「睇波,到底為乜?」──回應城迷的公開信

車迷Z 於 31/07/2020 發表 收藏文章

  近日香港球迷圈最沸沸揚揚嘅新聞,莫過於曼城香港球迷會同英超官方合辦嘅「會員一人一票揀出嚟嘅曼城英超歷史最佳十一人」。票選結果出爐後,果不其然罵聲四起。其中大衛施華嘅缺陣自然引來一面倒嘅負評。而十一人陣容中絕大部分都係近兩年先加盟或上位嘅球員,亦可見投票人員嘅波齡之淺。當然,原本呢壇新聞大家都只當係花生,圍爐抽下水恥笑下就算。

  直到見到友頁《足字室》post左多年城迷「陶仔」寫嘅公開信之後,忍唔住想執筆回應。建議大家睇完封信之後先繼續睇落去。


  首先,「勝利球迷」嘅現象其實無論何時何地都會發生。歐洲或南美洲諸國嘅足球環境同香港唔同,從職業到業餘嘅足球遍地開花。當你無論喺邊度出生、長大,或者生活,邊度都會有local team,而你自然就會成為local team嘅球迷。甚至於當local team會成為local community嘅一部份嘅時候,“support your local team”就自然成為足球生態嘅基石,亦係大多數人「挑選」自己愛隊嘅準則。

  然而香港冇呢支歌仔唱。本地足壇近年黎嘅景況同上世紀末曾經出現過嘅高峰相比令人嘆息,local team嘅氣息薄弱得可憐(某隊嘅主場可以走到去廣州就唔好話咩local啦)。既然冇辦法用local team去填補需要一支愛隊嘅心靈需求,就只能將目光投放到其他地方。電視上佔air time最多嘅往往係歐洲頂級聯賽,所以唔少人嘅愛隊都落戶英西意德(都要知道隊波存在先有得撐架)。然後英超自1992年起就係商業化同全球推廣做得最成功嘅聯賽,又兼之唔少香港人因港英年代對英國有情意結,所以支持英超球隊嘅自然佔大多數。到最後,要吸引球迷嘅方式無非係風格賞心悅目,中意某個球星,或者係靠冠軍同獎盃累積人氣。畢竟大家睇波都係求個享受,冇對local team嘅必然忠誠下,冇乜邊個會被虐狂到因為想睇自己愛隊輸波而專登支持降班膽。自然而然地,前列份子同傳統豪門吸引到香港球迷「誤上賊船」嘅機率自然高於中下游球隊,最後造就所謂「勝利球迷」嘅現象。


  所以,對於城迷普遍波齡偏淺呢件事本身,筆者本身冇咩特別感覺。就同大家經常揶揄「08之前無曼城」一樣,04之前一樣無車仔。當然唔係話呢兩隊波喺一夜暴富之前毫無歷史(唔好打我thx),但倘若冇油王同文穌爾入主後喺轉會市場上掀起波瀾,就唔會有日後日漸堅實、足以同傳統豪門分庭抗禮嘅陣容,更唔會有再之後用一座又一座嘅獎盃開創嘅皇朝盛世。知名度、球星、獎盃,都係因資金入主而來,亦係喺香港(或英國以外嘅其他世界各地)吸納球迷非常重要嘅誘因。起碼就筆者個人黎講,冇油王,就唔會有我一開始喜歡上嗰隊車仔,也就自然唔會往後支持車仔咁多年嘅車迷Z。用呢種形式去速成一支球隊是否道德係另一個議題,但以「暴富」作為契機喜歡一支球隊嘅「勝利球迷」,係香港黎講筆者覺得無可厚非。


  然而喺公開信所道出,而筆者閱後覺得非撰文探討不可嘅,非是曼城充滿勝利球迷嘅現象,而係部分所展現出黎嘅行徑令我不禁反思,佢地支持嘅到底係曼城,定係其他啲咩野?

  「睇波,到底為乜?」


//然後?新球迷為的只是經常贏波可慶祝的喜悅,曼城奪冠可以在其他球迷朋友而前「巧威威」,有幾個會真正去關心了解曼城的架構、歷史及球會文化?

所以當我們討論新轉會總監及CEO有問題時,只想「快樂無窮」的新球迷當然不想聽,但他們很多卻連我們談論的人是誰都不認識,於是「加把口」時只能說一些虛無飄渺的「大話」:例如「什麼球迷就是要無條件支持球會!」「你睇人咁叻唔見你去做?」之類。

但新球迷不會去理轉會總監是誰,他們只想每週贏球開心,回學校同同學認威,平常聊天只想吹噓曼城現在多強未來如何肯定稱霸歐洲云云……於是球會慢慢開始被逼分裂。

由那時開始,不論球會買什麼人或做什麼都必須「睇好」 例如邦尼、羅列圖、史東斯,有老球迷表示不看好就會被新球迷罵到「開巷」,話你「柴自己球會台,冇資格做球迷。」//


