昔日天才少年宮市亮,第三次膝部十字韌帶撕裂恐需掛靴

作為阿仙奴球迷見到有天份嘅球員飽受傷患困擾,縱使習慣,都難免感到可惜。日本翼鋒宮市亮當年加盟阿仙奴,喺眾人期待多年之下,多次外借,屢次重傷,最終轉會到德乙球會聖保利,仍然無法避開傷患,到底傷患仲要摧毀幾多新星嘅前途呢……


宮市亮當年喺日本高中踢學界足球,就被球探相中,加盟阿仙奴。雖然阿仙奴試過幾次簽入東亞球員失敗收場,被指係為咗賣波衫,但如果係呢個考慮,斷估唔會輪到區區高中生宮市亮。宮市亮的確有天份,佢喺2011年1月被外借到荷甲飛燕諾,表現十分出色,半季上陣12場,貢獻3入球5助攻,深得當地球迷歡心,,佢速度飛快、擅長盤扭,得到 "Ryodinho" 嘅稱號。


佢後來又被外借到當時仍喺英超嘅保頓及韋根歷練,但已經開始受到傷患影響上陣機會。2013年夏天,阿仙奴亞洲之旅,佢特別被選入球隊,前往祖國日本獻技,更喺名古屋一仗操刀射入12碼。後來再次受傷,等到2014-15球季外借到川迪重拾狀態。每季得十幾場波健康上陣,雖然表現其實唔錯,但始終都喺2015-16球季轉會到德乙聖保利。


不過直到現時,接近兩季,只上陣過24場,唔係踢得唔好,又係受傷累事。跟據最新報導,宮市亮最近先完成長達一年嘅休養,喺預備組復出,但馬上再次受傷。原來佢喺加盟一個月已經預上左膝十字韌帶撕裂,好返之後到右膝十字韌帶撕裂,今次再到左膝十字韌帶撕裂,認真慘情。


通常膝部受傷都係同周邊肌肉有關,睇返佢嘅傷病史,佢喺13-14球季曾經試過大腿肌肉受傷,休息245日,為後來膝部受傷埋下伏線。大腿肌肉力量不足會增加膝部負荷,而佢喺一邊十字韌帶撕裂之後,又會令身體不自覺偏重另一側,結果一發不可收拾。十字韌帶傷患係速度型球員大敵,即使康復都難以重拾當初嘅速度同靈活變向能力,何況宮市亮已經三次十字韌帶撕裂,日本傳媒引述專家意見,認為佢有機會需要提早掛靴。一位年僅25歲嘅天才少年,曾經2次為國家隊上陣,真係好可惜。


球王片:


Source: kicker.townGoalkicker.deTransfermarkt

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Fan Lau
    Fan Lau 於 03/05/2018 評論 NO. 1

    咁年青已受多次重創真是可惜,但為了健康著想結束職業球員之路吧

快捷鍵:←
快捷鍵:→