足球的意義--捨棄「歐超聯」的原因

車迷Z 於 19/04/2021 發表 收藏文章
對你而言,足球係乜?

係電視汁撈飯嘅視覺娛樂?好似TVB同Viu咁,新嘅永遠比舊好,UEFA同FIFA出面鎮壓就係老屎忽搞事,所以潮撐ESL?

定還是,足球對你嚟講,係一項運動?

係你喺球場外獲得嘅一切獎賞,都係你場上表現嘅回報。每一次跑動傳波攔截射門,都會喺90分鐘後嘅賽果被反映。每一個90分鐘累積而嚟嘅賽果,都會轉換成賽尾嘅積分,或者淘汰賽嘅晉級,幫你換嚟更多嘅獎金,更好嘅排名,更高級別比賽嘅參賽權,同更強嘅對手同場競技。

聯賽嘅升降班,各項盃賽嘅參賽資格,盃賽嘅晉級,一切一切,都同成績直接掛勾。今日無論你係代表港超出戰亞冠,定係代表英超出戰歐冠,你嘅參賽名額都係你贏番嚟嘅。你喺聯賽表現出色有前四,喺歐聯過關斬將攞冠軍,就獎勵你下季有得出戰頂級水平嘅賽事。

能者居之嘅獎罰系統,確保球隊落場必須全力拼搏嘅競技精神。足球係一項體育,就應該要stand for呢兩個核心價值。

而ESL,係對呢兩個價值,最最直接嘅褻瀆。

參賽資格內定,12間元老會永續。代表啲咩?

代表歐洲頂級賽事嘅獎賞,呢舊本身係reward一間球會喺本土聯賽表現優異嘅獎賞,將會被元老會無視聯賽表現地,永久性地據為己有。
以今季英超為例。李斯特城、韋斯咸異軍突起,Big 6車利阿熱全部馬前失蹄。李城西咸表現優異,應該得到獎勵;車利阿熱表現欠佳,歐洲賽呢粒糖今次輪唔到你分。能者居之,好合理丫。

就係要李城西咸諗盡辦法突圍而出,就係要車利阿熱竭力唔俾後起之秀追上,各支球隊先會齊齊搏哂命扭盡六壬,英超先會因此緊湊好睇。稍有鬆懈就會被追過,得益嘅係球迷嘅觀看體驗。

有ESL嘅世界會係點?咩話?李城同西咸分列第三第四?Sor喎,元老會集體通過唔俾你哋踢ESL。阿仙奴聯賽排名下滑到下半板?唔緊要,永續!

粗啲講句,咁仲踢春袋咩?

贏嘅冇獎,輸嘅冇罰,咁隊隊都走出嚟同你「阿姨我不想努力了」啦。

以為ESL場場豪門火拼好精彩?唔係喎,ESL嘅元老會,有咩原因要同你起哂槓互片呢?

現狀之下,豪門火拼物以罕為貴就其一啦。其二就係,當球會可以獲得嘅獎賞必須要同場上表現掛勾時,球隊先有incentive盡可能地增強自己實力,否則就不進則退。同高水平嘅對手競技,先提高到自己嘅賽力。唔趁喺歐聯嗰陣攞多啲exp升LV,番到聯賽唔夠砌分分鐘歐霸都冇得你踢。為競技,為獎金,球隊都不得不傾盡全力。

元老會有傾盡全力嘅incentive嗎?冇。就算當你年年睇四次國家打吡唔會審美疲勞,ESL永續代表趕你唔走,一個invite only嘅高級會所。元老會自立為王,都已經「榮登」盈利嘅世界之巔,仲邊有動力精益求精落去?如此慵懶嘅環境,真係孕育到高水準嘅賽事咩?

大家記唔記得2012,車仔嘅奇蹟奪冠?

點解嗰季歐聯有咁重大嘅意義?Because everything was at stake.

聯賽第六收場,唔喺決賽搏盡下季就歐霸見。而如果唔係嗰季贏到歐聯,以夏薩特為首嘅一眾球員就唔會加盟,車仔亦唔會有往後近十年嘅風光。喺各種意義上,喺慕尼黑當晚我哋絕對輸唔起,所以贏波先顯得如此爽快。

而喺有ESL嘅世界,呢一切,都會變得毫無意義。

聯賽第六?唔緊要啦,反正ESL都永續。
決賽輸咗?唔緊要啦,反正ESL都永續。

轉會毫無意義,戰術毫無意義,創新毫無意義,同足球有關嘅一切新聞,都變得毫無意義。反正結果都一樣。

元老會唔係唔知ESL會損害足球嘅competitive integrity,唔係唔知咁做會趕走啲真心熱愛足球,佢哋口中嘅「過氣球迷」(legacy fans)。

They just didn’t care.

當佢哋明知此舉同足球背後嘅價值背道而馳,但都依然故我時,代表佢哋將盈利睇得比呢項體育體育更加重要。

掛羊頭賣狗肉。門面上繼續掛住「足球」嘅招牌,暗地裡做嘅嘢卻一點都冇考慮過競技精神,然後繼續sell你呢個依然係一項體育盛事。

所以大家明白,點解我會將ESL,拎嚟同香港嘅「完善選舉制度」比較未?

如果你本身唔care選舉背後嘅精神,咁個選舉變成點你都唔會覺得有問題,咪又一樣有票你投。

反之,如果你重視選舉背後應有嘅精神,你就會辨認到點先為之一個真正嘅選舉,點又為之一場自欺欺人嘅鬧劇。

同樣道理,如果你視睇波為娛樂,有22個人喺場上追住個波跑就OK嘅,咁我深信ESL都一樣提供到你想要嘅觀感刺激。

但對我而言,睇波重要嘅係「波」,唔係「睇」。係因為我睇緊嘅係足球,係我熱愛嘅運動,我先至對之如此癡迷。

ESL對我嚟講唔係「足球」,佢只係一樣純商業化嘅「商品」;車路士亦唔再係一間「球會」,只係一間提供商品嘅「公司」。

身在香港,過去幾年嚟因為各種原因而停止消費同使用嘅商品,早就多不勝數。車路士,只係罷買名單上,最新嘅一個entry。

Facebook專頁傳送門:https://www.facebook.com/ChelZfan
FanPiece專欄傳送門:https://football.fanpiece.com/ChelZfan/
MeWe聊天室傳送門:https://mewe.com/join/chelzfan

如果喜歡我們的文章,請即分享到︰

標籤: 車路士  歐超聯  英超  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→