2018/19: 第18週陣容預告 – 排陣頭痕

FPL Guy 於 19/12/2018 發表 收藏文章
今週雖然冇咩矚目大戰,但係要排陣都幾頭痕。阿歷山大阿諾(Alexander-Arnold)同夏薩特(Hazard)都有傷,當中又以阿歷山大阿諾嘅傷勢較為嚴重,但到目前為止,得到嘅官方消息都係話阿歷山大阿諾嘅傷勢冇馬迪普(Matip)同高美斯(Gomez)咁嚴重,不過,高普亦冇講佢究竟幾時可以復出。其實上週我都有心水人選嚟替代阿歷山大阿諾嫁喇,佢哋分別就係阿仙奴(Arsenal)嘅兩個翼衛—比爾連(Bellerin)同哥拉辛拿斯(Kolasinac),但好可惜佢哋兩個都傷咗。

喺後衛上,筆者比較鍾意用上唔同球隊嘅後防球員,尤其係兩閘,因為貪佢哋即使失波,都有較大嘅機會喺進攻上帶嚟回報。而要唔同球隊嘅原因就係唔想因為一個失球就令到球隊失咗8分不失球分(假設同時用兩個同隊嘅後防球員)。如果唔係迫不得已,我都盡量唔會用兩個同隊嘅後防球員。我今季曾經都試過用兩個同隊嘅後防球員,分別係曼城(Man City)嘅艾達臣(Ederson)同文迪(Mendy),同埋利物浦(Liverpool)嘅阿歷山大阿諾同羅拔臣(Robertson)。會用艾達臣同文迪嘅原因係嗰陣諗住轉用法比安斯基(Fabianski)而棄用艾達臣,而我亦有一個大原則會遵守,就係打死都唔會扣分轉會,亦因為咁喺需要拎到曼城嘅不失球分嘅同時做到換入法比安斯基,咁就有兩場係試過艾達臣同文迪同場。結果都算好彩,其中一場佢哋真係成功保持不失球。至於阿歷山大阿諾同羅拔臣,雖然喺文迪受傷後,我就已經買咗阿歷山大阿諾嚟頂替佢,但又好出奇嘅係,原來近4個星期,阿歷山大阿諾同羅拔臣只係曾經得一場係同時在陣。呢場亦都好好彩,佢哋兩個成功為利物浦保持清白之身。

講返轉頭,咁大段嘢想表達嘅意思係,以5.0M或以下嘅後衛嚟講,可能韋斯咸(West Ham)嘅後衛同利物浦嘅洛夫雲(Lovren)同佳尼(Clyne)貌似會係好嘅替補,但其實有隱憂,所以即使明知阿歷山大阿諾今週好大機會唔出得同跌緊價都要睇定啲先。由之前講韋斯咸未來8場嘅比賽都唔洗對Big 6球隊計起,依家已經過咗4場,當中佢哋有一半嘅比賽係態夠保持清白之身。拉勻嚟計,即係預計佢哋未來會有4場比賽係能夠保持不失球,大家又覺得值唔值放法比安斯基加個韋斯咸後衛?我就覺得都唔係咁值得同埋高風險咗少少,睇返喺呢段時間期間,係冇任何一名嘅韋斯咸後衛係入到波或者係交到助攻,由此可見,佢哋都冇乜可能可以帶到進攻上嘅回報俾大家。至於利物浦方面,雖然佢哋係全英超失球最少嘅一隊,過咗17輪比賽都只係失咗7球,但係佢哋未來4場比賽就有2場分別要對阿仙奴同曼城。呢2場比賽,利物浦倘若能夠保持不失絕對係意料之外,如果唔得都係預計之內。而另外2場比賽對住狼隊(Wolves)同紐卡素(Newcastle)都唔能夠保證話能夠唔失波,所以呢段時間出2個利物浦後防球員都有少少高風險,更何況依家係要揀佢嚟買,而唔係諗下出唔出好。同阿歷山大阿諾(5.2M)價錢差唔多嘅選擇有愛華頓(Everton)嘅迪治尼(Digne)同狼隊嘅杜靴迪(Doherty),佢哋兩個分別價值5.0M同5.1M。好可惜,呢個時候亦唔係好適合入佢哋兩個,愛華頓今個星期要硬撼熱刺(Spurs),而過完呢個星期之後,愛華頓就可以迎接天使般嘅賽程(見下圖),佢哋未來8場都唔洗對Big 6球隊,咁仲點會咁心急呢個星期買佢呢?至於杜靴迪,狼隊未來5場比賽,將會有3場比賽梅花間竹咁對上Big 6球隊(見下圖),包括:利物浦、熱刺同曼城,我會話有狼隊後衛嘅玩家就應該留返佢哋在陣,因為中間佢哋都會對富咸(Fulham)同水晶宮(Crystal Palace)呢啲較弱嘅隊伍,但係呢個時候入貨?真係不了。講下講下,呢個星期頭痕嘅地方就係,明知個屋頂穿咗個窿漏水,但係依家市面上冇適合嘅材料修補,俾你哋會求其都買啲嘢遮住個窿先呀,定係留佢一個星期穿窿,希望個天唔好落雨,或者下個星期先買合適嘅材料返嚟修補?
迪治尼以及愛華頓賽程
杜靴迪以及狼隊賽程

