2018/19: 第22週陣容總結 – 後防撐起半邊天

FPL Guy 於 15/01/2019 發表 收藏文章
今個星期,後防拎到嘅分數佔咗今週嘅總分超過65%,絕對係靠晒佢哋。有時都真係要諗下揀唔揀個後衛做隊長,但揀後衛做隊長都好高風險,因為一失波就會冇咗4分不失球分數。同埋就算佢哋拎到不失球分,只要陣中有其他球員入到波就好容易高分過後衛。就係因為呢兩個原因,所以比較少人揀後衛做隊長。但好似今個星期咁,總有啲時間後衛,甚至守門員,都會高分過前鋒同中場。咁依家就睇睇今週筆者嘅陣容踢成點先啦。
本週陣容

守門員
艾法列治(Etheridge)—10分
今場卡迪夫城(Cardiff)主場以0比0迫和哈特斯菲爾德(Huddersfield)。今場艾法列治全場作出咗3個撲救,所以有1分撲救分,再加埋3分bonus,所以拎到10分。

後衛
阿歷山大阿諾(Alexander-Arnold)—6分
今場利物浦(Liverpool)作客以1球輕取白禮頓(Brighton),白禮頓全場7射0中。今場阿歷山大阿諾交出2次關鍵傳送,但重要fbgjm 嘅係佢幫助到球隊保持不失。
雲比沙卡(Wan-Bissaka)—4分
雖然水晶宮(Crystal Palace)主場輸1比2俾屈福特(Watford),雲比沙卡因為失咗2球要被扣分,但佢今場嘅表現唔錯,包括有一球護空門,所以拎到3分bonus,一共有4分。
迪治尼(Digne)—12分
今場愛華頓(Everton)主場以2比0擊敗般尼茅夫(Bournemouth)。迪治尼今場作出咗2次射門同交出2次關鍵傳送,2項數據都係愛華頓後衛嘅最多。最終佢亦憑住一記精準嘅傳中球搵到蘇馬(Zouma),成功助攻蘇馬頭槌破網。另外,佢都有球靚傳中俾堅尼(Keane)頂到,但可惜後者頂中楣。迪治尼今場除咗交出1個助攻,仲憑住佢出色嘅表現拎到3分bonus,今週總共拎到12分。
羅拔臣(Robertson)—9分
今場利物浦憑住沙拿(Salah)嘅十二碼以1比0小勝白禮頓。今場羅拔臣交出1次關鍵傳送,但佢憑住出色嘅表現,除咗幫球隊保持清白之身,仲拎到3分bonus,所以今週拎到9分。

中場
李察利臣(Richarlison)—2分
李察利臣今場嘅機會都唔少,佢全場錄得4次射門,係隊中之冠,但可惜只係得1球中目標,把握力有待改進。
夏薩特(Hazard)—5分
今場車路士(Chelsea)主場以2比1險勝紐卡素(Newcastle)。夏薩特今場嘅表現就唔係好出眾,全場只係錄得1次唔中龍嘅射門,好彩嘅係佢今場交出咗1次關鍵傳送,而最尾就收穫咗1個助攻。
普巴(Pogba)—5分
今場曼聯(Man Utd)作客熱刺(Spurs),曼聯就成為笑到最後嘅一方,皆因曼聯以0比1贏咗熱刺。曼聯憑住一個快速反擊,把握查比亞(Trippier)傳失波,連加特(Lingard)截到個波俾普巴大腳長傳搵到拉舒福特(Rashford)一射破網。普巴全場錄得6射5中,並交出3次關鍵傳送,2項數據都係隊中之冠,表現非常好。可惜佢拎咗張黃牌,所以被扣1分,今週只係得5分。
孫興民(Son)—4分(Captain)
今場揀孫興民做隊長嘅選擇係錯嘅,不過都無悔,因為睇狀態,佢的確係好,而且踢完今場比賽之後,佢就要代表韓國踢亞洲盃。今場佢錄得2射1中兼交出2次關鍵傳送,表現唔錯。值得一提嘅係,有一球佢傳一個靚直線俾雲克斯(Winks),可惜後者把握唔到,接應射斜,未能交出助攻。

前鋒
占美利斯(Jimenez)—1分
今場狼隊(Wolves)作客輸3比0俾曼城( Man City),由於狼隊中堅保利(Boly)喺上半場嘅19分鐘飛鏟貝拿度施華(Bernardo Silva),直接領紅出場,埋下被大炒嘅伏線。因為打少個,所以今場0射門嘅占美利斯踢咗半場就被換出,只得可憐嘅1分。
卡尼(Kane)—2分
今場熱刺入唔到波,真係多得迪基亞(De Gea),迪基亞全場作出咗11個撲救,真係上晒身。卡尼今場錄得7射4中,射門次數係今場最高,可惜全部都射破唔到迪基亞嘅十指關。

今週成績
本週分數:60
本週平均分:49
總成績:1,351
總排名:33,453

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→