[拾苟分析]優勝劣敗的歐聯大戰︰曼聯主場敗予巴黎,不得不接受的3大要點

拾苟說足球 於 13/02/2019 發表 收藏文章
下半場一個角球失誤落後,曼聯被迫壓前,之後再輸反擊,全場0-2落敗,要不是迪基亞可能再輸一球。此証明上半場穩守戰術絕對合理。即使連加特、馬迪爾上半場無傷出、曼聯球迷再酸,巴黎聖日耳門嘅勝利亦極有說服力。

以下係呢場波,曼聯迷不得不知、或不得不接受嘅三大重點︰

1. 麥巴比無疑係世界級

如果無睇波嘅可以睇返精華︰第一球入球前嘅角球,來自麥巴比嘅頭鎚攻門;第二球麥巴比直接入波。呢兩個攻門反映咗麥巴比嘅功架︰唔係世人理解嘅「屈速」,而係適時走位(time your run) + 變速。我諗淨係呢兩下,話佢媲美C朗不為過。

蘇斯克查刻意起用拜利而非鐘斯打中堅,就係貪前者跑得快,但有時對住有智慧又有速度嘅球員,跟唔到就係跟唔到。承第一點,面對麥巴比,曼聯完全無呢種智慧嘅攻擊球員做防守演練,優勝劣敗,就係咁簡單。

2. 爭中場得天下,曼聯中場偏偏進退失據

即使係費格遜下嘅曼聯,喺歐聯戰場上都感到吃力(呢點係相比聯賽嘅大成功)。蘇斯克查第一次喺歐聯淘汰賽領軍,似乎未參透當年費sir嗰句︰「打歐洲賽,得中場得天下」嘅理論。有別於師父經常排出五人中場打歐聯爭中場,呢場蘇斯克查嘅曼聯三人中場完全被打散,直接導致攻不銳守不穩嘅現象,後防線要直接受壓。


而進退失據係曼聯中場死因。兩隊都想打防反、兩隊都唔想輸防反。呢種情況,通常無入波壓力嗰隊都有優勢。因為攻擊球員想進攻就要向前走、但後防要逗得夠深去防止防反。結果隊形被拉散,中場球員被迫要覆蓋超大空間,等於喺失去控球權後,中場完全被bypass。
此消彼長下,華拉提、馬基諾斯今場真係打得好好。

連加特、馬迪爾半場傷出,戰術上完全要執生;加上下半場中後段角球失誤以致有入球壓力,令嘅曼聯兵敗如山倒。

3. 蘇斯克查嘅領軍班底仍然值得期待
由於以上三點,曼聯今場被壓制到毫無反擊之力。廣大球迷更加覺得︰喂,巴黎都讓你尼馬+卡雲尼,主場都贏唔到,蘇斯克查係咪唔掂?

經驗不足係一樣嘢,能力係另一樣嘢。如果單單睇上半場、以至下半場失波前,你會見到曼聯好努力地做進攻(雖然唔成功,呢樣要執),同時有針對性嘅防守戰術。上半場嘅曼聯有別於以往,兩閘唔壓上乃意料中事,令人驚訝嘅係將兩閘收窄,幾乎去到大禁區內。呢個算係蘇斯克查一個成功嘅賭博︰收窄防線,限制中鋒麥巴比嘅空間。

問題︰咁兩邊咪有空位囉?蘇斯克查再賭,巴黎中場如華拉提、迪斯拿等人嘅長傳能力不及短傳、兩翼亦唔夠速度去贏楊格或疏爾,最後証明係正確。事實上,喺巴黎以死球入波前,創造到嘅機會(而又無越位嘅)只得麥巴比嘅頭鎚。就呢兩點嚟講,睇得出蘇斯克查班底嘅分析、戰術思維其實相當成熟。



後記︰

最後講講,球証真係好垃圾。睇開小弟都知從來唔講黑哨論,只係呢個球証尺度太嚴,且有啲唔太統一,最後兩隊都受害於過多黃牌。上半場出現五個黃牌,最少有一半係唔使比;但有黃牌在身嘅Kimpembe有兩下「黃牌動作」,偏偏又不死身唔使領第二面黃,之後仲要入波。
不過咁講,普巴第二個黃牌就無乜得拗。

曼聯呢場主場落敗、普巴紅牌、表現差劣,結果絕對係差,連蘇斯克查自己都話,Today is a reality check for us。心態正面,不過喺地獄賽程下,尚且睇下曼聯會否就此放棄歐聯戰線,專心打聯賽同足總盃。

文︰請支持小弟的Facebook專頁-拾苟說足球!

留言


請按此登錄後留言。未成為會員? 立即註冊
    快捷鍵:←
    快捷鍵:→