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:3-5-2
本週陣容

球隊價值(Squad value): 103.6M剩餘資金(In the bank): 0.3M

守門員
法比安斯基(Fabianski)
今場韋斯咸(West Ham)會主場出擊對近4場有3場不勝嘅屈福特(Watford),而韋斯咸嘅勢頭亦非常好,佢哋喺慘敗俾曼城之後就錄得4戰全勝兼2場成功保持不失。表現神勇嘅法比安斯基絕對係功不可沒,喺呢段時間佢做出13個撲救,係全英超第4多。

後衛
阿歷山大阿諾(Alexander-Arnold)
上面都交代得好清楚阿歷山大阿諾嘅情況,佢好大機會喺今場對狼隊嘅比賽都未能趕及復出。不過,唯有盼望個天唔好落雨,阿歷山大阿諾能夠趕得切復出;就算唔得,都仲有陣入面嘅狼隊後衛賓納特(Bennett)頂上,我都仲可以寄望兩隊踢成0比0,雖然機會係比較微。
羅拔臣(Robertson)
今場利物浦(Liverpool)將會作客對狼隊,狼隊嘅勢頭唔錯,近4場錄得3勝1負,而且仲係連勝3場,實力絕對係不容忽視。而利物浦近4場比賽就有2場能夠保持不失球,不過,羅拔臣近4場只係踢咗3場,但嗰2場利物浦冇失波,佢都係正選上陣踢足90分鐘,由此可見佢對利物浦嘅後防係幾咁重要。
馬高斯阿朗素(Marcos Alonso)
車路士(Chelsea)今場將會主場對李斯特城(Leicester),李斯特城嘅近況就一般,近4場錄得1勝1和2負,而車路士就錄得3勝1負同埋2場不失球。車路士嘅狀態都唔錯,尤其是喺車路士贏完曼城之後。不過,阿朗素嘅狀態就好似麻麻,冇咗好似開季嗰陣咁銳利,佢開季曾經4場交出1入球5助攻,但經過咗十幾輪賽事之後,佢依家都只係累積咗1入球7助攻。希望今場佢都能夠為車路士保持不失球同進攻上帶嚟貢獻。

