曼城第一簽?!

據曼城官方網站及BBC消息，曼城已經成功簽入多蒙特中場只剩1年合約嘅根度簡，並且成功通過體測，轉會費約2700萬歐元。25歲嘅根度簡最近因傷而未能夠入選德國隊23人大軍出席歐洲國家盃，預料復出時間為今年9月中。
喺11年嘅夏天，多蒙特以550萬從紐倫堡簽入根度簡，以作當時隊長沙軒轉投皇馬嘅空缺。佢好快融入高普嘅體制，更加帶領多蒙特打入2013年歐聯決賽，並射入一球一度為球隊扳平，可惜洛賓完場前嘅入球，令多蒙特無緣染指冠軍。及後幾個球季，根度簡受到傷患嘅纏繞，斷斷續續嘅受傷令佢唔能夠以最好嘅狀態上陣。其中喺13年嘅9月因"脊椎壓縮"，被逼養傷403日，足足超過一年。根度簡效力多蒙特5年，上陣157場，攻入15球並交出21次助攻，期間喺11/12贏得德甲冠軍及德國盃，13/14和14/15嘅德國超級盃。
無可否認，無傷嘅根度簡的而且確可以令到一對球隊運行得更暢順，由守轉攻嘅速度加快，希望下季喺曼城有好嘅表現。
多蒙特賣走根度簡後，相信即將會簽入新球員以彌補空缺。拜仁嘅洛迪(Sebastian Rode)好大機會以1500萬歐元加盟。