[全場終] 車路士 4-1 錫菲聯

文迪clean sheet紀錄中斷有啲可惜，但係麥高歷嘅入波實在太靚，連續四腳反方向嘅短傳，有力入選本月（甚至本季）最佳金球。當然，最重要嘅係今場球隊全取三分嘅表現非常有說服力，亦總算係一報上季作客被炒3-0之仇。


1️⃣ 「被逼」右傾的上半場

上半場嘅錫菲聯一反近日頹態，重拾上季全軍壓迫嘅表現，亦係近幾場比賽以嚟車路士喺己方半場遭受最多反搶壓力嘅一個半場。高華基治頂替因武肺缺陣嘅夏伐斯，帶波時抗壓嘅能力出色，但比起夏伐斯球風略欠侵略性同穿透力。簡迪喺防中位不斷受對方前鋒回撤騷擾，冇辦法成為有效嘅出波點。

此消彼長之下，上半場大部分攻勢都由衝擊力強嘅列斯占士，同埋不斷喺右路拉入一步後用各種長傳進行轉邊同過頭波直線嘅薛耶治發起，而前述抗壓能力強嘅高華基治亦不斷喺右路形成三角形作為呼應。上半場嘅兩個入球，助攻都來自右路。
值得一提嘅係，今場進攻重心嘅變動，頗大程度上得益於今夏「盡收天下兵器」嘅轉會窗。上場對般尼嘅聯賽主打中路，正常情況下上半場中路被封截會對進攻造成好大影響。但車仔目前可以作為進攻核心嘅選擇實在太多，中路塞車就俾薛耶治由配角擔正，而上季嘅車仔並唔具備呢種戰術上嘅彈性。

2️⃣ 錫菲聯收油，薛耶治解放

下半場出嚟之後，錫菲聯上半場嘅pressing intensity幾乎消失無蹤，上半場簡迪等人一直面對嘅騷擾霎時間唔見哂，呢點亦令筆者頗為不解。而結果就係車路士更進一步地dominate possession，下半場控球率一度高達八成，且期間錫菲聯曾經一次射門機會都冇。

薛耶治亦喺下半場越來越多地從右路遊走到球場其他地方，左中右三路都見到佢組織進攻嘅身影，有番喺阿積士擔任進攻核心嘅感覺。之前講到，薛耶治嘅技術特點係會不斷嘗試好多過頭波同長傳轉邊。雖然呢種打法嘅傳球成功率未必好高，但為車仔嘅進攻增加咗上季一直缺乏嘅直接性同侵略性，類似於傳統10號不斷嘗試「最後一傳」。進攻嘅範數，總係越多元化越好。
3️⃣ MOTM: Thiago Silva

冇錯，就係用兩大段字講完薛耶治，然後MOTM唔係佢。但冇辦法，泰亞高施華今場嘅表現真係世界級。上半場錫菲聯pressing最猛嗰輪，好多時係靠施華嘅橫傳同回傳去「拆彈」來自錫菲聯嘅壓力，然後藉此重新指揮防線。簡迪被壓制嘅時候亦係靠施華嘅帶波去暫時填補防中位連接中前場嘅缺口。全場企位預判非常準確，唔使狂奔落鏟都多次搶回同鞏固球權。有佢作為後防「定海神針」之下，對防線其他隊友帶嚟嘅信心亦係立桿見影。喺3-1之前筆者就已經認定今場佢係MOTM，入波只係錦上添花。

請支持Facebook專頁「車迷Z」！