錫週三又玩財技 變相賭自己幾時升班

足球財經 於 17/01/2020 發表 收藏文章
近排唔少財務新聞嘅英冠球會錫週三,除咗賣球場俾泰籍班主而被聯賽會檢控涉嫌造假之外,又俾英國傳媒揭發有幾間贊助其實都係班主控制之餘,仲要完全無實際業務,總之為咗揼錢俾球會就無所不用其(詳情可以參閱”2019足球財經大事回顧”一文)。

佢哋最近又有新搞作,宣佈推出一種條款相當創新嘅季票,由2020/21球季起生效,至於到期日,係2036年或錫週三升上英超之後嘅第十季兩者中較後者。季票只設成人價格,由£4,550 - £6,400 不等。

簡單啲講,假設錫週三2020/21-2025/26球季期間升上英超,張季票就會2036年到期。如果去到2028先升班,就2038年先到期。理論上,如果錫週三一路都升唔到班,呢張就變咗永續季票,即係今日一次過俾幾千鎊,最長可以包你任睇一世錫週三(非英超)嘅主場賽事。

基本上即係將季票證券化,而家先收咗一大嚿現金,順便賭埋球會幾時升班。喺球會角度,當然越快升班越好,盡快賺取喺英超作賽嘅回報之餘,仲可以縮短季票嘅年期。至於買咗呢套季票嘅球迷,當然都想愛隊盡快升班,仲唔駛驚球會升班後季票會加價,睇落又似乎一家便宜兩家著。

真係不得不佩服錫週三背後嘅財務團隊,諗到呢條橋去幫球會籌旗。不過,相信大部分錫週三嘅球迷,都寧願管理層將精力花喺實實在在執靚隊波,多過玩埋呢啲財技。再望埋隔離同市宿敵錫菲聯,今季以蔗渣嘅價錢,即使未算打出燒鵝肶嘅味道,都叫做有燒雞翼味吖!我就唔太睇好會有太多多球迷肯一次過俾成幾千鎊出嚟買呢隻季票喇。

參考資料:錫週三官網公佈

各位想追蹤更多足球界嘅財經新聞,可以like 足球財經嘅 Facebook page!

如果喜歡我們的文章,請即分享到︰

標籤: 錫週三  英冠  錫菲聯  

留言

會員
我要評論
請按此登錄後留言。未成為會員? 立即註冊
  • Gor SK
    Gor SK 於 18/01/2020 評論 NO. 1

    但如果根據你咁講就係永續喎,就係一路升唔到,2036年就會到期啦

  • 球場會計佬
    球場會計佬 於 23/01/2020 評論 NO. 2

    Re Gor SK: 升到上英超先會開始個十年倒數,一路升唔到就一路自動續期。

快捷鍵:←
快捷鍵:→