2018/19: 第24週陣容預告 – 沙拿終於返嚟喇!

FPL Guy 於 28/01/2019 發表 收藏文章
因為週末遇著足總盃嘅關係,所以第24週嘅英超賽事要去到週中先至再開始。同大家講定先,由於車路士(Chelsea)同曼城(Man City)都打入咗聯賽盃嘅決賽,而決賽日就係2月24日,所以第27週車路士對白禮頓(Brighton)同愛華頓(Everton)對曼城嘅賽事將會延期舉行。所以喺第27週嗰陣,呢4隊嘅任何一位球員都係唔會有分,咁大家就係時候計劃下嗰週究竟有邊11個球員可以出場。因為呢4隊喺第27週冇比賽,換句話講即係話遲啲將會有一週雙賽嘅情況出現,假如球員喺嗰週兩場都正選上陣兼踢咗最少60分鐘,咁分數坐底就已經會有4分。而第一個一週雙賽嘅時間表已經出咗,就係喺第25週。曼城同愛華頓會喺第25週踢2場賽事,換言之大家都要入定貨預備一週雙賽,但千祈唔好走火入魔,因為呢兩隊喺第27週係冇比賽。最理想嘅情況係第25週有3至4名曼城同愛華頓球員,一方面受益於一週雙賽,而唔會忽略咗其他球隊容易嘅賽程,另一方面就係夠時間喺第27週之前散貨。
第25週賽程

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:4-5-1
本週陣容

球隊價值(Squad value): 103.1M剩餘資金(In the bank): 0.5M

轉會
賣出:安達臣(Anderson)
買入:沙拿(Salah)
原因:
呢一個轉會已經計劃咗好耐,係去到今週先實行。都真係有啲後悔,上個比賽週冇扣分入沙拿,不過我哋都係要向前看。沙拿自第16週開始至第23週,喺呢8場收穫9入球3助攻,而當中只係得2場冇入球同助攻,而對手就分別係曼市雙雄。佢喺其餘6場比賽都係拎到FPL雙位數字嘅得分,狀態一流。佢近4場就交出4入球1助攻,表現都好穩定,呢個亦係我要買入佢嘅原因。至於今場利物浦(Liverpool)嘅對手係李斯特城(Leicester),佢哋近4場只係得1勝3負,狀態低迷。佢哋喺呢4場失咗7球,而上場對狼隊(Wolves)更加係失咗4球。李斯特城防線大穿窿,而沙拿嘅狀態又咁火熱,試問仲有邊個比沙拿更合適做今週嘅隊長?所以今週我會揀沙拿做隊長。

守門員
畢頓(Button)
由於卡迪夫城(Cardiff)今場要對阿仙奴(Arsenal),所以收起艾法列治(Etheridge),出白禮頓門將畢頓。不過,原本離隊幫澳洲征戰亞洲盃嘅正選門將賴恩(Ryan)因為澳洲已經出局,所以唔知今場畢頓仲有冇正選踢。白禮頓今場會作客依家排聯賽榜尾二嘅富咸(Fulham)。富咸近4場錄得1勝3負,而白禮頓就稍為好少少,近4場錄得1勝1和2負。富咸近4場入咗4球,仲要係每場入1球,雖然攻力唔係好勁,但足以令到對方唔能夠保持清白之身。白禮頓近4場只係得1場冇失波,希望今場都可以,同埋畢頓有得出啦。

後衛
雲比沙卡(Wan-Bissaka)
今場水晶宮(Crystal Palace)會作客修咸頓(Southampton),修咸頓嘅近況唔錯,近4場取得2勝1和1負,仲要係連續3場不敗。水晶宮個狀態就認真麻麻,近4場取得1勝3負。修咸頓近4場入5球,攻力一般,但係水晶宮近4場只係得1場不失球。希望今場水晶宮可以唔失波啦。
賓納特(Bennett)
今場狼隊會主場對韋斯咸(West Ham),兩隊嘅狀態都差唔多,分別係狼隊近4場錄得2勝2負同韋斯咸近4場錄得1勝1和2負。韋斯咸近4場只係入咗3球,攻力好弱。希望今場狼隊能夠保持不失球啦。
迪治尼(Digne)
今場愛華頓(Everton)會作客對依家排緊喺榜尾嘅哈特斯菲爾德(Huddersfield)。哈特斯菲爾德暫時今季只係贏過2場比賽,而佢哋更加係近10場不勝。哈特斯菲爾德近4場只係得1和3負,而愛華頓近4場就錄得1勝3負。愛華頓近況都唔係好,但呢場絕對係佢哋谷底反彈嘅好機會。
羅拔臣(Robertson)
今場利物浦會主場迎戰李斯特城。利物浦作為暫時英超失球最少嘅球隊,開季至今只係失咗13球,但好不幸地近4場只係得1場能夠保持不失。雖然係咁,但係羅拔臣近4場交出2個助攻,即使佢未能助球隊保持清白之身,佢都可以喺進攻上帶嚟回報。

中場
沙拿(Salah)- Captain
上面嘅轉會原因都交代得好詳細,所以都唔再重複多講喇。
普巴(Pogba)
曼聯(Man Utd)今場將會主場出擊對般尼(Southampton),般尼嘅近況真係不得了,經歷過季初嘅頹勢後,近4場錄得3勝1和,而曼聯就自從蘇斯克查上任後就連贏6場。原本都有諗過揀普巴做隊長,但當見到對手個氣勢咁強,咁都係避之則吉好啲。普巴近4場交出3入球2助攻,表現非常好,佢更加係自蘇斯克查上任嗰6場當中有5場都帶嚟進攻上嘅回報,當中就累積咗5入球5助攻。
簡迪(Kante)
今場車路士(Chelsea)要作客近4場僅得1勝嘅般尼茅夫(Bournemouth),而車路士就近4場取得2勝1和1負,近況明顯比般尼茅夫好。今場都唔預簡迪有波入,但係買佢嚟就係預佢久唔久有啲好似啱啱聯賽盃對熱刺(Spurs)入嘅嗰球咁嘅神來之筆,畢竟佢只係值5.0M,仲可以要求啲咩?
李察利臣(Richarlison)
李察利臣近排嘅狀態認真麻麻,已經連續4場冇入波同冇助攻。同埋可以見到因為佢冇乜表現,所以出場時間都逐漸減少,希望李察利臣今場對住聯賽榜包尾嘅球隊會有波入啦。
夏薩特(Hazard)
夏薩特近4場只係交出1個助攻,狀態低迷。睇返車路士嘅攻力,佢哋近4場都只係入得3球,進攻力疲弱。希望夏薩特對住近4場勁失9球嘅般尼茅夫可以重拾射門鞋。

前鋒
占美利斯(Jimenez)
占美利斯近4場交出1入球1助攻,表現一般。而韋斯咸近4場就失咗6球,只係得1場冇失波,希望今場占美利斯入到波啦。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→