柏林牆之倒下,東/西德最強自由人直接較量:森馬與馬圖斯



曾幾何時,柏林牆隔住兩支優秀既國家隊,令到諸如森馬等東德球星未能同馬圖斯、歐真泰拿、高拿、布林美,奇里士文等西德球星並肩作戰,喺1990年7月8號奪得世界盃冠軍既西德隊,3個月後與東德隊合併,柏林牆倒下,德國宣告統一!作為東/西德最千呼萬喚既「天之驕子」,森馬同馬圖斯終於有機會攜手合作。

森馬之前效力東德班霸特雷斯頓,喺德國統一後,特雷斯頓加入德甲聯賽,森馬決定轉會史特加迎接新挑戰,結果92年協助球隊就奪得德甲冠軍;馬圖斯16歲就開始效力慕遜加柏,之後轉會拜仁、國際米蘭都取得巨大成功,尤其90年伴隨西德奪得世界盃,馬圖斯亦獲選為歐洲足球先生。
戰術特點黎講,自由人同清道夫係唔同。「清道夫」源於義大利人「鏈式防守」,係門將前既最後一道屏障,負責補防、破壞對方攻勢,與人盯人後衛唔同,「清道夫」冇固定防守任務,唔使 「mark死」一個人,比較靈魂咁遊走喺禁區內外,當中以歐真泰拿為表表者,為拜仁七奪德甲冠軍既佢喺防守方面貢獻良多,位置感好,大局觀好,「清道夫」要做得好,本身既足球素養都要好高。當時好多球隊都踢「352」陣式,「3」即係2個人盯人後衛+1個清道夫。

自從碧根鮑華發明「自由人」企位,球壇就鮮有呢類球員,「自由人」係「清道夫」+「攻擊中場」,一個人做曬兩個人工作,助攻助守一樣超卓,冷靜得黎又要積極走動,當今世上得返森馬同馬圖斯。

馬圖斯本身踢中場,已經具備「自由人」所有優質條件,90年世界盃啪歐真泰拿一前一後,馬圖斯可以更多參與進攻,自從森馬出現喺德國國家隊,馬圖斯都開始轉型做「自由人」,事實證明一樣出色。

無可否認,森馬係繼碧根鮑華之後最強既「自由人」,96年率領德國隊奪得歐洲國家盃、97率領多蒙特拎歐冠並個人奪得歐洲足球先生,可謂達到職業高峰。而馬圖斯「轉型」,某程度係因為森馬,為左保持喺國家隊既主力位置同競爭力,馬圖斯嘗試更多「可能性」,呢一點係值得讚頌,雖然任職「自由人」體力有所下降,但唔阻佢喺國家隊既「風生水起」,錄得150頂「喼帽」,真係「威過威士忌」。
個人認為,「自由人」位置上,森馬「攻守皆強」,馬圖斯既「攻」強於森馬,而「守」弱於森馬,綜合攻守轉換同體力,森馬稍微強於馬圖斯,但事實上佢地既良好競爭,為足球文化帶來極重要既素材,為後輩爭相學習。
標籤: 德國自由人  

留言


請按此登錄後留言。未成為會員? 立即註冊
    快捷鍵:←
    快捷鍵:→