2018/19: 第34週陣容總結 – 黑過墨斗

FPL Guy 於 18/04/2019 發表 收藏文章
今週重注白禮頓(Brighton)同屈福特(Watford)瀨晒嘢,兩隊都輸波而回。一隊就揀咗佢哋嘅其中一名球員做隊長;另一隊就有球員領紅牌而被扣分。今個星期個陣好似完全排錯晒咁,但係都一樣要睇睇今週筆者嘅陣容踢成點。
本週陣容

守門員
賴恩(Ryan)—1分
今週嘅第一場比賽,白禮頓主場以0比5大敗俾般尼茅夫(Bournemouth)。兩隊嘅控球率都係不相伯仲,但射門就差得遠喇。般尼茅夫全場錄得14射7中;而白禮頓全場就只係錄得8射1中。呢場賴恩只係作出咗2個撲救,所以拎唔到撲救分。但因為失咗5球而被扣2分,所以呢場佢冇分可以拎到。而喺今週白禮頓第二場對卡迪夫城(Cardiff)嘅比賽,白禮頓亦主場以0比2輸咗俾卡迪夫城。雖然白禮頓嘅控球率同射門次數都比卡迪夫城高,但中目標嘅射門仍然係以卡迪夫城較多。白禮頓今場錄得14射2中,但卡迪夫城只係錄得10射3中就已經入2球。呢場賴恩只係作出咗1個撲救,所以拎唔到撲救分。佢兩場加埋先拎得1分。

後衛
杜菲(Duffy)—2分(Captain)
喺今週第一場對般尼茅夫嘅比賽,最後得十人應戰嘅白禮頓因為失咗5球,所以杜菲要被扣2分,呢場1分都拎唔到。喺今週第二場對卡迪夫城嘅比賽,白禮頓因為失咗2球而被扣1分,所以呢場佢只係拎到1分。杜菲兩場加埋先拎得1分。
羅拔臣(Robertson)—6分
今場利物浦(Liverpool)主場以2比0擊敗車路士(Chelsea),今場利物浦不論係控球同射門都佔優,控球率高達61.9%。利物浦全場錄得15射7中;而車路士全場只係錄得6射3中。羅拔臣今場幫助球隊保持清白之身,所以拎到4分不失球分,今週獲得6分。
華利尼(Valery)—2分
由於原本正選嘅查比亞(Trippier)冇出,所以佢嘅位置由華利尼頂上。今場修咸頓(Southampton)主場以3比1擊敗狼隊(Wolves),今場修咸頓嘅控球率雖然比狼隊少好多,只係僅僅達到30%。不過,佢哋有威脅嘅埋門就比狼隊多,佢哋全場錄得12射6中,而狼隊就只係錄得17射2中。由於修咸頓失咗1球,所以華利尼只係拎到2分。不幸嘅係,華利尼最尾傷出,希望佢冇咩大礙啦。

中場
史達寧(Sterling)—14分
今場曼城(Man City)作客以1比3贏咗水晶宮(Crystal Palace),曼城今場嘅控球率同射門次數都佔盡優勢。曼城今場嘅控球率達到72.4%,而射門就錄得20射6中。相反,水晶宮全場就只係錄得7射3中。史達寧今場嘅表現出色,全場錄得5射2中,為全隊最高,最尾亦收穫2個入球。表現出色嘅佢亦拎到2分bonus,所以今週拎到14分。
禾特包斯(Ward-Prowse)—2分
禾特包斯今場嘅表現好差,踢咗90分鐘竟然冇射門同冇交出過關鍵傳送。
沙拿(Salah)—8分
沙拿今場表現唔錯,全場錄得5射3中,兼交出4次關鍵傳送。但就已經收穫1個入球。佢入球後亦都因為太興奮而除衫慶祝,導致拎咗1張黃牌而被扣1分。所以佢今週係拎到6分。
孫興民(Son)—4分
今場熱刺(Spurs)以4比0大炒哈特斯菲爾德(Huddersfield),可惜孫興民今場先任後備,去到86分鐘先獲得上陣機會。好彩嘅係咁短時間,佢都能夠交出助攻俾盧卡斯摩拉(Lucas Moura),造就盧卡斯摩拉個人大演帽子戲法。交出1個助攻嘅孫興民今週拎到4分。
杜哥利(Doucoure)—2分
由於原本正選嘅高拿仙歷(Kolasinac)冇出,所以佢嘅位置由杜哥利頂上。今場屈福特喺大部份時間踢少個嘅情況下,控球率同射門次數都不及阿仙奴(Arsenal),最終亦以1球落敗。屈福特全場嘅控球率僅得34.1%。阿仙奴全場錄得19射5中,而屈福特就全場錄得11射3中。今場杜哥利嘅表現麻麻,全場只係交出1次關鍵傳送。

前鋒
迪尼(Deeney)—-2分
對住迪尼真係冇嘢好講,開波11分鐘就因為侵犯托拉拿(Torreira)而拎紅牌。佢因為拎紅牌而被扣3分,所以今週只係拎到-2分。
占美利斯(Jimenez)—1分
占美利斯今場嘅表現都係麻麻,全場只係錄得2射1中。佢仲因為拎咗張黃牌而被扣1分,今週只係得1分。

今週成績
本週分數:40
本週平均分:54
總成績:2,036
總排名:37,322

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  Football  Soccer  足球  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→