2018/19: 第5週球員轉會清單 – 揀賽程好定狀態好?

FPL Guy 於 10/09/2018 發表 收藏文章
今個星期係國際賽期,所以冇英超聯賽踢,咁我哋就睇下有邊幾位球員值得喺呢段時間入貨啦。今次主要留意嘅球員分別嚟自阿仙奴(Arsenal)、般尼茅夫(Bournemouth)同屈福特(Watford)。點解?因為般尼茅夫同屈福特隊波嘅狀態都好好,而阿仙奴嘅賽程就好好踢。

後衛
賀利巴斯(Holebas)
賀利巴斯開季4場交出4個助攻,係全英超第三多,僅次於馬高斯阿朗素(Marcos Alonso)同班捷文文迪(Benjamin Mendy)嘅5個助攻。由於賀利巴斯負責屈福特嘅死球處理,令到佢開季有交出多次助攻。以上場對熱刺(Spurs)為例,賀利巴斯下半場一記右路罰球傳中,助前鋒甸尼(Deeney)頭槌扳平。之後下半場尾段,賀利巴斯再次交出助攻,左路角球傳俾中堅卡夫卡特(Cathcart)後上頭槌破網,最終助屈福特成功以2:1反勝熱刺。由此可見,賀利巴斯負責處理死球絕對可以為佢帶嚟無數嘅助攻機會。不過,呢個時候買入屈福特嘅球員都需要考慮一下佢哋嘅賽程,皆因未來4場賽事,屈福特就有兩場需要對住Big 6球隊,分別係下一場主場迎戰嘅曼聯(Man Utd)同再之後作客嘅阿仙奴。

中場
艾朗藍斯(Aaron Ramsey)
雖然艾朗藍斯今季喺聯賽仲未入到波或者交出助攻,但係藍斯喺踢完對上兩場90分鐘比賽後嘅數據都算唔錯。佢喺第4週就有4次關鍵傳送,係全英超第二,同阿古路(Aguero)、阿歷斯山齊士(Alexis Sanchez)、盧卡古(Lukaku)同大衛施華(David Silva),並列第二,僅次於有5次嘅夏薩特(Hazard)。喺阿仙奴隊中,只有米希達恩(Mkhitaryan)全季嘅關鍵傳送同藍斯睇齊,達到7次。另外,喺射門中目標方面,只有拿卡錫迪(Lacazette)嘅5次係同藍斯睇齊。阿仙奴全隊都冇球員喺呢兩方面嘅數字係比藍斯多。綜觀全英超,沙拿係(Salah)係暫時英超射門中目標最多嘅球員,總共有7次,比藍斯多兩次。阿仙奴嚟緊嘅賽程相當易踢,分別主場迎戰愛華頓(Everton)同屈福特,同埋作客富咸(Fulham)同今季仍未打開勝利之門嘅紐卡素(Newcastle)。

羅拔圖佩雷拉(Roberto Pereyra)
羅拔圖佩雷拉開季4場攻入3球,係屈福特嘅首席射手,狀態火熱。佩雷拉開季4場總共錄得9個射門,係隊中第二,僅次於前鋒甸尼嘅10次。縱使佩雷拉射門次數比甸尼少,但入球數字就比甸尼多,可見佢嘅把握力都係唔錯。不過,都係嗰句,呢個時候要買屈福特球員都要睇睇個賽程。至於買定唔買,都係取決於玩家較睇重賽程嘅影響定係狀態嘅影響。

前鋒
哥林威爾遜(Callum Wilson)
由於韋費特沙夏(Wilfried Zaha)喺我FPL隊入面受傷,所以我又要睇下有咩低過7.0M嘅前鋒選擇。儘管上場對車路士(Chelsea),哥林威爾遜入唔到波,但佢嘅表現都唔錯,有一球差少少就幫到般尼茅夫開紀錄。暫時威爾遜喺英超獲得7個黃金機會,多過任何一位英超嘅球員。威爾遜暫時喺英超錄得14次禁區內嘅射門,係全英超之最,比阿古路、同盧卡古嘅13次都要多。般尼茅夫未來嘅4場比賽都尚算易踢,因為有兩隊都屬於英超嘅中下游,分別係般尼(Burnley)同水晶宮(Crystal Palace)。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→