朗尼潑曼聯冷水：下季爭前四現實啲 精選

曼聯今季（2025/26）成績有明顯回升，最終以聯賽第三名完成球季，相隔兩年後重返歐聯舞台。球隊能夠扭轉頹勢，關鍵在於年初辭退艾摩廉（Ruben Amorim）後，由卡域克（Michael Carrick）接掌帥印。卡域克上任後立即帶來正面影響，喺17場比賽中取得12勝3和2負嘅佳績，仲提前多輪鎖定歐聯資格，顯示出佢喺短時間內成功激活球隊。呢位傳奇中場最終亦順理成章獲正式任命，外界對佢帶領球隊再進一步嘅期望愈來愈高。

不過，曼聯名宿朗尼（Wayne Rooney）就認為，現階段講爭標未免太樂觀。佢喺 talkSPORT 接受訪問時直言：「我認為曼聯過去幾年球迷好難搵到快樂，但自從米高接手後，球迷重新有希望同信念。」朗尼指出，球隊能夠以第三名完成球季，新簽入嘅球員表現唔錯，重返歐聯係好嘅開始，希望管理層繼續增兵協助球隊邁向下一步。「所以我覺得有進步，情況好轉咗，希望我哋能夠睇到有一位好教練嘅成果。」


呢位40歲嘅英格蘭名宿補充話：「我上星期同米高傾過，期望當然係盡全力贏晒所有錦標，但同時都要現實啲。」佢認為曼聯下季若能再次躋身前四，同時喺足總盃爭冠、歐聯踢出好表現，已經算係進步。「我哋個個都想佢哋贏聯賽冠軍，但要現實問一句：佢哋真係贏到聯賽嗎？佢哋贏到歐聯嗎？我覺得好難，但力求進步係可行嘅。」
值得一提嘅係，2026年夏季轉會窗將於6月15日（星期一）正式開啟。曼聯能否喺轉會市場上作出明智收購，將直接影響卡域克能否帶領球隊再上一層樓。朗尼嘅說話雖然潑咗少少冷水，但亦反映咗現實——紅魔鬼距離真正爭標，可能仲有一段路要行。