後備陣容都有力挑戰世界盃？法國隊陣容深度驚人

法國隊目前以奪標熱門身份出戰世界盃，球隊陣容深度驚人，即使排出第二陣容，同樣有力挑戰錦標。最後一場熱身賽，憑藉奧利斯（Michael Olise）大演帽子戲法以3-1擊敗北愛爾蘭，整體狀態火熱。


後防線方面，門將位置由蘭斯嘅21歲新星利沙（Robin Risser）把關，佢今季喺法甲錄得11次清白之身，僅次於里爾嘅奧沙（Berke Ozer）。

右閘古斯度（Malo Gusto）雖要同昆迪（Jules Kounde）競爭，但後備上陣對北愛交出助攻，表現搶鏡。

中堅組合可派出干拿迪（Ibrahima Konate）同拉克萊（Maxence Lacroix）；干拿迪雖因喺利物浦最後一季狀態下滑而淪為後備，但已獲皇馬免簽引入；拉克萊則喺水晶宮踢足35場英超，成功入選國家隊。

左閘方面，盧卡斯靴南迪斯（Lucas Hernandez）同甸尼（Lucas Digne）皆可勝任，前者今季為PSG雙冠王貢獻25次上陣。
中場線後備力量同樣雄厚。防守中場干尼（Manu Kone）效力羅馬，今季表現出色助球隊奪得第三名，已為法國上陣14次。年僅20歲嘅沙亞艾馬利（Warren Zaire-Emery）幾乎肯定成為未來核心，已為PSG出戰183場，國家隊則有11次；一旦拉比奧特（Adrien Rabiot）或曹亞文尼（Aurelien Tchouameni）表現失準，佢將隨時頂上。

前場攻擊組合極具創造力。右翼阿基利奧治（Maghnes Akliouche）今季為摩納哥貢獻6個入球及6次助攻，僅9次國家隊經驗，但世界盃表現勢必吸引豪門關注。

攻中卓基（Rayan Cherki）技術出眾，能以後備改變戰局，雖然前面有丹比利（Ousmane Dembele）壓陣，但教練迪甘斯（Didier Deschamps）深知其質素。

左翼巴高拿（Bradley Barcola）屬PSG豪華鋒線一員，今季攻入11球，國家隊20次上陣入3球，可勝任前線多個位置。
箭頭杜林（Marcus Thuram）雖難以動搖麥巴比（Kylian Mbappe）正選，但呢位國際米蘭前鋒今季意甲29場入13球，轉為法國隊正選亦足以信賴。