  原來呢個世界有啲人睇嘅唔係「波」,而係「虛榮感」。

  係圍爐取暖,自以為是嘅「優越感」,同埋倚靠道德綁架他人而來嘅,「團結」嘅假象。

  字裡行間,筆者睇到陶仔對香港城迷現狀嘅心灰意冷,但更見到佢對足球呢項運動喺球迷間被扭曲至此嘅痛心。


  喺「乜迷物迷」之前,我地首先應該要係一個「球迷」。所喜歡嘅喺某隊波之前,應該要先喜歡嘅係足球呢項運動。

  往最深處黎講,經過多年黎嘅千錘百鍊,再加上近代科技發展後一日千里嘅專業化,其學問最艱深可以艱深到許多講足球視為終生職業嘅人窮其一生都冇辦法將其參透,一般球迷所能夠接觸到嘅專業知識可能連皮毛都不如。同唔少身邊嘅朋友吹水,大家都有個共識就係概嘆原來當年嘅自己,真係好撚唔識睇波。
  然而大家都係從最淺層嘅地方開始接觸足球。無論係街場跟隊靠速度鳩爆,然後發現俾當初睇唔起嘅亞伯軍團搓到撚狗咁撚(土瓜灣啲亞伯會係筆者畢生嘅心理陰影);定還是從Winning/FIFA入手,以為球員速度快好扭有身位就係勁,in game好用程度直接反映球員實力,然後漸漸發現數值不代表一切,現實世界嘅比賽有好多遊戲數據無法計算嘅部分……總之,係球迷就會經過最初嘅無知時期,筆者也絕不例外。但係隨住智慧嘅成長,人嘅成熟,慢慢就會發現職業足球嘅世界同街場、打機唔同,內裡包含嘅學問比以前坐井觀天嘅自己想像中多好多(然後就會想搭時光機捏死當初on99嘅自己)。


  當然,每個人睇波嘅方式唔一樣。有人睇波係為追求刺激,對更深奧嘅球壇知識毫無興趣,僅停留喺「觀賞娛樂」嘅程度就夠,呢點筆者絕對尊重大家嘅自由。筆者亦都清楚自己對戰術理解嘅追求係著迷到接近異類嘅程度。但係唔追求還唔追求,對足球嘅深度應有嘅認可同尊重點都唔可以少。

  「高深嘅野我唔識,所以我唔討論,不過你地繼續」,呢種心態冇任何問題;「我唔識,我唔聽,所以你都唔可以講落去」,呢種本質上同「呀叻精神」毫無分別嘅心態,就好撚有問題。


  對足球嘅學問不求甚解,是為無知;以為足球嘅本質僅得自己所知皮毛都不如嘅深度,是為膚淺;滿足於自己嘅無知同膚淺且沾沾自喜嘅,是為坐井觀天;將自己嘅坐井觀天視之為唯一真理,將膚淺演繹成優越感,以自己嘅無知為榮,是為夜郎自大;用夜郎自大去拒絕任何形式嘅理性對話,無法反駁時就用情緒勒索還擊(「柴自己球會台,冇資格做球迷。」),是為褻瀆。

  對球迷,對球會,對足球,甚至對人與人之間應有嘅基本尊重而言,都係褻瀆。

  而睇波,唔應該係為左呢啲。


  「睇波,到底為乜?」

  無論係為刺激,為享受,為放鬆,為球星,為忠誠,為戰術……

  無論係為咩都好,冇人應該係為左褻瀆他人而睇波。

//然而這些FEEDBACK,新球迷不喜歡聽,他們只要聽:

「耶穌仔未來金球球王」

「巴西前鋒會廢得去邊?識唔識睇波架」(然後說這話的人卻連鄧加是誰都不知道)

「哥佬放得佢(辛祖、桑尼)走,就梗係知佢地廢留住都冇用啦,你睇人另過哥佬唔見你去教?」

「你覺得耶穌仔勁唔過文尼,簡尼,戴巴拿,你咪躝去捧利記祖記囉!」

是的,「你叻唔見你去教」便是我們老球迷被逼走趕走時,響在耳邊的說話。

老球迷,別說不能「彈」球會、(特別是哥佬)任何事,就連他們吹奏哥佬史上第一時,你提出自己看法:「史上第一太誇了吧?當今前三就差不多吧」,只要不陪他們吹奏,他們都會叫你「躝去利X啦」//

  如果陶仔有機會睇到呢封信,筆者希望講嘅係:

  縱使我地無法阻止他人以我地所不期望嘅、大不敬嘅方式去睇波,去撐你最喜愛嘅曼城,最喜愛嘅足球;

  但你所推崇嘅,一個球迷,一個城迷所應該有嘅姿態,並冇徹底喺呢個世界上流失。

  或者我冇辦法同你一同分享支持曼城嘅喜悅(sor之前贏你地2-1真係好撚爽);

  但撇除車迷嘅身分,作為最純粹嘅球迷,我好能夠感受到你對足球嘅熱愛同執著。

  You are not alone.

請支持Facebook專頁「車迷Z」!

資料來源:
https://www.facebook.com/ZukZiSatHK/photos/a.1382947152011989/1944063239233708/?type=1&theater
https://www.facebook.com/mcfchongkong/photos/a.821962131223398/3150336865052568/?type=1&theater
https://www.facebook.com/414854688592788/posts/3291727060905522
https://www.facebook.com/SoccerTwoAndThree/photos/a.1159846390747656/1551606404904984/?type=1&theater
https://twitter.com/dubaialliance/status/1048103845480550400
https://www.foxsports.com.au/football/premier-league/epl-extra-time-pellegrinis-depressing-farewell-and-st-totteringhams-day-still-alive/news-story/0b90b0cd65254bd73bedd9901d093ca6
https://forum.hkgolden.com/thread/7144607/page/1
https://www.youtube.com/watch?v=ZYQPJ5mErO0
https://twitter.com/pgwear/status/690258889036697601

如果喜歡我們的文章,請即分享到︰

標籤: 車路士  曼城  

留言


請按此登錄後留言。未成為會員? 立即註冊
    快捷鍵:←
    快捷鍵:→