2018/19: 第37週陣容總結 – 全力爭四變讓四?

FPL Guy 於 08/05/2019 發表 收藏文章
今週嘅賽果令到前4爭奪戰都可以話已經完結。隨住曼聯(Man Utd)同阿仙奴(Arsenal)相繼失分,曼聯已經退出咗爭前4,而阿仙奴同熱刺(Spurs)就相差3分,而得失球就相差8球,即係話阿仙奴如果要保住前4,就要望熱刺輸波,仲要係被大炒,而自己都要大勝,追返個得失球差。熱刺都可以話係已經半隻腳保到前4,而車路士(Chelsea)就最輕鬆喇,已經穩住咗前4。咁依家就睇睇今週筆者嘅陣容踢成點啦。
本週陣容

守門員
艾達臣(Ederson)—6分
今場曼城(Man City)主場憑住甘賓尼(Kompany)嘅世界波以1比0險勝李斯特城(Leicester)。今場嘅控球率就以曼城佔優,超過60%。至於射門方面,都係以曼城佔優,曼城全場錄得19射5中,而李斯特城就錄得7射2中。由於艾達臣力保不失,所以佢今週拎到6分。

後衛
華利尼(Valery)—1分
今場修咸頓(Southampton)作客以3比0輸咗俾韋斯咸(West Ham)。韋斯咸今場嘅控球率係稍稍高過修咸頓,達到56.4%。不過,兩隊嘅射門就差得遠喇,修咸頓全場錄得17射6中,而修咸頓就只係僅僅錄得11射1中。因為修咸頓失咗3球,所以華利尼被扣1分,今週只係拎到1分。
羅拔臣(Robertson)—1分
今場利物浦作客以2比3險勝紐卡素(Newcastle),今場利物浦嘅控球就佔優,控球率達到69.1%。不過,射門就以紐卡素較多,紐卡素全場錄得14射7中,而利物浦全場就只係錄得11射4中,但就已經入到3球。今場羅拔臣嘅表現其實都唔差,全場交出1次射門同2次關鍵傳送。不過,因為利物浦失咗2球,而被扣1分。
高拿仙歷(Kolasinac)—1分
今場阿仙奴主場以1比1慘遭白禮頓(Brighton)迫和。無論喺控球定射門方面,都係阿仙奴佔優。阿仙奴今場嘅控球率超過70%,而全場就錄得20射8中。相反,白禮頓就錄得11射5中。不過,高拿仙歷今場都只係去到77分鐘先被換入,冇乜發揮嘅機會。
梳爾(Shaw)—2分
今場曼聯作客慘遭哈特斯菲爾德(Huddersfield)迫和1比1。今場曼聯嘅控球達到65%,而射門都有23射7中嘅情況下,俾全場錄得7射3中嘅哈特斯菲爾德入到波。哈特期菲爾德憑住曼聯開出角球後,打一個快速反擊,最後因為梳爾解圍踢空氣而被對方射入。

中場
沙拿(Salah)—14分(Captain)
沙拿今場表現唔錯,全場錄得4射1中,兼交出2次關鍵傳送,各項數據都屬於全隊最高。最終沙拿亦收穫1個入球,但好唔好彩,沙拿只係踢咗72分鐘就因傷被調離場。唯一希望就係佢冇乜大礙啦。今週佢因為入咗1球,所以拎到7分。
禾特包斯(Ward-Prowse)—1分
今場禾特包斯先任後備,去到66分鐘先至上陣。不過,佢都冇乜表現,全場冇錄得過射門同關鍵傳送,所以今週只係拎到1分。
史達寧(Sterling)—3分
今場史達寧嘅表現奇差,全場錄得3次射門,但無一中龍。
孫興民(Son)—-2分
今場熱刺(Spurs)作客以0比1輸咗俾般尼茅夫(Bournemouth)。熱刺喺大部份時間都踢少兩個嘅情況下,去到臨完場先失守。今場孫興民於43分鐘被吹罰後推撞同埋腳踢利馬(Lerma)而直接領紅,所以被扣3分,今週係拎-2分。

前鋒
占美利斯(Jimenez)—2分
狼隊(Wolves)今場主場以1比0小勝富咸(Fulham)。雖然狼隊全場控球率連40%都唔過,但已經錄得19射6中。相反,富咸空有控球率,全場僅錄得6射2中。占美利斯今場表現麻麻,全場僅錄得2射0中同交出1次關鍵傳送。
拿卡錫迪(Lacazette)—2分
拿卡錫迪今場錄得7次射門,係全隊最高,但可惜只係得2腳中目標嘅射門,射門都唔係太準。

今週成績
本週分數:31
本週平均分:48
總成績:2,265
總排名:34,322

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→