2018/19:第4週球員轉會清單 – 邊個至係李察利臣最佳代替者?

FPL Guy 於 30/08/2018 發表 收藏文章
由於喺李察利臣(Richarlison)領紅之前都有接近40%嘅玩家有買到佢,不過好不幸喺今週拎咗紅牌,仲要停賽3場,所以今篇嘅球員轉會列表會列出一啲人選俾大家取代李察利臣。大家唔一定要換佢走嘅,但我唔想浪費咗一個位置,加上大批人賣走佢嘅話都會跌價,咁我趁高價賣佢走,等佢跌返價再買返都唔遲。

中場
米希達恩(Mkhitaryan)
阿仙奴(Arsenal)一開季就要分別對陣曼城(Man City)同車路士(Chelsea)嘅魔鬼賽程,令到佢哋都要輸波而回。縱使阿仙奴輸波,米希達恩係其中一位表現出色嘅槍手。佢開季3場比賽都踢足90分鐘,同埋直接參與咗阿仙奴自己攻入嘅4球波(唔計烏龍球)當中嘅2球。佢開季3場比賽7次嘗試助攻,係全隊最高。同時,米希達恩開季錄得8次射門,同奧巴美揚(Aubameyang)並列全隊最高。由第4週開始,直到第10週,阿仙奴嘅賽程都係非常易踢,因為佢哋唔洗面前Big 6球隊。嚟緊兩場,阿仙奴都係對住卡迪夫城(Cardiff)同紐卡素(Newcastle)兩支尚未打開英超勝利之門嘅榜尾球隊,預計都係阿仙奴搶分嘅大好機會。

柏度(Pedro)
柏度喺新領隊沙利下,都獲得唔少機會,壓過韋利安(Willian)成為正選右翼。而佢嘅表現亦好好,開季3場入2球,成為隊中首席射手。佢3場合共貢獻9次射門同4次關鍵傳送,可見柏度可以搶分嘅機會都唔少。另外,今季車路士(Chelsea)嘅攻力都非常之有保證,每場至少都入到2球。仲要嚟緊3場對住嘅對手都唔太強,亦係車路士搶分嘅好機會。點解咁講?般尼茅夫(Bournemouth)上場對愛華頓(Everton)失兩球;卡迪夫城開季3場仍未開齋;韋斯咸(West Ham)今季已經失咗9球,同哈特斯菲爾德(Huddersfield)一樣係全英超失球最多嘅球隊。

禾確特(Walcott)
喺李察利臣領紅兼停賽後,禾確特就成為一個直接替代李察利臣嘅人選,事關佢同李察利臣同樣效力愛華頓,同埋同李察利臣嘅價錢都一樣係6.7M。喺2比2賽和般尼茅夫嘅比賽入面,禾確特就射入咗個人英超今季嘅第2球。就7.0M或以下嘅中場嚟講,禾確特3次參與入球係全英超之冠,同隊友李察利臣同屈福特(Watford)嘅佩雷拉(Pereyra)並列第一位。就愛華頓嘅球員嚟講,今季只有李察利臣同堅尼(Keane)喺禁區內嘅射門次數係比禾確特多,而咁啱佢哋兩個短期內應該都會缺陣,咁禾確特禁區內嘅射門次數理應會增多,大大增加咗佢得分嘅機會。愛華頓嚟緊4場比賽入面,有3場主場,分別對陣哈特斯菲爾德、韋斯咸同富咸(Fulham),其中哈特斯菲爾德同韋斯咸今季已經失咗9球,係英超失球最多嘅兩支球隊。今季愛華頓進攻上嘅表現都唔錯,每場英超都只少入到兩球,預計下場對住英超失球最多嘅球隊都會入到波。

以上呢幾位球員都係我心水嘅李察利臣最佳代替者,而我就傾向以米希達恩取代李察利臣嘅,唔知大家又會揀邊個代替李察利臣呢?

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
  • Sunnybaby
    Sunnybaby 於 30/08/2018 評論 NO. 1

    仲有 Spurs 既Lucas Moura

  • David Durex
    David Durex 於 31/08/2018 評論 NO. 2

    講得冇錯,如果要加多個人選,Lucas Moura會係第4個。不過,我冇揀佢嘅原因係嚟緊熱刺都有兩場硬仗要打,嚟緊要作客開季全勝嘅屈福特,之後再對榜首嘅利物浦,呢個唔係一個好嘅時候入熱刺兵。不過,我都明點解你會提到Lucas Moura,始終佢近況唔錯。

快捷鍵:←
快捷鍵:→