘅門將同青年軍,咁會唔會令尼奴「坐定粒六」,有少少鬆懈呢?有睇以前黃子華套劇都聽過管理學入面所謂鯰魚效應(Catfish Effect),雖然唔係100%一樣嘅意思,但都可以證明管理學上一直都有思考透過引入競爭令原有嘅人進步嘅做法。


2) Command of the box

另一方面,門將呢個位有時就係咁奇怪,例如我成日諗起幾年前祖赫特踢般尼嗰排,輸到七彩,一換返湯希頓即時止血,你話祖赫特係咪好差呢?佢係冇以前啲神救,但亦冇派膠,應做嘅都算做到。換一換個龍門,成條防線好似都瞓醒晒,戰績即刻只跌回升。其實都唔係真係咁「玄學」,畢竟足球係團隊運動,球員間嘅化學作用有時係相當複雜,試諗下每兩個人之間嘅性格、默契、溝通都會影響佢哋去合作做一件事嘅效果,一條防線由1個門將同3-5個後衛組成,識計數就知呢度有幾多對組合,仲有成組人加埋一齊嘅互動,可想而知呢個關係可以有幾複雜。

以藍斯度嚟講,筆者認為決定性因素係關於所謂 command of the box ,有睇英文分析嘅朋友會聽過呢個概念,有玩Football Manager嘅朋友亦都會知道門將有一項數值係叫command of area,顧名思義係門將嘅禁區指揮能力。筆者自己認為,喺現實世界中,command of the box除咗講門將指揮能力,亦都包括壓場感,即係有幾令人感覺到「呢個禁區你睇晒」。睇到呢度唔好恥笑我住先,呢個元素扣連返落去球場度係有好實在嘅嘢可以觀察到。

睇咗最近幾場波,可以睇到藍斯度係一位相當「嘈」嘅球員,即係佢會不斷講嘢,禁區內所有事件佢都會有反應,例如隊友成功防守佢會衝埋去鼓勵,自己救到波會慶祝,失波會嬲(而唔係頭耷耷),對手鬧隊友佢會幫拖。唔好睇少呢一啲細微之處,因為阿仙奴後防之前正正係一直缺乏一個指揮統籌嘅人,球員間嘅「提場」亦都相當有限,同時亦都係欠缺熱誠。現時防線上藍斯度、加比爾及泰亞尼都係有火之人,對球隊絕對係好事。

相反,咁耐以來嘅觀察,尼奴喺性格上係比較內斂,或者再加上語言問題,所以近來藍斯度喺場上嘅眾多溝通同指揮,係尼奴相對欠缺嘅一環。正如有球迷提出,尼奴連季初俾對手捉住,搞到失波,都好似冇乜火咁,當然尼奴都係受害者,但從呢個反應的確可以睇得出性格嘅分別,而剛好阿仙奴現時最需要嘅係有火嘅球員,呢點相信所有阿仙奴球迷都會認同。

同時,一位有火、性格主動嘅球員,亦都可以感染到隊友,慶幸球隊而家擁有幾位有火之人,呢度亦都要順便讚一讚加比爾嘅熱血,對熱刺一仗,史密夫路維一次返到左路防守成功,加比爾跑到去左路邊線激勵ESR,呢啲提升士氣嘅細微之處,最終必定會為球隊帶嚟積少成多嘅提升。唔係話只有呢種球員先係好,但而家阿仙奴就係需要佢哋。

總結

所以簡單嚟講,小弟現階段唔會話藍斯度勁唔勁過尼奴,但肯定睇得出藍斯度有佢嘅作用,所以係會支持佢繼續擔任正選。藍斯度為球隊注入激情同火花,除咗自己有火,亦都能夠帶動隊友,同加強球員間主動溝通,幫助到防線嘅統籌同士氣。同時,藍斯度嘅加盟,亦都會鞭策尼奴進步。

暫時嚟講,藍斯度嘅表現係摑咗批評者一巴。當然,球員肯定唔係完美,我所指嘅係非理性、人云亦云嘅批評,部分球迷冇乜睇過佢踢波,淨係睇啲嘩眾取寵嘅meme圖,話咩連續幾季踢邊隊邊隊降班,由此去嘲笑球員質素有限。

小弟一直都強調要懂得將事物分開嚟睇嘅習慣,其實只係好簡單嘅邏輯,阿仙奴會方近年轉會操作的確係極差,留唔住馬天尼斯,又冇同尼奴續長約,而家有機會連尼奴都走,然後後備門將亦都嚴重缺乏競爭能力,加上英人不足,多番失誤,搞到要用相對較高嘅價錢去買藍斯度,的確係做得好差。但問題係喺藍斯度身上嗎?我自己都認同係買得貴咗,一個降班球隊門將應該唔值得呢個價,但又代表球員真係好差嗎?正如尼高拉比比,我又唔覺得佢冇用喎,只係肯定唔會用呢個價錢去買,咁係出價嗰個笨柒啫,球員冇罪㗎!

喺外國更加有球迷得知藍斯度加盟時,去到佢嘅社交媒體留言侮辱佢,真係唔好影衰阿仙奴球迷啦!見到富安健洋加盟,又話買嚟賣波衫,講以前啲日韓球員喺阿仙奴有咩下場,真係唔該,就算你唔睇意甲唔睇日本國家隊,玩下FIFA FM都知呢個球員本身已經證明咗實力啦,come on! 其實喺網上留個言,如果一味copy and paste其他人講嘅嘢,不斷重覆一啲自己未加了解嘅立場同資訊,又有咩意義呢?不如大家都自己了解下,唔需要怕講自己獨特嘅意見!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→