蘇斯克查談拉舒福特：當佢狀態好又開心嘅時候，佢真係一個好勁球員

前曼聯領隊蘇斯克查（Ole Gunnar Solskjær）最近喺英國播客節目《Stick to Football》中罕有提到拉舒福特（Marcus Rashford），並表示因為見到佢喺巴塞隆拿表現唔錯，最近主動傳送咗幾條訊息畀佢。

蘇斯克查坦言，自從2021年離開奧脫福之後，佢同拉舒福特幾乎冇聯絡過，但最近因為見到佢狀態回勇，忍唔住傳送咗訊息：「自從我離開之後，我幾乎冇同拉舒福特講過嘢，但最近我send咗幾條訊息畀佢。」

蘇斯克查曾喺拉舒福特最巔峰嘅時期執教過佢，佢坦言唔明點解拉舒福特喺曼聯最後幾年會陷入低潮：「睇落佢喺度唔太開心。我唔知道佢生活中發生咗咩事，但而家好明顯佢喺巴塞踢得好享受。」

佢仲表示當拉舒福特狀態好嘅時候，佢身上有啲似夏蘭特（Erling Haaland）嘅能量，但可惜呢種熱情喺佢曼聯生涯尾段消失咗：「點解會咁？生活？比賽太多？我哋唔知道。教練嘅工作就係要察覺球員有冇問題。」
拉舒福特喺曼聯前途一度變得渺茫，先被租借去阿士東維拉（Aston Villa），之後轉戰巴塞隆拿（Barcelona）。蘇斯克查對佢嘅復甦感到高興：「我哋只希望佢一切順利。當佢狀態好又開心嘅時候，佢真係一個好勁嘅球員。」