尼維利：從未諗過做教練，直到華倫西亞搵我

近日，尼維利參加天空體育節目《我的初體驗與最後一次》，喺節目中佢談到咗執教華倫西亞嗰段經歷。

我第一次被費格遜鬧係幾時？
「第一次真正被鬧，絕對係我職業生涯第二季，作客對陣諾定咸森林嗰場。我啱啱代表英格蘭踢完歐國盃，嗰場比賽我踢得唔好，完場之後佢狠狠鬧咗我一餐，批到我體無完膚。嗰係我第一次喺一隊被鬧。大概兩三年前，佢仲喺一場預備隊比賽後鬧過我，仲要我哋第二朝六點返基地，跑咗大約五英里越野。」
你最後一次被人狠狠鬧係幾時？
「哦，我經常被人鬧。係我啲女，因為我想喺社交媒體post佢哋嘅相。佢哋會好嬲，叫我即刻刪。上星期我生日嗰日，我post咗一張相，佢哋就叫我刪，嬲到爆。」

你第一次萌生做教練嘅念頭係幾時？
「係接到華倫西亞電話嗰刻。我以前從未諗過要做教練，機會嚟到我先認真考慮，因為我好欣賞嗰度，亦想去試下。」


你最後一次考慮做教練係幾時？
「係我離開華倫西亞嗰日。自此之後我再冇諗過。」

你對加歷查嘅第一印象係乜？
「就係一個利物浦嚟嘅大嘴巴。我對佢嘅第一印象，係佢喺對曼聯時射入嗰兩個烏龍波。邊有人會喺對死敵嘅比賽，上半場射兩個烏龍波啊？嗰就係我對佢嘅第一印象。」

你對加歷查嘅最終印象係乜？
「熱愛足球，熱愛家庭，充滿激情，人好好。」