基士文、尼馬--巴塞高層:「我全都要!」

車迷Z 於 25/06/2019 發表 收藏文章

近日傳得沸沸揚揚嘅「簽基士文」同「尼馬愛回家」傳聞,可能全部屬實!加泰隆尼亞電台報導,巴塞高層今個夏天,想將基士文同尼馬一同簽下。呢種「FIFA式」嘅買人,會為來季嘅西甲歐聯,掀起幾大嘅腥風血雨呢?



基士文嘅離隊風波,最早於5月15號傳出,當時馬體會官方宣布,基士文已向會方表明,將於季尾離隊。基士文作為馬體會當家射手,又非是季尾約滿,喺未完季就由會方正式宣布球員已決定離隊,縱觀球壇算係史無前例嘅舉動。更耐人尋味嘅係,會方僅宣布球員決定離隊,而唔係宣布已與某球會達成轉會協議,一時之間對基士文下家嘅揣測同謠言滿天飛。


到6月12號,馬體會CEO接受訪問時表示,基士文嘅下家早已確認係巴塞。而到宜家都仲未有正式宣布嘅於原因,係基士文合約中嘅解約金條款,將於2019年7月1號由€200M下調至€120M。1億2000萬簽一個當打之年嘅世界級前鋒,喺現今嘅轉會市場上,算係非常相宜嘅價格。所以筆者猜測,巴塞會等到7月1號減價之後,先至正式宣布簽下基士文。反正稍等幾個星期就節省8000萬歐元,何樂而不為?


另一邊廂,尼馬嘅「愛回家」就複雜得多。雖然有媒體指出,巴塞會方已經就尼馬回歸後嘅個人待遇達成共識,但係要點先說服到PSG放人係最大嘅難關。最先傳出PSG對尼馬嘅標價為€350M。但巴塞今個轉會窗已經€75M簽入迪莊,再加上€120M嘅基士文,好難想像巴塞仲可以負擔得起尼馬嘅轉會身價。有見及此,巴塞正考慮以€100M加球員交換嘅形式簽下尼馬,烏迪迪、拉傑迪、古天奴、O.丹比利,都係巴塞認為可以用黎交換嘅球員。


當中成事率最高嘅,應該係O.丹比利。本身係法國人嘅O.丹比利對於回歸法甲並不抗拒,亦有報導指出佢對於可以喺PSG同國家隊隊友麥巴比聚首深感興趣。另一方面,O.丹比利今年22歲,而且係法國人,可利用嘅場上同商業價值都相當高,對於PSG而言可能係比尼馬更適合球隊嘅選擇。拉傑迪31歲年事頗高,古天奴表現欠穩定,作為尼馬轉會嘅添頭吸引力非常有限。而25歲嘅烏迪迪前途無限,有望成為巴塞未來10年後防嘅定海神針,對巴塞嘅價值絕對高於尼馬,難以想像巴塞會自毀長城地用佢黎交換尼馬。


倘若基士文同尼馬都真係加盟巴塞,加上蘇亞雷斯同美斯,會否組成MS. NG (Messi, Suarez, Neymar, Griezmann) 嘅「吳小姐」前線組合?Well,打機可以嘅。但現實上,三箭頭會由美斯、基士文、尼馬擔正嘅可能性最高,年屆32歲嘅蘇亞雷斯則擔任後備。蘇亞雷斯接受烏拉圭記者採訪時亦曾經明言,理解會方尋求自己接班人嘅做法,並且唔抵觸擔任後備。所以要見到「吳小姐」四箭頭同場獻技,應該要等到巴塞急需搶攻之下先有機會見到(或者打FIFA隨便用)。


順帶一提,報導呢則消息嘅Lluís Canut係加泰隆尼亞嘅老牌體育記者,消息嘅可信性非常之高。不過一句到尾,兩個都簽只係巴塞高層所決定嘅方向,能否實現尚有許多未知之數。


請支持Facebook專頁「車迷Z」!

資料來源:
https://www.ccma.cat/catradio/alacarta/tot-gira/lluis-canut-la-directiva-del-barca-vol-fitxar-neymar-i-griezmann-ho-tenen-decidit/audio/1043821/
http://www.sportbible.com/football/news-atletico-madrid-ceo-confirms-antoine-griezmann-will-move-to-barcelona-20190612
https://twitter.com/Atleti/status/1128393319090933761?s=19
https://twitter.com/FApor_elmundo/status/1141266404043366400
https://globoesporte.globo.com/google/amp/futebol/futebol-internacional/noticia/barcelona-encaminha-a-volta-de-neymar.ghtml?__twitter_impression=true
https://www.football-espana.net/75397/luis-suarez-its-normal-barcelona-will-look-my-replacement

如果喜歡我們的文章,請即分享到︰

標籤: 巴塞  轉會  基士文  尼馬  PSG  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→