[全場終] 車路士 4-1 阿仙奴(歐霸盃決賽)

車迷Z 於 30/05/2019 發表 收藏文章
今場嘅車仔,真係贏得實至名歸。而being able to say that,原來係咁有滿足感嘅一件事。

感性抒發就到呢度,入正題,賽後分析。


1. 其實今場唔係打緊Sarriball

綜觀全場形勢,車仔最有威脅嘅幾次進攻,都唔係靠水銀瀉地嘅地面進攻而黎。控球比率49%-51%,四球入波嘅進攻兵源都不超過三人,話今場車仔立足於防守反擊其實都不為過。而快速反擊之下,基奧特頻頻衝擊阿仙奴禁區,造就足夠空位等後上嘅艾馬臣、柏度、夏薩特有帶波同出波嘅空間。

如果大家仲記得之前英超,阿仙奴主場2-0擊敗車路士嘅賽事,就應該有印象嗰場擔任阿仙奴攻中嘅係藍斯,靠跑動能力直接剋死負責組織嘅佐真奴。再加上4-3-1-2嘅陣式,令阿仙奴於中場中路有局部嘅人數優勢,導致執著於上腳嘅車路士喺自己半場就吃盡苦頭。

所以相比之下,今場嘅車路士一定程度上讓出球權,而且刻意將柏度拉到最右邊,並起用可以擔任橋頭堡嘅基奧特做正選,其實都係吸取兵敗酋長球場之後嘅教訓所作出嘅調整。進攻立體化,避免反擊套路過度左傾,再加上阿仙奴排出中場失勢嘅3-4-1-2,從戰術層面上,車路士全場其實從未落過下風。



2. 銀河唯一

毫無疑問,100%嘅全場最佳。第一球可以將一個艾馬臣嘅chip傳,從禁區邊插水式頂入龍,傳統中鋒嘅功架無庸置疑;第二球親自吸引三個中堅,拉空曬,再助攻俾柏度,係Target Man拉空同護波嘅表現;第三球12碼,係成功走位接應隊友拉出嘅空位,先搏到美蘭奈爾斯情急之下犯規。

老實講,阻礙基奧特晉身一流前鋒嘅,一直都只有佢嘅門前把握力。所以第一球黎講,我更覺得係人品爆發嘅偶發性事件。但確實係有佢嘅第一球,先有車仔優裕地以逸待勞嘅第二、三、四球。或者佢冇辦法成為高產射手,但係作為戰術性中鋒,佢真係一個非常好使好用嘅球員。
(FM玩家表示好嘅Target Man真係千金難求,一街嘅regen都係Advance Forward)


3. 3-4-1-2──艾美利自毀長城

上文提到,阿仙奴排出3-4-1-2嘅陣容,對抗車仔嘅4-3-3。牌面上黎講,係本住增加側擊能力嘅打算,利用球場寬度黎對車仔進行壓制。但係薩卡加托里拉嘅中場組合,對車仔嘅三中場無甚震攝力。進攻方面冇辦法輕易擅離職守持球前進(車仔中場更多人),防守又不形成人數上嘅優勢。高拿仙歷串連中前場就係靠帶波跑,美蘭奈爾斯除左送12碼冇喺直播鏡頭出現過。各自為政之下,阿仙奴進攻上嘅靈感,仲不及19歲小將韋洛克後備入替上黎舞幾腳然後殺入禁區施射。

球員狀態差到極點(例如琴晚奧斯爾)有時係不可抗力。但領隊眼見球員狀態差、進攻板斧失靈之下,都仲要強行起用,而又未能及時做出有效調整嘅時候,就真係責無旁貸。


請支持Facebook專頁「車迷Z」!

如果喜歡我們的文章,請即分享到︰

標籤: 歐霸  決賽  賽後分析  車路士  阿仙奴  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→