2018/19: 第36週陣容總結 – 掂過碌蔗

FPL Guy 於 29/04/2019 發表 收藏文章
今週嘅賽果令前4爭奪戰更混亂。雖然前列嘅排名係冇變到,但係差距隨住熱刺(Spurs)同阿仙奴(Arsenal)輸波,車路士(Chelsea)同曼聯(Man Utd)和波,各隊之間嘅差距進一步縮窄。另外,值得一提嘅係Triple Captain落利物浦(Liverpool)嘅沙拿(Salah)度係有回報嘅,大大提升咗個得分。咁依家就睇睇今週筆者嘅陣容踢成點啦。
本週陣容

守門員
賴恩(Ryan)—2分
今場白禮頓(Brighton)主場以1比1同紐卡素(Newcastle)打成平手。兩隊嘅控球率同射門都係不相伯仲。兩隊嘅控球率只有1%嘅差距,而雙方嘅射門次數都係各有9次。白禮頓嘅中目標射門就俾紐卡素多1次,有2次。好不幸地,紐卡素唯一中目標嘅射門就入咗波,所以賴恩今週只係拎到2分。

後衛
高拿仙歷(Kolasinac)—1分
今場阿仙奴作客以0比3大敗俾李斯特城(Leicester)。阿仙奴由於上半場已經得返10人應戰,所以控球率同射門次數都被比下去。阿仙奴今場嘅控球率僅得32.8%,而全場只係錄得6射1中。相反,李斯特城嘅射門就多達24次,當中有一半都係中目標。今場高拿仙歷只係交出1次射門同1次關鍵傳送,表現平平。因為阿仙奴失咗3球,所以被扣1分,今週只係拎到1分。
羅拔臣(Robertson)—14分
今場利物浦主場以5比0大炒哈特斯菲爾德(Huddersfield),今場利物浦完全壓住哈特斯菲爾德嚟打,控球率超過70%。利物浦全場錄得21射7中;而哈特斯菲爾德全場就只係錄得5射1中。羅拔臣今場踢到曉飛,全場交出4次關鍵傳送,同沙拿(Salah)並列全隊最高。佢亦分別助攻文尼(Mane)同沙拿破門,收穫2個助攻。交出2個助攻兼幫助球隊保持清白之身,令佢拎埋2分bonus,今週獲得14分。
杜菲(Duffy)—2分
由於原本係陣中正選嘅查比亞(Trippier)今週冇機會上陣,所以佢嘅位置又杜菲代替。因為白禮頓失咗1球,所以杜菲今週只係拎到2分。

中場
史達寧(Sterling)—3分
今場曼城(Man City)作客以0比1小勝般尼(Burnley),曼城今場嘅控球率同射門次數都佔盡優勢。曼城今場嘅控球率達到69.9%,而射門就錄得25射7中。相反,般尼全場就只係錄得2射0中。史達寧今場嘅表現一般,全場錄得3次射門,但無一命中目標。佢唯一表現較好嘅就係交出咗4次關鍵傳送。
沙拿(Salah)—57分(Triple Captain)
沙拿今場表現出色,全場錄得8射3中,兼交出4次關鍵傳送,各項數據都係全隊最高。佢今場除咗梅開二度,亦交出咗1個助攻。佢嘅助攻造就咗基達(Keita)僅僅開波用咗15秒就入波,成為利物浦史上英超最快嘅入球。佢嘅入波分別係嚟自利物浦雙閘嘅助攻,先係接應阿歷山大阿諾(Alexander-Arnold)嘅過頭波,挑過出迎嘅門將射入,再接應羅拔臣嘅傳中輕鬆射入。但就已經收穫1個入球。今場交出2入球1助攻嘅沙拿拎到3分bonus,令到佢拎到19分。
杜哥利(Doucoure)—2分
今場屈福特(Watford)主場以1比2不敵狼隊(Wolves)。雖然屈福特嘅控球率比狼隊高,但係射門嘅威脅程度就不及狼隊。屈福特全場錄得10次射門,但只得1球中龍。相反,狼隊全場就錄得11射4中。杜哥利表現麻麻,全場只係交出1次關鍵傳送。
孫興民(Son)—2分
今場熱刺(Spurs)主場以0比1輸咗俾韋斯咸(West Ham)。雖然熱刺嘅控球率達63%,但射門次數就不及韋斯咸。韋斯咸全場錄得16射7中;而熱刺全場就只係錄得14射4中。孫興民嘅射門次數同中目標射門都係全隊最高,總共錄得5射2中,佔咗全隊熱刺中目標射門嘅一半。不過,好可惜全部都唔能夠轉化成入球。

前鋒
安達格雷(Andre Gray)—8分
安達格雷今場嘅表現唔錯,全場錄得2射1中。屈福特唯一一個中目標射門就俾安達格雷轉化成入球。表現出色嘅佢拎到2分bonus,今週獲得8分。
拿卡錫迪(Lacazette)—2分
雖然阿仙奴大部份時間都只係得10人應戰,但佢全場作出嘅3次射門,已經係佔咗全隊嘅一半,竟然冇球中龍,未免有啲差。
占美利斯(Jimenez)—7分
占美利斯今場表現唔錯,全場錄得3射2中,就收穫1個入球。表現出色嘅佢仲拎到1分bonus,今週拎到7分。
今週成績
本週分數:100
本週平均分:69
總成績:2,234
總排名:24,730

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  Football  Soccer  足球  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→