歐霸杯決賽前夕，BT Sports流出了車路士公開訓練嘅片段。訓練即將完結之際，只見沙利非常嬲豬地掟帽而去，一度引起車路士更衣室係咪又有內亂嘅傳聞，車仔奪冠前途一度風聲鶴淚。
最後，車路士以團結一心嘅姿態奪得歐霸盃冠軍，沙利亦奪得自己執教生涯第一項大型錦標，不再嬲豬。既然內亂似是子虛烏有，咁沙利嘅衝冠一怒，又到底係因何而來呢？
法比加斯喺接受BT Sports訪問嘅時候解釋，話沙利一直有個近乎強迫性嘅習慣，就係中意喺操練最後嘅時候進行死球訓練，以便球員臨上場嘅時候更有效地記得各種set piece嘅routine。但係由於歐霸盃賽前嘅最後一節操練係公開操練，即傳媒可以全程參觀拍攝，導致死球訓練基本上變得不可能（唔通俾人拍低曬公告天下咩，因間上場仲點用）。
法比仔表示，呢種脫離沙利慣常動作嘅臨時更改，應該係“It's too much for him”，動搖左佢嘅迷信。所以掟帽嬲豬，可能就同我地唔覺意拆左人地嘅風水大陣一樣，係個合情合理嘅反應。
而事實上，沙利迷信嘅小習慣，絕對唔止呢一項。歐霸盃四強隊法蘭克福嘅互射十二碼，沙利並沒有喺開射之前同球員、教練一齊埋堆打氣。不合群？非也。佐真奴話，比賽正式結束之前，絕不踏入球場同絕不碰觸皮球，係沙利堅定不移嘅習慣。而到最後，呢個迷信都似乎生效，車路士成功互射十二碼擊敗法蘭克福，晉身決賽。
（咩話？你話呢個迷信冇保佑到車仔聯賽盃決賽互射十二碼贏曼城？I don’t know what 7 you say喎哈哈哈哈……）
沙利嘅各項迷信，自從佢喺意大利低組別執教開始，就有先例累積至今。例如曾經有場比賽之前，有球員飲左三杯咖啡，然後球隊順利贏波。自此，沙利就一直要求該名球員開波之前一定要飲三杯咖啡。或者係，每當揸車經過一個髮夾彎嘅時候，沙利就一定要點番支煙，如果唔係就會為下場比賽帶來不幸。
最兵不厭詐嘅事例，莫過於2016年意甲聯賽，拿玻里主場迎戰羅馬。當時嘅拿玻里已錄得連續22場聯賽主場不敗。賽前羅馬教頭史巴列提得到消息，話沙利有項迷信，就係一定要係最後一個進入球場範圍嘅人。於是，史巴列提就假裝已經離開通道，等沙利斯斯然地將要踏入球場之際，先至突然出現喺沙利身後，再跟住沙利行出去。沙利想行番轉頭，但都為時已晚。
賽果？羅馬作客3-1擊敗拿玻里，史巴列提「反迷信」成功。
突發奇想嘅係，沙利今次賽前嬲豬，最後成功奪冠。唔知佢會唔會從今以後，每次大型決賽前夕，都會搵啲理由黎嬲豬呢？我地拭目以待。
請支持Facebook專頁「車迷Z」！
資料來源：
https://twitter.com/btsportfootball/status/1133795143562215424
https://www.dailymail.co.uk/sport/football/article-7012971/Maurizio-Sarri-steered-clear-huddle-players-extra-time-superstition.html
https://www.dailymail.co.uk/sport/football/article-6296161/The-eccentric-superstitions-Chelsea-boss-Maurizio-Sarri-revealed.html
請按此登錄後留言。未成為會員? 立即註冊