2018/19: 第30週陣容總結 – 被騙了

FPL Guy 於 11/03/2019 發表 收藏文章
今個星期筆者有兩個位錯咗。首先,第一個亦係最嚴重嘅一個,就係出咗紐卡素(Newcastle)嘅舒哈(Schar)同早兩週買咗佢。連續出咗佢兩個星期,但佢1分都拎唔到。唔單止連續兩個星期都拎黃牌扣晒啲分,仲因為喺第32週前拎咗10張黃牌,所以搞到要停賽2場。搞到本身買佢最主要係留返第31週用嘅計劃都行唔通,依家搞到唔扣分買人就得返9個人用,都唔知點搞。而另一個錯就係放咗連續5場入球荒嘅愛華頓(Everton)翼鋒李察利臣(Richarlison)喺後備席,因為佢今場就打破入球荒,入咗1球兼拎到1分bonus添。咁依家就睇睇今週筆者嘅陣容踢成點先啦。
本週陣容

守門員
保路錫(Boruc)—6分
今場般尼茅夫(Bournemouth)作客以0比2贏咗哈特斯菲爾德(Huddersfield)。今場兩隊嘅射門次數都一樣,各有8次。不過,般尼茅夫就準好多,全場錄得5次中目標嘅射門,而哈特斯菲爾德就只係得1次。由於保路錫助球隊力保不失,所以拎到4分不失球分,所以今週拎到6分。

後衛
彭利拿(Pereira)—2分
今場李斯特城(Leicester)主場以3比1贏咗富咸(Fulham)。雖然李斯特城嘅控球率同射門次數都高過富咸,但都要失1球。李斯特城全場錄得18射8中,而富咸只係錄得6射3中。彭利拿全場交出2次關鍵傳送,表現不過不失啦。
阿歷山大阿諾(Alexander-Arnold)—2分
今場利物浦(Liverpool)主場以4比2擊退般尼(Burnley),今場利物浦其實係壓住般尼嚟打,控球率達到68.8%。利物浦全場錄得23次射門,可惜只得5球中龍;而般尼全場只係錄得3射2中,就已經入咗2球。今場阿歷山大阿諾嘅表現其實唔差,全場錄得3次射門同交出3次關鍵傳送。佢今場喺利物浦失第二球之前就被換走咗,所以今週拎到2分。
舒哈(Schar)—0分
今場紐卡素主場以3比2反勝俾愛華頓。控球率就以愛華頓佔優,而射門次數就以紐卡素較多。紐卡素今場嘅控球率雖然只係得45.5%,但係佢哋全場就錄得19射7中,而愛華頓就只係錄得3射2中。舒哈今場因為紐卡素失咗2球自己拎咗張黃牌,喺各扣1分嘅情況下,佢今週繼續係1分都拎唔到。
羅拔臣(Robertson)—1分
羅拔臣嘅表現都不過不失,全場錄得1次射門並交出2次關鍵傳送。不過,羅拔臣就冇咁好彩喇,因為踢足全場,而利物浦失咗2球,所以被扣1分,今週只係拎到1分。

中場
沙拿(Salah)—5分
沙拿今場錄得5射1中,射門奇差。另外,佢今場交出咗3次關鍵傳送,都叫做好彩拎返個助攻,所以今週拎到5分。
普巴(Pogba)—1分
今場曼聯作客以2比0輸咗俾阿仙奴(Southampton),係曼聯自蘇斯克查上任後首次輸波。今場普巴嘅表現一般,全場錄得2射1中同交出1次關鍵傳送。普巴因為拎咗張黃牌而被扣1分,所以今週佢只係拎到-1分。
辛迪加斯(Snodgrass)—2分
今場韋斯咸(West Ham)作客以2比0輸咗俾卡迪夫城(Cardiff)。辛迪加斯全場錄得2射0中同交出1次關鍵傳送,表現普通。
夏薩特(Hazard)—10分
今場車路士(Chelsea)主場以1比1同狼隊(Wolves)打成平手。夏薩特今場表現唔錯,雖然全場只係射得1球,但係就係靠佢呢1球喺補時階段嘅入波,車路士物得以扳成平手。夏薩特憑住佢出色嘅表現拎到3分bonus,所以今週拎到10分。

前鋒
阿古路(Aguero)—10分(Captain)
曼城今場主場以3比1贏咗屈福特(Watford)。曼城今場完全係㩒住屈福特嚟砌,佢哋嘅控球率達到71.1%。佢哋全場錄得19射9中,而屈福特全場都只係錄得2射1中。阿古路今場憑住一個問題球助攻史達寧(Sterling),因為佢心口控俾史達寧嘅一刻,事實上史達寧係處於越位位置。阿古路全場錄得3射2中,憑住呢個助攻,佢今週拎到5分。
占美利斯(Jimenez)—8分
狼隊今場雖然控球率只係得24.2%,完全輸晒俾車路士,連射門都係,車路士全場錄得22次射門,而狼隊就只係得2次。不過,狼隊憑住一個快速反擊,由占美利斯射入今場嘅第一個入球。射門咁準嘅占美利斯亦拎到2分bonus,今週獲得8分。

今週成績
本週分數:47
本週平均分:48
總成績:1,794
總排名:41,961

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/
標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→