2018/19: 第27週陣容總結 – 不似預期

FPL Guy 於 25/02/2019 發表 收藏文章
今個星期,所有嘢都不似預期。首先,原本以為排個陣可以出到10個球員,甚至11個球員,結果只係得8個出到場。另外,今週拎到高分嘅球員大部份都唔係啲熱門球員,今個星期拎到最高分嗰3個嘅擁有率都係唔夠5%,分別係屈福特(Watford)嘅迪路菲奧(Deulofeu)、甸尼(Deeney)同阿仙奴(Arsenal)嘅米希達恩(Mkhitaryan)。跟住仲有,雙紅會慘變「傷紅會」,受傷嘅球員仲多過入波。同埋,今週嘅平均分都特別低,只係得35分,就知道今週好多玩家嘅表現都唔係太好,包括筆者在內。不過,點都要睇睇今週嘅陣容踢成點。今週唯一好彩嘅就係,得2個拎到分嘅球員,都總算揀啱其中一個做隊長。
本週陣容

守門員
艾法列治(Etheridge)—0分
今場卡迪夫城(Cardiff)主場俾屈福特(Watford)大炒1比5。雖然卡迪夫城嘅控球率只係得35.4%,但射門次數同中目標射門次數都同客隊差唔多。不過,入球就差得遠喇,卡迪夫城全場錄得15射6中,入1球。但係屈福特就全場錄得12射7中,就入咗5球。艾法列治今場嘅撲救率喺佢嘅水準之下,只係救出咗2球。因為佢失咗5球波,所以被扣2分,今週只係得0分。

後衛
雲比沙卡(Wan-Bissaka)—0分
雲比沙卡賽前冇幾耐先整傷肌腱,原本預佢都可以作客李斯特城(Leicester)嘅,因為咁,所以佢今場並冇進入水晶宮(Crystal Palace)作客李斯特城嘅大軍名單中。
阿歷山大阿諾(Alexander-Arnold)—0分
雖然阿歷山大阿諾已經傷癒,上場聯賽都有後備上陣,原本以為今場雙紅會,佢會重返正選,但高普今場就繼續用米拿(Milner)串演右閘,都唔出阿歷山大阿諾。
賓納特(Bennett)—1分
今場狼隊(Wolves)作客以1比1賽和般尼茅夫(Bournemouth)。雙方嘅控球同射門都係不相伯仲,控球就以狼隊稍高,達到55.2%。般尼茅夫全場錄得10射3中;而狼隊就錄得10射2中。不過,兩隊都係憑住十二碼先能夠取得入球,狼隊都算好彩,輸咗2個十二碼,但般尼茅夫嘅劊子手京治(King)只係射入1球。因為狼隊失咗1球,同埋賓納特拎咗張黃牌而被扣1分,所以佢今週只係拎到1分。
羅拔臣(Robertson)—8分
今場利物浦(Liverpool)作客0比0悶和曼聯(Man Utd)。利物浦嘅控球率達到64.5%,而射門次數就有7次,比曼聯嘅6次多1次。不過,佢哋嘅準繩度實在太低,只係得1次射門中目標;而曼聯6射就已經有3中。羅拔臣今場踢得都唔錯,雖然全場只係錄得1次關鍵傳送,但係都拎到2分bonus,再加埋不失球嘅4分,所以佢今週拎到8分。
彭利拿(Pereira)—0分
今場李斯特城主場俾水晶宮大炒1比4。李斯特城嘅控球率同射門次數都俾客隊多,但就係入唔到波。李斯特城全場錄得65.3%嘅控球率,射門達到27射5中。相反,水晶宮全場只係得7次射門,但5腳中目標射門,就已經入咗4球。彭利拿全場錄得1次關鍵傳送,表現就麻麻。由於李斯特城失咗4球,所以被扣2分,今週彭利拿只係得0分。

中場
沙拿(Salah)—3分
沙拿今場表現麻麻,全場只係錄得1次射門,仲要係唔能夠命中目標。
普巴(Pogba)—3分
普巴今場都算踢得唔錯,全場錄得2射1中,並交出1次關鍵傳送。
摩天奴(Moutinho)—2分
今場摩天奴表現麻麻,雖然佢全場錄得4次關鍵傳送,係全隊最高,但係都未能轉為助攻。而且都唔夠佢累球隊輸第一球十二碼咁致命。

前鋒
占美利斯(Jimenez)—14分(Captain)
占美利斯錄得全隊最高嘅3次射門,但就只係得1球中目標,仲要係十二碼。不過,佢都能夠射入呢球十二碼,令到佢今場不至於要食白果。
瑟薩斯(Success)
雖然瑟薩斯已經傷癒,但今場並冇進入屈福特嘅大軍名單當中。

今週成績
本週分數:31
本週平均分:35
總成績:1,645
總排名:35,817

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→