[全場終] 曼聯 0-0 車路士

車迷Z 於 25/10/2020 發表 收藏文章
(道定歉先,版主抱恙,頭赤住地睇足全場,所以觀察同分析嘅深度或會有所欠缺。請大家多多包涵。)

有冇人記得車仔對上一次連續兩場clean sheet係幾時?Coz I sure don't remember.

強強對決嘅比賽,老實講更在意球隊嘅防守表現。相比起上場對西維爾因忌憚對方反擊而多少有啲有後冇前,今場(尤其下半場)喺鞏固防守嘅前提下,進攻表現比上場進步不少。將之理解為球隊往理想中嘅攻守平衡更接近一步的話,版主對今場比賽嘅過程絕對收貨有突。

loading


1️⃣ 曼聯鋒線壓迫

今場車路士牌面上排出3-4-3,簡迪拍佐真奴作為中場中軸。但鋒線上嘅雲拿同夏伐斯近期聯手上陣時,都會形成隱形嘅雙箭頭,再由普利錫擔任喺左右兩路間遊走嘅進攻自由人。考慮埋走位嘅變化,其實大部份時間係打緊3-5-2。

上半場曼聯嘅三叉戟喺無球狀態時幾乎係以人盯人嘅方式mark實車仔嘅三後衛,有效地隔絕車仔後防同中場之間嘅聯繫。加之簡迪同佐真奴都唔擅長喺三閘線銜接中前場,導致車仔進攻組織並不流暢。作為回應,車仔轉為嘗試直接交直線俾夏伐斯劏穿曼聯嘅包圍,但因傳球距離太長所以成效一般。

2️ 攻中收後,翼衛分邊

中路組織不成,就索性喺邊路帶波上前。下半場番出嚟之後,最明顯嘅變動係夏伐斯多咗從鋒線回後到中場協助駁腳,捷維爾同列斯占士帶波上前嘅頻率亦大增。尤其是右路嘅列斯占士,攻防兩端都經常出現喺直播鏡頭,霎時間成為全場最忙碌嘅人。

由於進攻自由人嘅普利錫比較擅長喺左路活動,雲拿中意喺中路靠左,夏伐斯亦中意喺右路靠中,所以進攻時嘅分工非常清晰。進攻群組之間嘅互動喺左路玩波,拉扯出嚟嘅空位就俾右路嘅兩隻閘(占士+隊長)落底傳中。

左右兩team人都制造過唔少機會,但係要逗番中路時,最後一傳嘅處理總係未如理想。呢種唔倚賴中場為進攻提供助力嘅進攻模式,同之前由中場開始組織嘅傳統模式係截然不同嘅戰術。球員嘅走位上多少睇得出適應期嘅生澀,而更為直接嘅打法勢必造成進攻效率嘅減低。始終多咗玩direct passes,好多時係要搏多幾搏去試下會唔會撞手神。所以雖然今場攻勢轉化成射門嘅轉化率低過之前,但尚在可接受範圍之內。

3️ 防守……好似令人安心過之前?
本身諗住更仔細去留意防守體系嘅變化,耐何頭真係痛到睇進攻已經盡哂力,還請大家原諒則個。目測嘅結果係,今季目前三場艾度亞文迪同泰亞高施華都有上陣嘅比賽之中,三場都成功clean sheet,兩者之間應該唔會一啲關係都冇,而有佢哋在場嘅防守望落係比平時更有條理一啲。

喺冇辦法求證佢哋喺指揮防線扮演咩角色嘅情況下,姑且當住係佢哋功勞先。個人亦覺得今場門將同三個中堅都識講法文有好大幫助,冇語言障礙提水都易提啲。

丫同埋,就算冇力留意今場防守部署,都一定睇到艾度亞文迪今場嘅撲救。老懷安慰。

4️ 下一步係?

攻防兩端嘅新體系都漸見雛形之下,下一個要解決嘅問題就係中場。今場兩名中場球員都有少少non-factor嘅感覺,戰術上嘅定位都有啲尷尬。單睇人員配置並唔足以為後防提供強力嘅screening presence,要靠位置後撤維持屏障效果之下,就會同前線產生斷層。有幾次成功放到簡迪帶波上前,但狀態所限成效一般,且一旦被搶到波容易造成中後場空虛。三線距離嘅平衡,以及中場喺轉守為攻需要扮演嘅角色,將會係之後要刻畫得更清晰嘅課題。
5️ VAR

科技原意甚好,耐何坐房條友on9,到頭來都係人嘅問題。場上球證會睇漏眼絕對可以理解兼體諒,但有乜理由坐房嗰個可以完全提都唔提麥佳亞對艾斯柏古達嘅犯規,meanwhile覺得拉舒福特嗰腳需要review?你要review拉舒福特係potential penalty我都算,但有乜理由麥佳亞嘅熊抱唔需要被review?呢鑊責任100%喺VAR球證身上。

6️⃣ MOTM: Edouard Mendy

好難有異議啦下話。緊隨其後嘅係列斯占士。

請支持Facebook專頁「車迷Z」!

如果喜歡我們的文章,請即分享到︰

標籤: 英超  賽評  曼聯  車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→