2018/19: 第25週陣容總結 – 阿古路大勇

FPL Guy 於 07/02/2019 發表 收藏文章
今週排名應該會大兜亂,大上大落,有人升好多,咁自然有人就跌好多。原因就係FPL官方顯示最多人俾人揀做隊長嘅球員係沙拿(Salah),但沙拿今週只係拎到2分,咁即係代表有一大堆人揀錯隊長。不過,有時揀錯隊長都冇乜事嘅,要出事就要睇睇個平均分同次熱人選。今週個平均分有成65分,係超級高。而今週次熱嘅隊長人選普遍都係曼城(Man City)嘅進攻球員,都係阿古路(Aguero)、史達寧(Sterling)同辛尼(Sane)。而當中就有超過26,000個玩家用咗Triple Captain喺一週雙賽對阿仙奴(Arsenal)冇出場而去到對愛華頓(Everton)先落場踢咗58分鐘嘅辛尼身上,揀錯辛尼同沙拿做隊長嘅朋友排名應該會大跌,俾揀中阿古路做隊長嘅朋友追過。事關阿古路今週拎到佢今季第二高嘅得分,有19分,相信都有唔少朋友揀中阿古路做隊長,甚至更加有膽色,Triple Captain埋阿古路。咁我就真係恭喜晒揀咗阿古路做隊長嘅朋友喇!咁依家就睇睇今週筆者嘅陣容踢成點先啦。
本週陣容

守門員
艾法列治(Etheridge)—6分
今場卡迪夫城(Cardiff)主場以2比0淨勝般尼茅夫(Bournemouth)。雖然卡迪夫城控球率就輸晒,三成都冇。對手般尼茅夫全場錄得9射2中,中目標嘅射門都俾艾法列治救出,力保不失。

後衛
雲比沙卡(Wan-Bissaka)—5分
今場水晶宮(Crystal Palace)主場以2比0擊敗富咸(Fulham),富咸全場錄得8次射門,但無一命中目標,所以水晶宮都能夠順利保持不失球。不過,因為雲比沙卡拎咗張黃牌,所以被扣1分,今個星期拎到5分。
賓納特(Bennett)—2分
今場狼隊(Wolves)作客以1比3贏咗愛華頓,愛華頓全場錄得13次嘅射門,比狼隊仲多5次。大家雖然都各有4次中目標嘅射門,但準繩度決定一切。因為狼隊失咗1球,所以賓納特今週只係拎到2分。
羅拔臣(Robertson)—2分
今場利物浦(Liverpool)作客被韋斯咸(West Ham)迫和1比1。利物浦今場嘅控球率高達73.4%,但係韋斯咸憑住反擊同精心部署嘅罰球戰術都製造到唔少埋門,所以韋斯咸總射門次數比利物浦仲要多2次,有13次。不過,佢哋射門就唔太準,只係得2個中目標射門,但就憑住一個罰球戰術攻入1球。安達臣(Anderson)開地波送直線俾衝前嘅安東尼奧(Antonio),本身跟佢嘅基達(Keita)跟甩咗少少,俾安東尼奧人到禁區起腳射中內柱彈入。因為利物浦失咗1球,所以羅拔臣今週只係得2分。

中場
沙拿(Salah)—2分
今場沙拿作出咗全隊最多嘅4次射門,當中有2個中目標射門,表現普通。
普巴(Pogba)—7分
今場曼聯(Man Utd)作客以0比1小勝李斯特城(Leicester),普巴今場貢獻咗1個助攻。佢嘅助攻係源於李斯特城嘅右閘彭利拿(Pereira)交失波,直接俾咗普巴,然後普巴送出一個拋物線嘅過頭波俾拉舒福特(Rashford),後者控定後一射破網。普巴今場表現都唔錯,全場錄得2次關鍵傳送。另外,普巴今場亦都都拎到1分bonus,所以今週拎到7分。
簡迪(Kante)—9分
今場車路士(Chelsea)主場以5比0大炒哈特斯菲爾德(Huddersfield)。買入簡迪就係等呢一刻嘅出現,簡迪今場先後2次助攻新加盟嘅希古恩(Higuain)。第一球真係值得讚,簡迪就喺希古恩入楔之際,送出一個靚直線,助攻希古恩取得喺車路士嘅第一球。今場守強於攻嘅簡迪交出4次關鍵傳送,係隊中第二,只係比韋利安(Willian)少。
李察利臣(Richarlison)—3分
愛華頓今週嘅第一場比賽係對狼隊,喺愛華頓對狼隊嘅比賽入面,李察利臣嘅表現就一般,全場只係交出2次關鍵傳送。而喺愛華頓對曼城嘅賽事入面,李察利臣只係後備落場踢得17分鐘,所以今做星期嘅2場比賽入面,佢總共都只係拎到3分出場分。
夏薩特(Hazard)—15分
車路士全場錄得23射7中,而當中有接近一半嘅中目標射門都係嚟自夏薩特。夏薩特除咗射入1球十二碼外,入嘅第二球更顯功架,夏薩特控定巴克利(Barkley)交出嘅直線。推入禁區,最尾扭過出迎嘅羅素(Lossl)射入空門。夏薩特全場錄得4射3中,並交出1次關鍵傳送,佢中目標嘅射門係全隊最多。表現咁好嘅夏薩特亦拎到2分bonus,所以今週有15分。

前鋒
阿古路(Aguero)—38分(Captain)
曼城今週第一場係對阿仙奴,曼城可以話係贏得相當有說服力。曼城全場錄得19射12中,射門都幾準;相反,阿仙奴全場都只係得4射2中。阿古路喺呢場比賽入面嘅表現真係無可挑剔,全場錄得4射4中,入3球,大演帽子戲法。阿古路繼上場對紐卡素(Newcastle)開波未夠1分鐘就入波,今場都係開波後50幾秒就接應拿樸迪(Laporte)嘅傳中頂入。由於阿古路呢場表現堪稱完美,所以都拎到3分bonus,喺呢場拎到17分。而喺曼城第二場鬥愛華頓嘅賽事入面,阿古路嘅表現就一般喇,全場錄得2射0中。有一球禁區混戰,阿古路倒掛柱邊出界,未能製造入球,所以喺呢場只係拎到2分。而佢今週嘅總分就達到19分。
占美利斯(Jimenez)—9分
喺愛華頓對狼隊嘅比賽入面,占美利斯全場錄得2射1中兼交出2次關鍵傳送,表現唔錯。佢亦喺完半場前頂入由摩天奴(Moutinho)開出嘅罰球。憑住佢出色嘅表現,佢亦拎到3分bonus,今週拎到9分。

今週成績
本週分數:98
本週平均分:65
總成績:1,532
總排名:39,154

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→