高級組銀牌決賽一評 文字

一球成名於 26/01/2016 發表 收藏文章
首先恭喜東方贏得今屆高級組銀牌冠軍。琴日嚴寒加上一路落雨既天雨下進行既高級組銀牌決賽,仍然有超過4500名球名入場,實在係一件值得高興既事。有大量球迷打氣吶喊下,相信球員都踢得更落力將最好表現帶俾觀眾。

講返整場波的發展
東方排出一個4231既陣式,左右翼為李康廉及徐德帥,基奧雲尼從後支援單箭頭巴域斯。而南區都以4231出戰,以夏志明打單箭頭,蘇沙打左翼,陳港斌打右翼,陸志豪打攻中。一開波東方佔有較多控球權,冠忠南區以防守反擊為主。冠忠南區整條後防線及防中表現相當好,令到東方只能不斷分波俾兩邊企圖以邊路拉空冠忠南區既後防線,但礙於李康廉狀態一般,好多波去到佢腳都俾後衛捉到路,加上缺乏疊瓦式進攻,令到左路進攻不足,很多時都回傳俾白鶴同迪高再組織,相反東方右路有狀態不俗既徐德帥及鄭璟昊,徐德帥很多時一攞到波就會推入中路,為鄭璟昊帶來空位作疊瓦式,令東方右路進攻比左路為好。但基奧雲尼及巴域斯受到緊密看管,很多時都俾唔到波佢兩個,一旦俾到佢地,佢地亦轉唔到身,只好回傳俾隊友,令東方進攻乏力。

至於冠忠南區則以防反為主,但箭頭子彈夏志明缺乏身位,面對東方兩位中堅表現得相當辛苦,甚少波可以去到佢腳下,令到防反速度減慢。至於半場進攻方面,波甚少傳去右路,加上走位一般,令南區右路近乎零進攻,加一陸志豪多居於右路,但甚少波傳到佢腳下,令到中路邊路少了一個能串連前鋒既球員。而迪亞斯既傳送亦以穩陣為先,令南區半場缺乏致命傳送或放落位給邊路球員落底,令進攻乏力。南區唯一有威脅的球員就係蘇沙,佢多次成功單對單突破成功,並作左不少漂亮傳送及傳中,令東方右路壓力甚大,徐德帥或其一防中需要回到右路協防。但上半場冠忠南區就只有蘇沙能威脅右路,中路球員支援不足。

總括上半場雙方都踢得比較保守,以防守為先,令具威脅既射門少之又少。

直到下半場開始,雙方仍維持上半場既局勢。不過最關鍵的時刻出現左,就係東方教練牛丸針對個人突破不足,缺乏爆破力,決定由個人技術好既勞高換出狀態一般既李康廉,此換人舉動有立光見影之效,加上冠忠南區進攻乏力,令東方可以在換人後將陣式轉似4222,任由勞高與徐德帥作出個人突破,亦令邊路更多空位,有利兩閘出擊。勞高個人突破了得,多次在中路突破成功,更博到多次犯規,徐德帥既入球都係由勞高博得犯規。相反,冠忠南區換人後成效不大,由小將梁家希入替陸志豪更是令人摸不著頭腦,換走陸志豪令南區缺乏可以控球作關鍵傳送既球員,令到成隊波在轉守為攻時缺乏一位keyman去串連。再者換走全場最有威脅既蘇沙,在轉守為攻時缺乏了一個明確的點及冇人可以做到其個人突破之工作,令到南區既進攻雪上加霜,即使有控球權亦不能製造有效功勢,很多時波很快就甩,回到東方腳下。結果東方在徐德帥一次落點準既傳中給巴域斯頂入成2:0,整場比賽亦可以畫上句號。

總括整場比賽,冠忠南區雖然失了兩球,但其實整個防守已經做得不俗,甚少有太大空位俾東方球員作突破,只是組織力不足只靠個人突破令東方易於防範,及缺乏反擊的長傳,令反擊速度不高。東方勝出決賽當然值得高興,但其實攻勢略嫌過於側重邊路中路,缺乏中路突破,但如果當日翼鋒狀態不佳,東方便缺乏破門方法。

圖片來源:兩隊facebook

留言

會員
我要評論
請按此登錄後留言。未成為會員? 立即註冊