「嘟你個咀，亞視黎既？」，冇錯，亞視取得今季港超聯的播映權，將於本港台同國際台播放至少21場港超聯賽事，而且特設網上直播，令海內外觀眾都可以一睹港超聯球員的風采。相比起過往賽事通常出現喺收費電視，今次應該算是一大突破，因為之前就算對香港聯賽有興趣，都肯定唔會特登裝收費電視，而裝得收費電視的觀眾，睇英超才是「主菜」，如果有附送「港甲」這類「甜品」，或者都有觀賞的興趣，不過點解要花90分鐘去睇港超聯，而唔係「直落三盤」睇「愛回家+大藥坊+使徒行者」？筆者總結左五大吸引位，認為今晚20：00時分傑志VS大埔的賽事值得一睇。
第一，「超」呢個字係極具煽動性，「超」字的出現本身就有一定的殺傷力，例如去超市行街，你對於數字野可能已經麻木，當你見到類似「超」呢類字眼，通常都會激發你的消費慾望，一唔覺意就「擊敗你的防線」而令你買多幾份，又例如你形容一樣野，最高級的形容詞都俾你用曬，最後「超」呢個字就大派用場，「超正」、「超勁」、「超抵」，一個「超」字勝於很多形容詞，簡單直接闖進大家的心，而香港超級聯賽,簡稱港超聯，單純以文字藝術方面作評價，就已經有相當的魅力，以前叫香港甲組聯賽，從發音到字眼，都欠缺一些「張力」，所以港超聯呢個名，讀出黎順口又霸氣，正所謂「唔怕生錯命，最怕改錯名」，所以「港超聯」名改得靚，港超聯的確先「聲」奪人。
第二，作為香港足球的「新一頁」，港超聯給予人煥然一新的感覺，今屆賽事由九支球隊角逐競標，將進行主客場雙循環的賽制，球隊分別係「Big 4」南華、傑志、東方，太陽飛馬，標準流浪、天行元朗、YFC澳滌，同「升班馬」和富大埔與黃大仙，每一支球隊都有自己主場，南華坐擁香港大球場，傑志與太陽飛馬坐擁旺角大球場，東方坐擁將軍澳運動場，天行元朗坐擁元朗大球場，YFC澳滌坐擁深水埗運動場，和富大埔坐擁大埔運動場，黃大仙隊坐擁釜山道運動場，標準流浪坐擁九龍灣公園，因此令主客賽事更加緊湊，主場球迷的支持必定為主隊注入更多的活力。
第三，港超聯直播權回歸免費電視台，令全港市民都有機會睇直播，打開電視有波睇，呢種感覺有冇勾起你美好的回憶？
第四，港超聯每支球隊都有特色。南華隊就係香港首支華人球隊，奪標次數最多，「中國球王」李惠堂正是出自南華，南華隊亦出產過無數球星，南華係香港當之無愧的「班霸」；「末代港甲冠軍」傑志近年亦打破南華壟斷奪冠，傑志是歷史悠久的球隊，曾經是40-50年代的甲組勁旅，後來經歷過浮浮沉沉，03年重返甲組後已經成為港甲的中流砥柱，由於崇尚地面進攻而贏得「港甲巴塞」美名，於2011年重奪失落47年的聯賽錦標，2012年衛冕成功，再於2014再奪冠軍，今年於亞洲足協杯發揮出色，有望成為首支殺入決賽的香港球隊；東方亦是香港為人熟悉的球隊，「阿叔」林尚義亦曾效力過東方，而數東方最威水的時期就是90年代，接連於93、94、95年三奪聯賽冠軍，其中93年與94年成為「三冠王」，建立「東方皇朝」；太陽飛馬前身為天水圍飛馬，成立於2008年，以千萬巨型班姿態亮相甲組，首季殺入高級組銀牌、聯賽杯、足總杯決賽，更於高級組銀牌決賽擊敗晨曦隊奪冠，取得歷史上首個冠軍，09-10賽季飛馬隊奪得聯賽亞軍，於足總杯封王，2012年由太陽國際接手，改名為太陽飛馬；標準流浪隊成立於1958年，係全亞洲首支具有職業規模的球隊，早於71-72賽季奪得聯賽冠軍，流浪隊貫徹培養新人的宗旨，培養出好多新秀，為香港足球作出貢獻；黃大仙隊成立於1979年，過往一直在低組別聯賽成長，今季首次升上頂級聯賽；元朗隊成立於1958年，於62-63賽季取得歷史上唯一一座聯賽冠軍，於13年重返甲組，今年繼續以舊有班底出戰港超聯；大埔隊成立於2002年，起初由熱愛足球的年輕人組成，於很多賽事中發揮不俗，後來認識足球會籌辦人陳平，於是呢班後生仔成為丙組的班底，機緣巧合下遇到足球總會的改革，吸納地區球隊年輕化，大埔隊食住個勢奪得冠軍，升上乙組，再於06年升上香港甲組聯賽，更加獲得和富社會企業贊助，首個賽季發揮出色，接連擊敗前列球隊，被冠以「神奇球隊」之名，最終成功護級，08年首次取得足總杯冠軍，13年奪得高級組銀牌冠軍，為地區球隊立下榜樣，雖然該賽季慘遭降班，不過好快於14年重返港超聯，令人期待。
第五，港超聯係我地地區既賽事，每一個球隊、球場都可能臨近我地住所，正如你見到奧運會上香港人拎獎，你都會好開心，因為我地都係香港人，這是一種與生俱來的情感，而且我地身邊的人，都有可能效力緊某支球隊。
我對香港足球的支持，就絕對唔會好似某人講到愛大埔隊愛到「我好鍾意，我好熱血」咁假情假意，我今晚一定會睇波，因為，我好想香港球市重回繁盛，全民皆樂，呢個係我們每一個足球愛好者的期望。
請按此登錄後留言。未成為會員? 立即註冊