2018/19: 第10週陣容預告 – 準備放棄藍斯

FPL Guy 於 27/10/2018 發表 收藏文章
由於阿仙奴(Arsenal)今個星期對完水晶宮(Crystal Palace)之後個賽程就會變得相對難踢,5場入面有3場都要對住Big 6球隊,再加上藍斯(Ramsey)嘅上陣時間越嚟越少,所以都係時候賣走佢。但係又會見到我個陣又未賣走佢,咁究竟係咩原因呢?首先,我係諗住遲啲中場會買曼城(Man City)嘅迪布尼(De Bruyne)嘅,但係曼城今個星期要對熱刺(Spurs),同埋迪布尼只係傷癒冇耐,上陣時間同狀態都未必咁穩定,所以依家仲未係時間入佢住,都係睇定啲先。另外,我亦都諗住改用4.5M嘅門將,但同時保留住曼城嘅不失球,所以今週就決定買入班捷文文迪(Benjamin Mendy)。呢一著好明顯就唔係預計佢今週對住熱刺會拎到好多分,而係為咗將來而行嘅一步。咁依家就嚟睇下我今個星期會排個咩陣啦。由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:4-4-2
本週陣容
球隊價值(Squad value): 102.5M剩餘資金(In the bank): 0.0M

轉會
賣出:馬田基利(Martin Kelly)
買入:班捷文文迪(Benjamin Mendy)

守門員
艾達臣(Ederson)
曼城最近5場都冇失過波,防守非常唔錯,而曼城今季只係失咗3球,同利物浦(Liverpool)一樣係英超最佳。今場曼城作客對近兩場都只係小勝對手一球嘅熱刺,希望都可以順利拎到不失球啦。

後衛
賓納特(Bennett)
狼隊(Wolves)喺上場輸俾屈福特(Watford)之前嘅防守的確唔錯,輸波前對上兩場不失球。今場作客對住近兩場重回勝軌嘅白禮頓(Brighton),希望都可以力保不失啦。
馬高斯阿朗素(Marcos Alonso)
今場車路士(Chelsea)嘅對手係上場俾曼城贈送5蛋嘅般尼(Burnley)。車路士近4場比賽入面有2場不失球,防守都算唔錯。預計車路士呢場都可以保持不失球,同埋阿朗素應該都可以喺進攻上帶嚟貢獻。
羅拔臣(Robertson)
利物浦近4場比賽入面有3場不失球同2場只失1球,再加上只係對住上場先至打開勝利之門嘅卡迪夫城(Cardiff),呢場唔失波應該冇乜難度。
班捷文文迪(Benjamin Mendy)
文迪傷癒復出之後已經踢足兩場90分鐘嘅賽事,再加上即使今場對住熱刺唔能夠保持不失,佢喺進攻上都係有好大威脅。上季不論係主場定作客,曼城都能夠大勝熱刺,所以今場我都搏一鋪放兩個曼城後防球員。

中場
李察利臣(Richarlison)
今週愛華頓(Everton)要作客曼聯(Man Utd),上場曼聯俾車路士臨完場前迫和,再加埋歐聯輸咗俾祖雲達斯(Juventus),希望今場李察利臣有機會喺曼聯身上偷到雞啦。
麥迪遜(Maddison)
麥迪遜上場對阿仙奴嘅表現其實唔錯,交出3個關鍵傳送,同尼迪迪(Ndidi)並列全隊最高,希望佢今場對住近兩場都輸波而回嘅韋斯咸(West Ham)會入到波或者交到助攻啦。
文尼(Mane)- Captain
上場文尼因為手傷而缺陣,但係週中嘅歐聯已經喜見佢復出,仲入埋波添,雖然射失咗球十二碼。不過,見到文尼重返球場已經係一個好消息,希望佢今場對住暫時失咗19球嘅卡迪夫城會有進帳啦。卡迪夫城係英超失球第二多嘅球隊,僅次於富咸(Fulham)。
夏薩特(Hazard)
夏薩特同文尼相反,佢因為背傷而喺週中嘅歐聯賽事中避戰,希望佢能夠趕及復出對般尼啦。如果佢能夠落場,就好大機會可以喺上場吞咗曼城5蛋嘅般尼身上取得入球。

前鋒
哥林威爾遜(Wilson)
今週般尼茅夫(Bournemouth)作客暫時英超失球最多嘅富咸,富咸暫停失咗25球。雖然哥林威爾遜上場入唔到波或者交出助攻。但係都預計佢今場能夠取得入球。
阿古路(Aguero)
雖然阿古路喺今週之前嘅狀態唔錯,而且上場對般尼都有入球。不過,我就唔諗住揀佢做隊長,一嚟今場係對Big 6球隊啦;二嚟係作客啦;三嚟係對上5次對熱刺,阿古路都入唔到波;四嚟預計阿古路應該都照舊係得60分鐘貨仔。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/
標籤: Fantasy Premier League  FPL  英超  

留言


請按此登錄後留言。未成為會員? 立即註冊
  • COOOK 於 27/10/2018 評論 NO. 1

    文筆真係差過小學生

快捷鍵:←
快捷鍵:→