關乎維拉存亡的一戰 看英超與英冠的鴻溝

足球財經 於 23/05/2019 發表 收藏文章
今屆英冠升班附加賽決賽將由上屆喺決賽飲恨,闊別英超三年嘅阿士東維拉對已經停留喺英冠十一個球季嘅打比郡。英超同英冠喺收入上巨大嘅分別,令到近年唔少英冠球隊大力擴軍,出高薪吸引具實力嘅球員加盟,希望可以搏到升班,好似上季狼隊就係成功例子之一。 但係一旦搏唔贏,分分鐘會令球隊陷入萬劫不復嘅地步。維拉上季附加賽落敗之後,一度陷入財政危機。

維拉喺 2015/16 球季喺英超排包尾降班後無耐,美國班主雷納 (Randy Lerner) 將股機悉數出售俾浙江商人夏建統旗下嘅睿康集團。夏建統入主後,馬上請嚟曾經帶領車路士贏得歐冠嘅迪馬堤奧做領隊,更加喺入主第一季花咗接近£88m 增兵,爭取回歸英超嘅野心不言而喻。而有別於一般低調嘅中國班主,操流利英語,曾經留學麻省理工學院與及哈佛大學嘅夏建統入主維拉後,高調接受英國傳媒訪問,豪言要喺五年之內帶領維拉成為英超 Big 6, 十年內進佔全球三大行列。佢更加喺Twitter活躍地同維拉球迷交流,表達自己嘅諗法,一度令維拉球迷對前景感到樂觀。

不過,迪馬堤奧上任四個月,十二場賽事只係得到一勝七和嘅成績,令到夏建統決定將佢極速解僱,改由布魯士取代,雖然成績逐漸好轉,但係維拉喺夏建統旗下首季只能以第十三名完成賽季。17年夏季,維拉無再大灑金錢擴軍,不過就免轉會費簽咗泰利,人工當然唔會低得去邊。呢一季維拉表現好轉,以第四名完成英冠,獲得參加升班附加賽嘅資格,但最終喺決賽以 0:1 輸俾富咸無緣升班。

升班附加賽落敗後唔夠兩個禮拜,傳媒報導維拉欠稅超過四百萬英鎊,加上有傳夏建統喺內地嘅資金未能及時匯到英國,一度令維拉上下與及球迷人心惶惶。好彩維拉最後同英國稅局達成還款協議,避過被入稟清盤嘅危機。而夏建統喺同年七月亦都引入由身兼Adidas 最大股東嘅埃及裔商人 Nassef Sawiris 與及美國商人 Wes Edens 嘅財團注資,換取維拉 55% 股權。夏建統同Sawiris 擔任聯席主席,但只保留 45%股權,失去維拉控制權。

翻查維拉最後一季喺英超與及喺英冠頭兩季合共三年嘅報表,會發現維拉未降班前薪酬對收入比率已經高達 88%, 遠高於歐洲足協所建議嘅 70% 安全水平。降班後,維拉收入毫不意外地大幅下降,但係薪酬支出依然處於極高水平,到 2017/18 球季,更加升至 111%, 代表維拉賺埋都唔夠出糧,更加唔好講其他營運開支。
從下面嘅圖表,可以睇到維拉降班後比賽日收入並無太大跌幅,反映大部份球迷仍然入場支持球隊。電視播映收入嘅跌幅,先至係每隊降班球隊嘅惡夢。維拉可以話係揀正最差嘅時間降班,因為 2016/17球季英超轉播合同開始新嘅週期,各隊嘅分成大幅提升,而維拉正好完全錯過咗整個週期。維拉喺英超最後一季整體電視收入係 £65.1m,而本欄前文財務報表分析(3) - 英超Big6 收入比較 (電視播映收入) 同大家分享過,17/18 球季英超包尾嘅西布朗都分到 £94.7m. 同樣都係包尾,兩年獎金相差接近 £30m!
英冠嘅吸引力當然無可能比得上英超,電視轉播權嘅費用自然差天共地。為咗避免球隊因為降班而做成收入急速下降,英超自 2006/07 球季開始實施所謂嘅”降落傘補助” (parachute payment) 制度,從播映權合同豐厚嘅收入當中,撥出一部份向英冠球會發放。根據現行制度,球隊從英超降班後的三季,將可順序獲分配英超每隊從固定金額池的55%, 45% 及 20% (如球隊降班前只曾在英超停留一季,則只能在之後兩季獲發補助,而如果球隊在此其間回歸英超,則不再獲發補助)。維拉喺 16/17 及 17/18 球季分別獲發 £40.9m 及 £34.0m, 估計 18/19 可獲 £15.1m. 其他無資格收取補助金嘅英冠球會,每隊獲派 £4.5m “團結補助” (solidarity payment). 由此可見,維拉收入嘅下降差不多等同補助金嘅遞減,亦代表除非維拉回歸英超,否則未來嘅收入將會無可避免地進一步下降。

而更惡劣嘅係,大家經常聽常聽到嘅 “FFP” (Financial Fair Play Regulations), 原來唔只參加歐洲賽嘅球會先要遵從,英冠都有套類似嘅”盈利及可持續性規例” (Profitability & Sustainability Rules), 規定球隊每季嘅虧損,撇除球場基建、青訓同支持女子及社區足球等費用,喺英超同英冠分別唔可以超過 £35m 同 £13m, 並每年以對上三年總和去決定球隊有無符合要求。維拉嘅同市宿敵伯明翰城今季就正因為觸犯相關條例而被判罰扣九分。以維拉前兩季嘅巨額開支,如果短期內唔填返個氹,下季就好有可能步伯明翰後塵。
上季附加賽臨門一腳飲恨並陷入財困之後,一度盛傳維拉會出售陣中最被看好嘅”維拉柏豪”基利殊救亡,及後得到注資後先擱置有關計劃,仲同基利殊續咗新約。但如果今季維拉升班再次落空,睇怕可能留唔住基利殊。

各位想追蹤更多足球界嘅財經新聞,可以like 足球財經嘅 Facebook page!

Reference:
The Guardian, "Tony Xia hopes revamp will turn Aston Villa into one of world’s top three clubs"
https://www.theguardian.com/football/2016/may/19/tony-xia-revamp-aston-villa-top-three-world-owner

The Telegraph, "Aston Villa plunged into financial crisis as £4.2m tax bill leads to threat of administration" https://www.telegraph.co.uk/football/2018/06/05/aston-villa-plunged-financial-crisis-42m-tax-bill-leads-threat/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→