[拾苟話當年]C朗加盟曼聯轉會內幕揭秘︰由雲加「無限接近」險簽、去到士砵亭友賽迫宮事件

拾苟說足球 於 14/10/2020 發表 收藏文章
C朗拿度當年加盟曼聯,好多人聽嘅version就係「C朗喺士砵亭對曼聯嘅友誼賽艷光四射,賽後一眾曼聯球員喺更衣室向費sir迫宮,話呢個後生仔癲架,我哋一定要買佢返嚟!」然後費sir打咗個電話,兩日之後曼聯就用破紀錄嘅轉會費將呢位未來世界足球先生羅致旗下。


事實就梗係唔係咁啦,最少唔係事實之全部。你估打FIFA咩,打個電話就買到人,連打FM都無可能。大家未必知嘅係,係C朗喺嗰場「關鍵比賽」之前一晚,已經知自己將會加盟曼聯;九個月前之前,曾經無限接近加盟阿仙奴。

The Athletic專欄作家Daniel Taylor訪問咗大量同轉會有關嘅人,寫咗篇極長嘅文章(Link喺最底)講述成個轉會故事,睇都睇咗半個鐘,我就唔翻譯全文了。喺度節錄比較有趣嘅幾個情節。

首先係講雲加「險簽」C朗嘅故事。雲加一直非常欣賞C朗,阿仙奴歐洲區球探Damien Comolli自C朗15歲開始已經留意佢;利物浦、熱刺、皇馬都有球探監視,但阿仙奴係少數球會幾乎「每星期都有球探留意C朗表現」,喺雲加個辦公室入面,早就有一整本專屬嘅球探dossier講C朗。據報,當時曼聯連一個葡萄牙區嘅專屬球探都未有。
而阿仙奴亦喺呢個歐洲炙手可熱新星嘅爭奪戰中遙遙領先。C朗同佢母親、以及經理人文迪斯(Jorge Mendes)喺2002年11月(即係佢正式加盟曼聯前九個月)到訪倫敦,同雲加喺阿仙奴個飯堂食咗個飯,參觀咗新球場同訓練設施,同亨利等球員見面,以及口頭確定咗800萬鎊嘅轉會費。雲加甚至帶咗佢上房(辦公室)同佢講︰「如果你想,呢件28號波衫我可以留比你。」


但之後,經理人Jorge Mendes(上圖左)出招,令整個會談急轉直下。有一段未經証實,但行內流傳嘅版本係咁︰Mendes突然消失咗一陣,打咗個電話,然後同雲加講,「我啱啱同費格遜講咗兩句,佢哋話會比1100萬鎊。」

當然你哋可以笑雲加辜寒,額外300萬鎊都比唔起,就無咗個C朗;現實係阿仙奴啱啱起完新球場,攞多少少錢都要攞board approval;同埋而家講緊2002年,貴過1100萬鎊嘅收購,當年只有安歷卡加盟曼城(1300萬鎊)、同里奧費迪南加盟曼聯(3000萬鎊)嘅費用。(當年都被人話瘋狂,今日一個稍有名氣嘅後生仔,如果成交價無五千萬鎊都唔好話比人知自己有料。)

此役後,雲加對Mendes可謂懷恨在心。有同場活動,雲加都唔會主動打招呼,最多只係握一下手,笑都唔笑。阿仙奴喺雲加在任其間,成為少數無簽下任何Mendes旗下球員嘅大球會,十幾年來只有一次洽談咁大把,最後當然唔成事。

******

另一邊廂,曼聯自2002年聘請前士砵亭領隊昆洛斯(Carlos Queiroz),費格遜「內閣」就多咗一個熟悉葡萄牙球壇嘅職員,曼聯亦因此同士砵亭建立咗「戰略合作關係」。當然呢個關係本意就唔係用嚟比曼聯去挖C朗嘅,但絕對有助曼聯去打通葡萄牙年青球員嘅網絡,同埋成為咗曼聯爭奪C朗嘅一大優勢。


講多句關於呢個「戰略合作關係」。大把人講咗咁多次「2003年8月6日士砵亭對曼聯嘅友賽好關鍵」,但係好少人記得呢場友賽當初係點發生︰當日其實係士砵亭新主場Estadio Jose Alvalade嘅第一場比賽,呢場波算係啟用典禮嘅一部份。咁點解佢哋咁多隊唔揀,係要邀請曼聯嚟踢?一切非巧合。

就喺友賽前一晚,費格遜同士砵亭董事食晚飯;Mendes中途加入,之後費格遜同Mendes單獨會面兩個鐘頭,達成君子協定︰C朗會同曼聯簽五年合約,第一年會以租借形式回歸喺士砵亭。

https://encrypted-tbn0.gstatic.com/images?q=tbn%3AANd9GcT5kVkdKWRhok6erudAz167BcwRq1E5snF88w&usqp=CAU

結果C朗第二晚就喺友賽上搞到奧沙半死。雖說呢場友誼賽前其實交易已經完成,佢最大嘅改變,就係徹底說服咗曼聯上下︰球員、領隊、管理層,呢條友,掂呀。

費sir喺友賽嘅半場時,已經send咗個message比時任Chief Executive(唔係特首,係首席執行長) Peter Kenyon,同佢講︰「呢個細路,佢要立即跟我哋返曼聯。」("This boy needs to to come back with us")
球員喺更衣室、回程飛機上面要求費sir簽C朗嘅事係真嘅,只係當時佢哋佢無留意到,Peter Kenyon無搭上回程飛機,因為費sir已經請佢留喺葡萄牙,取消咗回借條款,同埋,完成最後轉會手續。

The rest is history.

原文參考︰The real story of football’s biggest transfers – Ronaldo joins Manchester United by Daniel Taylor

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→