中場
李察利臣(Richarlison)
今場愛華頓將會主場硬撼熱刺,李察利臣嘅狀態都唔錯,近4場入2球,而佢入唔到波嗰兩場就係分別對住利物浦同曼城,入唔到波都係情有可原。佢近4場總共作出12次射門,平均每場會嘗試作出3次射門,係愛華頓陣中射門次數最高嘅球員。
夏薩特(Hazard)
夏薩特上場對白禮頓(Brighton)勇戰受傷,希望佢今場趕得切復出對陣李斯特城啦。夏薩特近況表現不俗,近4場交出1入球5助攻,係呢段時間交出最多助攻嘅球員,而且係連續4場都交出助攻。齋睇數據,佢絕對係今個星期嘅隊長人選,但可惜佢足踝受傷,令到我唔夠膽揀佢做隊長。
安達臣(Anderson)
安達臣近4場交出2入球2助攻,狀態好好,佢近4場錄得8次射門,同隊中前鋒查維亞靴南迪斯(Chicharito)並列隊中第一。另外,安達臣喺呢段時間亦交出6個關鍵傳送,係隊中第二,比辛迪加斯(Snodgrass)少。不過咁亦足以證明安達臣係韋斯咸陣中比較全面嘅球員,既有入球能力,亦有助攻能力。
辛尼(Sane)- Captain
曼城今場主場對水晶宮,雖然上上個星期曼城嘅不敗金身俾車路士破咗,但好快佢哋又已經重回勝軌,上場對愛華頓旗開得勝。水晶宮近4場錄得2勝2負,狀態不過不失,但係對住今季僅輸一場嘅曼城,睇怕都係凶多吉少。辛尼近4場交出1入球3助攻,表現唔錯。今場選擇揀佢做隊長嘅原因,都係不外乎佢嘅狀態,佢近4場錄得7次射門同交出10次關鍵傳送,射門次數係隊中第3高,而交出關鍵傳送嘅次數更加係全隊最高。另一方面,揀曼城球員做隊長嘅其中一個風險就係怕輪換,但今場決定揀佢嘅另一原因就係都幾肯定今場辛尼會正選上陣,一嚟喺週中嘅聯賽盃辛尼並冇進入大軍名單,得到休息嘅機會;二嚟今季喺文迪缺陣下嘅8場比賽當中,辛尼都悉數上陣,但當文迪正選上陣嘅9場比賽入面,佢只係得2場係有正選,變到好似有辛尼就冇文迪,有文迪就冇辛尼。咁當文迪確定要長抖到出年二月先復出,辛尼未來呢個幾月嘅正選位置都相當穩陣。另外,曼城今季對住非Big 6球隊嘅場均入球數達到3.5球,預計今場應該又會係一場大手交易嘅比賽。
孫興民(Son)
熱刺今場會作客愛華頓,愛華頓嘅近況同熱刺比,真係天與地。愛華頓近4場不勝,錄得2和2負;而熱刺就相反,近況大勇,近4場錄得3勝1負,仲要係聯賽3連勝。至於孫興民嘅狀態亦非常好,近4場交出2入球2助攻,係上場因為後備落場踢得15分鐘先冇表演機會。睇返佢近4場正選上陣嘅比賽,佢更加係3入球2助攻嘅亮麗表現,希望普捷天奴都見到上場冇咗孫興民同艾歷臣(Eriksen),熱刺嘅進攻係幾乏力,希望今場孫興民能夠正選落場啦。

前鋒
威爾遜(Wilson)
般尼茅夫(Bournemouth)今場會主場迎戰白禮頓(Brighton),以近4場嘅比賽嚟睇,白禮頓嘅近況係稍稍比般尼茅夫好,白禮頓錄得2勝2負,而般尼茅夫就1勝3負。威爾遜因為之前受傷,都係上場先後備落場。若果淨係計佢受傷前嘅表現,佢傷之前係連續2場有波入,希望佢今場會正選上陣兼重拾佳態啦,皆因白禮頓對上7場聯賽都有失球。
卡尼(Kane)
卡尼近況同孫興民一樣都係近4場交出2入球2助攻,而計返近4場正選落場嘅比賽都係交出3入球2助攻,真係好弗。卡尼已經係喺連續6場正選上陣嘅比賽入面,都能夠作出進攻上嘅貢獻,喺呢段時間交出4入球3助攻,狀態超級好。唯一希望就係佢今個星期能夠正選上陣,但係最新消息係卡尼感冒,希望佢早日康復,聯賽盃就休息下,聯賽先復出啦。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→